శ్రీహరికోట: పీఎస్‌ఎల్వీ సీ-36 ప్రయోగం ప్రారంభమైంది. భారత అంతరిక్ష ప్రయోగకేంద్రం సతీష్ ధవన్ స్పేస్ సెంటర్ (షార్) నుంచి బుధవారం ఉదయం 10.25 గంటలకు పీఎస్‌ఎల్‌వీ సీ-36 విజయవంతంగా నింగిలోకి దూసుకెళుతోంది. 1235 కిలోల రిసోర్స్ శాట్‌-2ఏ ఉపగ్రహాన్ని పీఎస్‌ఎల్వీ సీ-36 నింగిలోకి తీసుకెళుతోంది. మొత్తం నాలుగు దశల్లో ఈ ప్రయోగం పూర్తి కానుంది.
 
 దీనికోసం సోమవారం రాత్రి 10.25 గంటలకు కౌంట్‌డౌన్ ప్రక్రియ ప్రారంభించారు. 36 గంటల కౌంట్‌డౌన్ అనంతరం పీఎస్‌ఎల్‌వీ సీ-36 రాకెట్ ప్రయోగాన్ని నాలుగు దశల్లో 17.9 నిమిషాల్లో చేయనున్నారు. 44.4 మీటర్లు ఎత్తున్న పీఎస్‌ఎల్‌వీ సీ-36 రాకెట్‌ను ఎక్సెల్ స్ట్రాపాన్ బూస్టర్ల సాయంతో ప్రయోగించారు. ఈ ప్రయోగం ద్వారా 321 టన్నుల బరువును తీసుకుని రాకెట్ భూమి నుంచి నింగికి పయనమైంది.