పనాజీ: గోవాలో బస్సు బీభత్సం సృష్టించింది. అతి వేగంతో వెళ్తూ అదుపుతప్పిన బస్సు రోడ్డు పక్కనున్న గుడారాల్లోకి దూసుకెళ్లింది. శనివారం(మే25) రాత్రి పనాజీకి దక్షిణాన 25 కిలోమీటర్ల దూరంలో ఉన్న వర్నా పారిశ్రామిక ప్రాంతంలో ఈ ప్రమాదం జరిగింది. ప్రమాదంలో గుడారాల్లో నిద్రిస్తున్న నలుగురు మృతి చెందారు. మరో ఐదుగురు తీవ్రంగా గాయపడ్డారు. గాయపడ్డవారి పరిస్థితి విషమంగా ఉన్నట్లు తెలుస్తోంది. మృతి చెందిన వారు నలుగురు దినసరి కూలీలని పోలీసులు తెలిపారు. ప్రమాదం జరిగినపుడు మొత్తం మూడు గుడారాల్లో తొమ్మిది మంది ఉన్నారు. రోడ్డు పనులు చేయడం కోసం కూలీలు బీహార్‌ నుంచి వచ్చినట్లు తెలిసింది. ఒక కంపెనీ ఉద్యోగులకు చెందిన బస్సు ఈ ప్రమాదానికి కారణమైంది. ప్రమాదం కారణంగా బస్సులో ఉన్నవారెవరికీ ఏమీ కాలేదు.


 ముంబై: చెట్టు కూలి ఇంటిగోడపై పడటంతో నలుగురు మృతిచెందిన ఘటన ముంబైలోని శాంటాకర్జ్, వకోలా ప్రాంతంలో సోమవారం చోటుచేసుకుంది. శాంటీస్ ఇంటి గోడను పగలకొడుతుండగా చెట్టు ఒక్కసారిగా కూలి పడింది. ఆ సమయంలో పనిచేస్తున్న వారిపై  చెట్టు విరిగి పడటంతో నలుగురు మృతిచెందగా, ఐదుగురు గాయపడ్డారు.
 
 సమాచారం అందుకున్న ఫైర్ సిబ్బంది ఘటనా స్థలికి చేరుకుని గాయపడ్డవారిని చికిత్స నిమిత్తం దగ్గరలోని మున్సిపల్ ఆస్పత్రులకు తరలించారు. కాగా, ఈ ప్రాంతంలో గత వారం నుంచి తరుచుగా వర్షాలు పడుతున్నాయని మున్సిపల్ అధికారులు పేర్కొన్నారు.