ఆర్టీఐ కమిషనర్‌ విజయబాబు
 
 విశాఖ, విజయనగరం 
 
 అపీళ్లపై విచారణ 
 
 కాకినాడ సిటీ : 
  సమాచార హక్కు చట్టం కమిషనర్‌ పి.విజయబాబు 19 కేసులకు సంబంధించిన అపీళ్లపై  విచారణ నిర్వహించారు. శుక్రవారం కలెక్టరేట్‌ కోర్టుహాలులో విశాఖపట్నం, విజయనగరం జిల్లాలకు సంబంధించిన పంచాయతీరాజ్, రెవెన్యూశాఖల అప్పీళ్లపై విచారణ చేపట్టారు. పాడేరు పంచాయతీరాజ్‌ పరిధిలో గ్రామీణ రహదారుల ఏర్పాటులో గ్రావెల్‌ అవకతవకలు జరుగుతున్నాయని వచ్చిన అపీల్‌పై విచారణ నిర్వహించి పంచాయతీరాజ్‌ సూపరింటెండెంట్‌ సవివర విచారణ నివేదిక పంపించాలని ఆదేశించారు. ఎస్‌.రాయవరం మండలంలో హుదూద్‌ తుఫానులో రికార్డులు పోయాయంటూ, ఎంపీడీఓ అపీల్‌దారు కోరిన సమాచారం ఇవ్వనందున సంబంధిత జిల్లా అధికారిని విచారణ చేపట్టి నివేదిక సమర్పించాలని ఆదేశించారు. విశాఖ జిల్లా శృంగవరపుకోటకు చెందిన భూములకు సంబంధించి సివిల్‌ డిస్ప్యూట్‌ పరిష్కారం నిమిత్తం కోర్టుకు వెళ్లాలని కమిషనర్‌ సూచించారు. రామాపురం పంచాయతీ కార్యదర్శి అపీల్‌ విచారణకు హాజరుకానందున అప్పీలెంట్‌కు అతని జీతం నుంచి నష్టపరిహారం చెల్లించాలని, ఎంపీడీఓకు షోకాజ్‌ నోటీసు ఇవ్వాలని సూచించారు. విజయనగరం జిల్లా ఆలూరు మండలంలో ప్రజా ఆరోగ్యం గురించి ప్రజాప్రయోజనాల దృష్ట్యా సంబంధిత డీపీఓకు దరఖాస్తు చేయగా, ఎటువంటి సమాచారం ఇవ్వనందున ఆలూరు ఈఓపీఆర్‌డీ, విజయనగరం డీఎంహెచ్‌ఓ విచారణ చేసి నివేదిక సమర్పించాలని ఆదేశించారు. ఈ కార్యక్రమంలో విశాఖపట్నం, విజయనగరం జిల్లాల పంచాయతీరాజ్, రెవెన్యూశాఖల అధికారులు పాల్గొన్నారు. 
  


  రాష్ట్ర సమాచార హక్కు చట్టం కమిషనర్ విజయబాబు
  
 తిరుపతి : సమాచార హక్కు చట్టం ప్రజల చేతిలో ఆయుధం లాంటిదని రాష్ట్ర సమాచార హక్కు చట్టం కమిషనర్ పి.విజయబాబు పేర్కొన్నారు. తిరుపతి కార్పొరేషన్‌లోని వైఎస్సార్ సమావేశ మందిరంలో శుక్రవారం రాయలసీమ జిల్లాలతో పాటు నెల్లూరు జిల్లాకు చెందిన మున్సిపల్, పంచాయతీరాజ్ శాఖకు సంబంధించిన కేసులపై విచారణ చేపట్టారు.
 
 ఆయన మాట్లాడుతూ సమాచార హక్కుచట్టం పేదలకు అండగా నిలుస్తుందని తెలిపారు. తనకు కావాల్సిన సమాచారాన్ని తెలుసుకునేందుకు ఈ చట్టం దోహదపడుతుందని పేర్కొన్నారు. పిటిషనర్ అడిగిన సమాచారాన్ని 30 రోజుల్లోపు కచ్చితంగా అదించాల్సిన బాధ్యత సంబంధిత అధికారులపై ఉందని చెప్పారు. సమాచారం ఇవ్వని వారిపై చట్టపరమైన చర్యలు ఉంటాయన్నారు. సమాచార హక్కు చట్టాన్ని ప్రజల కు చేరువ చేయడంలో పౌర సంఘాలు చురుకైన పాత్ర పోషించాలని అన్నారు. సమాచార చట్టాన్ని మరింత పటిష్టం చేసేం దుకు కమిషన్ చర్యలు చేపట్టిందన్నారు. తొలిరోజు విచారణలో మొత్తం 40 కేసులను పరిష్కరించారు. మరి కొన్నింటిపై షోకాజ్ నోటీసులను జారీ చేశారు. అనంతపురం జిల్లా కల్యాణ దుర్గం మున్సిపల్ కమిషనర్ గైర్హాజరుపై ఆయన ఆగ్రహం వ్యక్తం చేశారు. ఈ కార్యక్రమంలో తిరుపతి కార్పొరేషన్ అదనపు కమిషనర్ శ్రీదేవి, దినేష్‌బాబు, అనంతరెడ్డి, రాయలసీమ జిల్లాలు, నెల్లూరు జిల్లాల మున్సిపల్, పంచాయతీరాజ్ శాఖ అధికారులు పాల్గొన్నారు.