‘‘శ్రీరామరక్ష’ చిత్రం టీజర్ చూస్తుంటే ‘సీతారామయ్యగారి మనవరాలు’ సినిమా చూస్తున్నప్పటి  ఫీలింగ్ కలిగింది. టైటిల్ చక్కగా ఉంది. అందుకు తగ్గట్టే చిత్ర యూనిట్‌కు శ్రీరాముని ఆశీస్సులుండాలి’’ అని హీరో సునీల్ అన్నారు. రజిత్, షామిలి, నిషా, విజయ్‌కుమార్, షఫీ, జ్యోతి ముఖ్య పాత్రల్లో రాము దర్శకత్వంలో వశిష్ఠ సినీ అకాడమీ పతాకంపై ప్రభాత్ వర్మ నిర్మించిన చిత్రం ‘శ్రీరామ రక్ష’.
 
 ఈ చిత్రం టీజర్‌ను హీరో సుధీర్‌బాబు, ఓ పాటను సునీల్ విడుదల చేశారు. నిర్మాత మాట్లాడుతూ- ‘‘తాత- మనవడి బంధం ఇందులో హైలెట్. అన్నివర్గాల ప్రేక్షకులకూ నచ్చేలా తీర్చిదిద్దాం’’ అన్నారు. ఈ చిత్రానికి సంగీతం: సాబూ వర్గీస్, కెమెరా: ఎస్. మురళీమోహన్ రెడ్డి, సహ నిర్మాతలు: గమిడి సత్యం, పి.వి. రంగరాజు.


 ఈజీ మనీ కోసం సంఘ విద్రోహ చర్యలకు పాల్పడే వారిని ఎలా ఎదుర్కోవాలన్న కథాంశంతో వస్తున్న చిత్రం ‘ఈజీ మనీ-లేజీ బాయ్స్’. మనోజ్‌నందం, షామిలీ జంటగా వెంకట్ పంపన దర్శకత్వంలో వెంకట నాగప్రసాద్ నిర్మించారు. చిత్రీకరణ పూర్తయింది. దర్శకుడు మాట్లాడుతూ -‘‘అన్ని వర్గాల ప్రేక్షకులను తప్పకుండా ఆకట్టుకుంటుంది. ఏప్రిల్ మొదటి వారంలో పాటలను, చివరివారంలో సినిమాను విడుదల చేస్తాం’’ అని తెలిపారు. ఈ చిత్రానికి కెమెరా: ప్రకాశ్ పిండి, సహ నిర్మాత: శ్రీనివాస్ గాధం, సమర్పణ: శ్రీమతి మాలతి వైట్ల.