సాక్షి, హైదరాబాద్‌: ప్రభుత్వ జూనియర్‌ కాలేజీల్లో పనిచేస్తున్న కాంట్రాక్టు లెక్చరర్ల వేతనాలు పెరిగాయి. ప్రస్తుతం వారికిస్తున్న రూ.18 వేల వేతనాన్ని రూ.27 వేలకు పెంచుతున్నట్లు ప్రభుత్వం స్పష్టం చేసింది. ఈ మేరకు ప్రభుత్వ ప్రత్యేక ముఖ్య కార్యదర్శి రంజీవ్‌ ఆర్‌ ఆచార్య శనివారం ఉత్తర్వులు జారీ చేశారు. పెంచిన వేతనాన్ని ఈ నెల నుంచే అమలు చేయనున్నట్లు ఉత్తర్వుల్లో పేర్కొన్నారు. కాంట్రాక్టు జేఎల్‌ల నియామక సమయంలో పట్టణ ప్రాంతాల్లో పనిచేస్తున్న వారికి రూ.4వేలు, గ్రామీణ ప్రాంతాల్లో పనిచేస్తున్న వారికి రూ.5వేల చొప్పున వేతనాలిచ్చారు. 2011లో వారి వేతనాలను రూ.18 వేలకు పెంచారు. ఈ క్రమంలో జేఎల్‌ కాంట్రాక్టును పొడిగించిన నేపథ్యంలో వేతన పెంపునకు సంబంధించి ప్రతిపాదనల్ని ఉన్నత విద్యాశాఖ ప్రభుత్వానికి సమర్పించింది. ఈ క్రమంలో వారి కాంట్రాక్టు పొడిగించిన ప్రభుత్వం.. తాజాగా వేతనాన్ని రూ.27 వేలకు పెంచింది. దీంతో జనవరి ఒకటో తేదీన రాష్ట్రంలోని 3,687 మంది కాంట్రాక్టు లెక్చరర్ల ఖాతాల్లో పెరిగిన వేతనం జమ కానుంది.