సాక్షి, కడప: ఎర్రచందనం స్మగ్లర్లు కొత్త పంథాను ఎన్నుకున్నారు. ఆయిల్ ట్యాంకర్‌లో ఎర్రచందనం దుంగలు తరలిస్తూ పట్టుబడ్డారు. వైఎస్సార్‌ జిల్లా సిద్దవటం మండలం కనుమలోపల్లె దగ్గర ఆయిల్ ట్యాంకర్‌లో రవాణా అవుతున్న 95 ఎర్రచందనం దుంగలను పోలీసులు ఆదివారం పట్టుకున్నారు. ఈ సందర్భంగా ఏడుగురిని పోలీసులు అరెస్ట్ చేశారు. పట్టుబడిన ఎర్రచందనం విలువ కోటి రూపాయలు ఉంటుందని అధికారులు చెప్పారు. ఇప్పటి వరకు వాహనాల ద్వారా రవాణా చేస్తే పోలీసులు పట్టుకుంటారన్న భయంతో ఆయిల్ ట్యాంకర్‌లో దుంగలను నింపి రవాణా చేస్తుండడం విశేషం. అయితే ఈ సంఘటనకు సంబంధించి మరిన్ని వివరాలు తెలియాల్సి ఉంది.


 కడప: ఎర్రచందనం స్మగ్లింగ్ కేసులో అరెస్టై కడప సెంట్రల్ జైలులో ఉన్న చైనా స్మగ్లర్ ప్రేమ్‌థార్ మంగళవారం రాత్రి ఆత్మహత్యాయత్నం చేశాడు. మూడు నెలలుగా ప్రయత్నిస్తున్నా బెయిల్ రాకపోవడంతో మనస్తాపానికి గురైన ప్రేమ్‌థార్ బాత్‌రూమ్‌కు వేసిన రేకులతో చెయ్యి కోసుకుని ఆత్మహత్యాయత్నం చేశాడు.
 
 గమనించిన తోటి ఖైదీలు జైలు అధికారులకు సమాచారం ఇచ్చారు. డాక్టర్‌ను పిలిపించి ప్రేమ్థార్కు చికిత్స అందించారు. ప్రస్తుతానికి అతనికి ప్రమాదమేమీ లేదని వైద్యులు తెలిపారు.