న్యూఢిల్లీ: పెద్దనోట్ల రద్దు నేపథ్యంలో కేంద్ర ఆర్థికమంత్రి అరుణ్‌జైట్లీ నగదు చెల్లింపులపై అన్ని ప్రభుత్వ శాఖలకు కీలక ఆదేశాలు జారీచేశారు. కాంట్రాక్టర్లు, వ్యాపారులకు ఐదువేలు దాటి నగదు చెల్లింపులు చేయవద్దని, ఐదువేలకు మించిన బిల్లులన్నింటికీ ఈ-పేమెంట్‌ సౌకర్యాన్ని వాడుకోవాలని ఆదేశించారు. గత ఆగస్టులో నగదు చెల్లింపులపై రూ. 10వేల వరకు పరిమితి విధించగా, ఇప్పుడు దానిని కేంద్రం రూ. 5వేలకు కుదించింది. ప్రభుత్వ చెల్లింపులన్నీ డిజిటలైజ్‌ చేసి.. ఈ-పేమెంట్స్‌ను ప్రోత్సహించాలన్న సంకల్పంతో అన్ని మంత్రిత్వశాఖలకు ఈ ఉత్తర్వులను జారీచేస్తున్నట్టు కేంద్ర ఆర్థికమంత్రిత్వశాఖ తన ఉత్తర్వుల్లో తెలిపింది.
 
 పెద్దనోట్ల రద్దు నేపథ్యంలో ఇంటర్నెట్‌ బ్యాంకింగ్‌, ఈ-పేమెంట్స్‌ను మరింతగా ప్రోత్సహించాలని, దేశమంతటా నగదు రహిత చెల్లింపుల విధానం తీసుకురావాలని కేంద్రం సంకల్పించిన సంగతి తెలిసిందే. ఈ నేపథ్యంలో ఆర్థికమంత్రి జైట్లీ ఆమోదంతో ఈ ఉత్తర్వులు జారీఅయ్యాయి.