హ్యూమర్
 ‘‘మావాడిని చూస్తుంటే కడుపు తరుక్కుపోతోంది. వాడిని చూస్తేనే చాలా ఆందోళనగా ఉంది. వాడికి కాస్త నువ్వైనా చెప్పురా’’ అందిరాంబాబు వాళ్ల అమ్మ నాతో. ‘‘ఏమైంది?’’ అని అడిగా.  ‘‘నువ్వు వాడిని ఒకసారి కదిలించు. నీకే తెలుస్తుంది’’ అంది ఆవిడ.నాలుగైదు సార్లు పిలిచా. కానీ వాడు విన్నట్లు అనిపించలేదు. దాంతో ఏమిటిది అన్నట్లుగా రాంబాబుగాడి అమ్మగారివైపు చూశా. ‘‘నువ్వు వాడితో మాట్లాడాలనుకుంటున్నాననీ, వాడి ఎదురుగానే ఉన్నానని ఒకసారి వాడికి వాట్సాప్ పెట్టు’’ అంది.ఆ పని చేశాను. కాస్తంత పాజ్ ఇచ్చాక అది టింగుమని మోగింది. అప్పుడు తలెత్తి చూశాడు. ‘‘ఏంట్రా ఈ ధోరణి?’’ అని అడిగా. ‘‘ఏంటో మాట్లాడాలన్నావు’’ అన్నాడు వాడు.‘‘అదే ఇలా సెల్‌ఫోన్‌లో ఇంతగా మునిగిపోవడం ఏమిటి?’’ అని అడిగా. ‘‘ఇదేనా... నువ్వు ఏదైనా చెప్పదలచుకుంటే వాట్సాప్ పెట్టు లేదా మెయిల్ పంపించు’’ అంటూ మళ్లీ మొబైల్‌ఫోన్‌లో తలదూర్చాడు వాడు.
 ‘‘ఇదీ నాయనా వరస. ఏం మాట్లాడాలన్నా వాట్సాప్ మెసేజ్ పంపాలంటాడు. ‘ఒరేయ్ అన్నం పెట్టాను. తినడానికి లేవరా’ అంటే ఎంతకీ వినలేదు. అప్పుడు వీళ్ల నాన్నగారితో మెసేజ్ పెట్టించా. అప్పుడు కూడా లేవలేదు. పైగా ‘ఏం కూర?’ అని అడుగుతూ మళ్లీ వాళ్ల నాన్నకు మెసేజ్ పంపాడు. అప్పుడాయన కూర ఏమిటో మెసేజ్ పెట్టి, ఆ వంట గిన్నెను ఫొటో తీసి పంపారు. అప్పుడు కూడా నోట్లో నీరూరుతున్నట్లు ఒక స్మైలీ బొమ్మ పెట్టాడు. అప్పుడు వాళ్ల నాన్నగారు వాడిని ముఖం మీద గుద్దుతున్నట్లు ఒక ఫొటో పెట్టి... దాదాపుగా డైనింగ్ టేబుల్ ముందు ఎత్తి కుదేసారు. అప్పుడు గానీ తినలేదురా వాడు’’ అంటూ కళ్లనీళ్లు పెట్టుకున్నారు రాంబాబు వాళ్ల అమ్మగారు. 
 ఇంతలో వాడి నాన్నగారు కూడా వచ్చారు. ‘‘అదేమిటోరా. పావ్‌లోవ్ అనే సైంటిస్టు గారి కుక్కలాగా బిహేవ్ చేస్తున్నాడనిపిస్తోందిరావీడు’’ అంటూ వాపోయారాయన.‘‘పాల్‌లోవ్ కుక్క ఏమిటండీ?’’ అడిగారు వాళ్లమ్మ గారు.‘‘అప్పట్లో పావ్‌లోవ్ అనే సైంటిస్టు ఉండేవాడట. వాళ్ల కుక్కకు గంట మోగించి, అన్నం పెట్టేవారట. అన్నం పెట్టినప్పుడు దానికి నోట్లో నీరు ఊరాలి కదా. కానీ తన ధోరణికి అలవాటు పడి... అన్నం పెట్టకపోయినా... కేవలం గంట శబ్దం విన్నా దాని నోట్లోకి నీళ్లు వచ్చేవట’’ వివరించారు రాంబాబు వాళ్ల నాన్న. ‘‘అలా అయితే వాడిది కుక్క బతుకు అయిపోయిందా అండీ...’’ అంటూ గుడ్ల నీళ్లు కుక్కుకుంది. ‘‘వాడి నోట్లో నీరూరలేదని... నీ కళ్లలో నీరు ఊట ఎందుకు? చూద్దాం చూద్దాం’’ అంటూ సముదాయించాను నేను.రాంబాబు గాడి మీద విపరీతమైన కోపం వచ్చింది నాకు. వాడు ఇలా లోకం పట్టనట్టుగా ఉన్నందుకు కాదు. మొబైల్ తోడిదే లోకం అన్నట్టు బతుకుతున్నందుకూ కాదు. ఆ పెద్దావిడను కళ్లనీళ్లు పెట్టిస్తున్నందుకు. ‘‘నా బాధ మరొకటి కూడా ఉందిరా.  వాడి పెళ్లి చేద్దామనుకుంటున్నాం కదా. రేపు వాడి పెళ్లయితే ఎలా’’ అంటూ మరి కాస్త బాధపడింది.
 ‘‘రాంబాబు గాడికి పెళ్లా? ఎప్పుడు? ఎవరితో?’’ అన్నాను.‘‘అదేరా... మొన్న వచ్చిన ఆ తెలివిటూరు సంబంధం గురించి’’ అంది.‘‘నిశ్చయం చేశారా? అయితే ఓకే... ఇంక మీరు చెప్పడం ఎందుకు’’ అన్నాను.‘‘ఇంకా నువ్వూ... నేనూ చెప్పేదేమిటి? ‘పెళ్లి చేస్తే పిచ్చి కుదురుతుంద’ నే సామెత ఉంది కదా. అదెందుకు వచ్చిందనుకున్నావు. మన రాంబాబుగాడి లాంటి పిచ్చిమాలోకాల కోసమే’’ అన్నాను నేను నిశ్చింతగా.‘‘ఏమిటి నువ్వు చెప్పేది?’’ కాస్త అయోమయంగా చూసింది. ‘‘ఎవడి నుంచి రింగో... మరెవరి దగ్గర్నుంచి ఫోనో వస్తే ఎవ్వడూ స్పందించడు. కానీ అదే పెళ్లాం నుంచి వచ్చిందనుకో...’’ అంటుండగా... ‘‘ఆ... వస్తే?’’
 ‘‘మొగుడనేవాడు చచ్చినట్టు  ఫోనెత్తి తీరాల్సిందే. కాల్‌కు అటెండ్ కావాల్సిందే. లేదంటే వాడి తిక్క వాడి పెళ్లామే కుదుర్చుతుంది. కాబట్టి నువ్వేమీ బెంగ పడకు. మన వాణ్ణి ఈలోకం నుంచి బయటపడేసి తన తోడిదే లోకం అనుకునేలా చేయడానికైనా సంబంధానికి ఓకే చెప్పెయ్’’ అంటూ నిశ్చింతగా బయటకు వచ్చేశాను నేను.
  - యాసీన్


 హ్యూమర్
 ‘‘మోసాన్ని చాలా మంది నెగెటివ్‌గా చూస్తుంటార్రా... కానీ మోసం ఎంతో పాజిటివ్. పైగా అదెంతో అవసరం’’ అన్నాడు రాంబాబు గాడు.
  ‘‘మోసం పాజిటివా? పైగా మంచిదా? ఏం మాట్లాడుతున్నావ్‌రా నువ్వు?’’ అంటూ ఒకింత కోపంతో గద్దించాను నేను.
  వాడేమీ చలించలేదు. ‘‘సజలం, సకాలం లోని పదాలలాగే మోసాలు అనే మాటకు ‘స’ను జోడించు. ఇప్పుడు చెప్పు ‘సమోసాలు’ అందరూ కోరుకునేవా, కావా నువ్వే చెప్పు’’ అన్నాడు వాడు. ఏమాటకు ఆమాటే చెప్పుకోవాలిగానీ సమోసాలంటే నాకు ఇష్టమే. నా బలహీనతను ఆసరాగా తీసుకునేవాడిలా మాట్లాడుతున్నాడనిపించింది.
  
 ‘‘అదేంట్రా మోసాలకు ముందు ‘స’ అనే అక్షరం పెట్టినంత మాత్రాన మోసాలకూ, సమోసాలకూ సాపత్యమేమిటి?’’ అని అడిగా.
  ‘‘మోసం అన్నమాటే నీచం అన్నట్లుగా చెబుతుంటారు. కానీ అదే మోసాన్ని పాజిటివ్‌గా చూపే సామెతలనూ, కథలనూ మనకు చిన్నప్పట్నుంచే వినిపిస్తూ, మోసాలు చేయమని పెద్దలే చెబుతారు’’ అన్నాడు వాడు.
  ‘‘మోసాలు చెయ్యండంటూ పెద్దలే చెబుతారా?’’ ఒళ్లు మండి అనడిగాన్నేను.
  ‘‘ఆ... అవును. పైగా మోసం చేయడం చాలా అవసరం అని చెప్పడానికి నిదర్శనంగా ఒక కథ కూడా చెబుతారు. ఒక సింహం అడవిలోని జంతువులనన్నింటినీ రోజూ అప్పనంగా తినేస్తోందట.
 
 ‘రోజుకు ఒకటి చొప్పున స్వచ్ఛందంగా ఆహారమవుతాం’ అని జంతువులన్నీ ఆ సింహానికి నచ్చజెప్పాయట. ఒకరోజు ఒక కుందేలు వంతు వచ్చిందట. అది సింహం దగ్గరకు కాస్త ఆలస్యంగా వెళ్లిందట. సింహానికి కోపం వచ్చి జాప్యానికి కారణం అడిగిందట. అప్పుడా కుందేలు... ‘రాజా... నీకోసమే బయల్దేరితే మధ్యలో మరో సింహం ఎదురైంది. అది అటకాయించడం వల్లనే ఆలస్యం అయ్యింది’ అంటూ జవాబిచ్చిందట. అప్పుడా సింహానికి మరింత కోపం వచ్చి ఎవరా సింహం చూపమందట.
 
 దాంతో ఆ కుందేలు ఒక పాడుబడ్డ బావిని చూపి అందులోనే అది  ఉందని చెప్పిందట. అప్పుడు తన ప్రతిబింబాన్నే మరో మృగరాజుగా భావించిన ఆ సింహం దానితో పోరాడటానికి బావిలోకి దూకి చచ్చూరుకుందంటారు. కుందేలు మోసాన్ని మెచ్చుకుంటారు. ఇక్కడ చివరన... మోసాన్ని మోసంతోనే జయించాలని నీతి చెబుతారు విజ్ఞులు’’ అన్నాడు వాడు.
  
 ‘‘ఒరే ఇక్కడ కుందేలు చేసింది మోసం కాదురా... దాన్ని యుక్తి అంటారు’’ చెప్పాను నేను.
  అప్పటికీ రాంబాబు గాడు తగ్గలేదు. ‘‘మనం ప్రదర్శిస్తే యుక్తి. అదే ఇతరులు మనకు చేస్తే మోసం. పైగా మోసాలు అనేవి తప్పు కాదనీ, అవి ప్రకృతి ధర్మమని తెలుసు కోవాలి’’ అన్నాడు వాడు.
  ‘‘మోసాలు ప్రకృతిలో భాగమా?’’ అడిగాను నేను.
  ‘‘అవున్రా. మొక్కలూ మోసాలు చేస్తాయి. ఫ్లై ఆర్కిడ్ అనే మొక్క ఎంత మోసం చేస్తుందో చూస్తే మతిపోతుంది. అది తన పూల ఆకృతిని ఎలా ఉంచుతుందో తెలుసా? అచ్చం ఆడ తుమ్మెద రూపంలా. అంతేకాదు... వయసుకు వచ్చిన ఆడ తుమ్మెద నుంచి వెలువడే వాసననూ ఆ పువ్వు వెలువరిస్తుంది. సదరు హార్మోన్ల పరిమళాలకు పరవశిస్తాయి మగ తుమ్మెదలు. అంతే... పాపం ఆ మగపురుగులు  మోసపోయి... ఆడ తుమ్మెదను కలుస్తున్నాం కదా అన్న భ్రాంతితో ఆ పువ్వు మీద వాలిపోతాయి.
 
 ఆ తర్వాత ఆశాభంగం చెంది కునారిల్లిపోతాయి. ‘తుమ్మెద ఫీలింగ్స్ ఎలా పోతే మనకెందుకు? మన పుప్పొడి దాని కాళ్లకు అంటి వ్యాపించింది కదా’ అని ఖుషీ అవుతుంది మన ఫ్లై ఆర్కిడ్ మొక్క. యుద్ధంలో, ప్రేమలో అంతా యుక్తమేనట. తమ పుప్పొడి ఆడపువ్వును చేరడం కోసం తమ పూ రెక్కలతో ఇలా మోసానికి పాల్పడతాయి ఆ మొక్కలు. ఇది ఇలా ఉంటే ఇక విజ్ఞులంతా వజ్రాన్ని వజ్రమే ఖండిస్తుంది. అలాగే మోసాన్ని మోసంతోనే జయించాలని ఉద్బోధిస్తుంటారు. అంటే మోసం ఈజ్ ఈక్వల్ టు వజ్రం అన్నమాట. మరి వజ్రమంత విలువైనదాన్ని అలా నెగెటివ్‌గా చూడటం మన తప్పుకాదా?’’ అన్నాడు వాడు.
  రాంబాబు గాడితో ఇక నేను వాదించలేక ‘‘ఒరేయ్... ఎవరైనా నిన్ను మోసం చేసినప్పుడు తెలుస్తుందిరా నీకు ఆ బాధేమిటో’’ అన్నాను కినుకగా.
  
 ‘‘నీకు నేచురల్ సైన్స్‌లోని నేచర్ అర్థం కావడం లేదు. అందుకే నీకు అర్థమయ్యే భాషలో చెబుతా విను. చిన్నప్పటి మన ‘అడవిరాముడు’ దగ్గర్నుంచి మొన్నటి మహేశ్ బాబు ‘దూకుడు’ వరకూ... మన హీరోలు పాపం విలన్‌లను మోసం చేస్తూ ఆటపట్టిస్తూ ఉంటే... ఇంటర్వెల్‌లో సమోసాలు తెచ్చుకుని తింటూ మరీ ఆ మోసాలను ఎంజాయ్ చేశావా లేదా? మోసం నీకు మోదం ఇస్తుంటే అది నెగెటివ్ ఎలా అవుతుంద్రా’’ అన్నాడు వాడు.  ఏమీ బదులు ఇవ్వలేక ‘‘నీదంతా తొండి. నువ్వు చేసేదంతా మాటల గారడీరా’’ అన్నాన్నేను.
  ‘‘గారడీ అంటేనే మోసం. అది కూడా నువ్వు ఎంజాయ్ చేసేదే’’ అంటే నిశ్శబ్దంగా మోసపోవడమే మరోమారు నా వంతయ్యింది.
  - యాసీన్