ధనుష్‌తో ఢీ కొట్టడానికి సిద్ధమవుతున్నాడు నవ నటుడు షణ్ముగపాండియన్. సీనియర్ నటుడు, డీఎండీకే నేత విజయకాంత్ వారసుడైన ఈ నూతన నటుడు సగాబ్దం చిత్రం ద్వారా హీరోగా తెరంగేట్రం చేస్తున్నాడు. కెప్టెన్ సినీ క్రియేషన్స్ పతాకంపై ఎల్‌కె సుదీష్ నిర్మిస్తున్న ఈ చిత్రం ద్వారా సురేంద్రన్ దర్శకుడిగా పరిచయమవుతున్నారు. బాలీవుడ్ బ్యూటీ నేహా హింగే హీరోయిన్‌గా పరిచయమవుతున్న ఈ చిత్రానికి కార్తీక్‌రాజా సంగీతాన్ని అందిస్తున్నారు. చాలా గ్యాప్ తరువాత ఈయన సంగీతం అందిస్తున్న చిత్రం ఇది.
  
  చిత్ర షూటింగ్ పూర్తి చేసుకున్న సగాబ్దం చిత్రం ఆడియో ఆవిష్కరణ కార్యక్రమం ఈ నెల 31న నిర్వహించనున్నట్లు చిత్ర యూనిట్ వర్గాలు వెల్లడించారు. సూపర్‌స్టార్ రజనీకాంత్ ముఖ్య అతిథిగా పాల్గొననున్నట్లు కోలీవుడ్ సమాచారం. ఈ చిత్రాన్ని ప్రేమికులరోజు సందర్భంగా ఫిబ్రవరి 14న విడుదల చేయనున్నట్లు అధికారిక పూర్వకంగా చిత్ర నిర్మాత ప్రకటించారు. ఫిబ్రవరి 13న ధనుష్ నటించిన అనేగన్ చిత్రం తెరపైకి రానుంది. దీంతో నవ నటుడు షణ్ముగపాండియన్, ధనుష్‌తో ఢీ కొననున్నారన్నమాట.