ఒక్కో హీరో కెరీర్‌లో ఒక్కో సినిమా ఉంటుంది... కెరీర్‌ను మలుపు తిప్పిన సినిమా. జనం మనసు దోచి, బాక్సాఫీస్‌ను కొల్లగొట్టిన సినిమా. కాలం మారినా... మరపురాని సినిమా. ఆంధ్రుల అందాల నటుడిగా, ఇద్దరు హీరోయిన్ల ముద్దుల ప్రియుడిగా చరిత్ర సష్టించిన హీరో శోభన్‌ బాబు కెరీర్‌లో అలాంటి ఓ స్పెషల్‌ సినిమా ‘సోగ్గాడు’. అది ఎంత స్పెషల్‌ అంటే, ‘వెండితెర సోగ్గాడు’ అంటే శోభన్‌ బాబే అనేటంతగా స్పెషల్‌. సరిగ్గా 45 ఏళ్ళ క్రితం 1975 డిసెంబర్‌ 19న రిలీజైన ‘సోగ్గాడు’ చిత్రంలోని ఉర్రూతలూపిన పాటలు, బాక్సాఫీస్‌ను ఊపేసిన వసూళ్ళు ఇవాళ్టికీ ఓ చెరిగిపోని చరిత్రే! గ్రామీణ నేపథ్యంలోని ఓ కథ గ్రామాలు, పట్టణాలు అనే తేడా లేకుండా అన్ని కేంద్రాలలో విజయఢంకా మోగించడం విశేషమే. శోభన్‌ బాబు హీరోగా, సురేష్‌ ప్రొడక్షన్స్‌ పతాకంపై ప్రముఖ నిర్మాత డి. రామానాయుడు అందించిన అలాంటి బాక్సాఫీస్‌ విశేషం ‘సోగ్గాడు’. ఊరంతా సోగ్గాడుగా పిలిచే శోభనాద్రి (శోభన్‌ బాబు), అతని మరదలు (జయసుధ), అనుకోకుండా నగరంలోని హోటల్‌ రూమ్‌లో అతను పెళ్ళాడిన అమ్మాయి (జయచిత్ర) మధ్య నడిచే కథ ఇది. కృష్ణాజిల్లా కోలవెన్ను, ఈడ్పుగల్లు, అలాగే రామానాయుడు తన స్వగ్రామం కారంచేడులో తొలిసారిగా షూటింగ్‌ చేసిన ఈ చిత్రం అప్పట్లో ఓ సెన్సేషనల్‌ హిట్‌. నిజజీవితంలోని తన బాబాయిని అనుకరిస్తూ, కోరమీసం, పంచెకట్టుతో, ఎడ్లబండి నడుపుతూ, ‘తస్సాదియ్యా’ అనే ఊతపదంతో ఆ రోజుల్లో శోభన్‌ బాబు చేసిన నటన, జయసుధ, జయచిత్రల గ్లామర్‌ అండగా ఆబాలగోపాలాన్ని అలరించిన సినిమా ఇది. స్టార్‌ డమ్‌ తెచ్చిన సూపర్‌ హిట్‌: శోభన్‌ బాబు కబడ్డీ ఆటగాడుగా కనిపించే ఈ చిత్రం అప్పట్లో ఎదురులేని ప్రజాదరణతో అఖండ విజయం సాధించింది. ‘సోగ్గాడు’ రిలీజవడానికి సరిగ్గా వారం ముందు... 1975 డిసెంబర్‌ 12న ఇదే చిత్ర దర్శకుడు కె. బాపయ్య డైరెక్షన్‌లోనే పెద్ద ఎన్టీఆర్‌ నటించిన ‘ఎదురులేని మనిషి’ వచ్చింది. వైజయంతీ మూవీస్‌ బ్యానర్‌పై నిర్మాత అశ్వినీదత్‌కు అదే తొలి సినిమా. ఎన్టీఆర్‌ను ఓ కొత్త పంథాలో చూపించిన ఆ సినిమా ఓ పక్కన ఆడుతుండగానే, సీనియర్‌ టాప్‌ హీరోతో పోటాపోటీగా శోభన్‌ బాబును నిలిపింది ‘సోగ్గాడు’. థియేటర్లలో విజయఢంకా మోగించిన ఈ చిత్రం విడుదలైన అనేక కేంద్రాలలో విజయ విహారం చేస్తూ, వసూళ్ళలో నూతన అధ్యాయం çసృష్టించింది. బాక్సాఫీస్‌ వద్ద కొత్త రికార్డులు నెలకొల్పింది. విడుదలైన 31 కేంద్రాలలో 50 రోజుల పండగ జరుపుకొంది. 19 కేంద్రాలలో వందల రోజుల పైగా ఆడింది. శోభన్‌ బాబు కెరీర్‌లో అత్యధిక కేంద్రాలలో శతదినోత్సవం జరుపుకున్న చిత్రం ఇదే. వెరసి... సరికొత్త స్టార్‌ హీరోగా శోభన్‌ బాబు అవతరించడానికి తోడ్పడింది. తమిళ స్టార్‌ శివాజీగణేశన్‌ ముఖ్య అతిథిగా చిత్రయూనిట్‌ అంతా పాల్గొనగా, విజయవాడలో వందరోజుల వేడుక జరుపుకొన్న ఈ చిత్రం బాపయ్యను కూడా దర్శకుడిగా మరో మెట్టు పైన పెట్టింది. దర్శకులు బాపయ్య, కె. రాఘవేంద్రరావు కజిన్స్‌. గమ్మత్తేమిటంటే, ఈ సినిమా షూటింగ్‌ సమయంలో రాజమండ్రిలో బాపయ్య మరో యూనిట్‌తో బిజీగా ఉండడంతో, రాఘవేంద్రరావు స్వయంగా హైదరాబాద్‌లో కొన్ని షాట్లు, ఇండోర్‌ సీన్లు తీసిపెట్టారు. కెరీర్‌ బెస్ట్‌ ఇయర్‌: నిజానికి, శోభన్‌ బాబు కెరీర్‌లోనే ఓ మరపురాని సంవత్సరం – 1975. ఆ ఏడాది శోభన్‌ బాబు సినిమాలు ఏకంగా 8 రిలీజయ్యాయి (‘దేవుడు చేసిన పెళ్ళి, అందరూ మంచివారే, బాబు, జీవనజ్యోతి, బలిపీఠం, జేబుదొంగ, గుణవంతుడు, సోగ్గాడు’). వాటిలో 5 సూపర్‌ హిట్లు. అలా ఆ ఏడాది శోభన్‌ బాబుకు బాగా కలిసొచ్చింది. ఆయన స్టార్‌ అయిపోయారు. ఒకే ఏడాది ‘జీవన జ్యోతి, సోగ్గాడు’– ఈ రెండు సూపర్‌ హిట్లతో శోభన్‌బాబు ఇమేజ్‌ తార స్థాయికి చేరింది. ఈ సినిమాతోనే నటి జయచిత్ర తెలుగు తెరకు హీరోయిన్‌గా పరిచయమయ్యారు. అప్పటికి వర్ధమాన నటి అయిన జయసుధ హీరో మరదలిగా సినిమాలో ఓ కీలక పాత్ర పోషించారు. తమిళ రచయిత బాలమురుగన్‌ అందించిన కథకు మోదుకూరి జాన్సన్‌ మాటలు, కె.వి. మహదేవన్‌ సంగీతంలో ఆచార్య ఆత్రేయ పాటలు ఆకట్టుకున్నాయి. గమ్మత్తేమిటంటే, నిజానికి ఈ చిత్రాన్ని నాగిరెడ్డి వారసుల విజయ కంబైన్స్, రామానాయుడు సురేష్‌ ప్రొడక్షన్స్‌ సంయుక్తంగా సమర్పించినట్టు సినిమా టైటిల్‌ కార్డుల్లో ఉన్నా, పోస్టర్లు, పబ్లిసిటీలో మాత్రం విజయా కంబైన్స్‌ పేరు కనిపించదు. ఈ తెలుగు సూపర్‌ హిట్‌ను ఆ తరువాత హిందీలో జితేంద్ర, రేఖ జంటగా ‘దిల్‌ దార్‌’ పేరిట రీమేక్‌ చేశారు. అందరూ కోరిన అందాల నటుడు: ఆ రోజుల్లో ఎక్కడ విన్నా... మహదేవన్‌ బాణీల్లోని ‘సోగ్గాడు’ పాటలే. ‘సోగ్గాడు లేచాడు చూసి చూసి నీ దుమ్ము దులుపుతాడు...’ పాట వస్తూ ఉంటే, మాస్‌లో ఓ హిస్టీరియా. ఫ్యాన్స్‌ అయితే, తమ అభిమాన హీరో బాక్సాఫీస్‌ వద్ద జూలు విదిలించి, రికార్డుల దుమ్ము దులుపుతున్నాడని కేరింతలు కొట్టారు. ఈ సినిమాలోని ‘ఏడుకొండలవాడా వెంకటేశా.. ఓరయ్యో ఎంతపని చేశావు తిరుమలేశా’ అనే పాట రేడియోలో కొన్నేళ్ళు ఓ అభిమాన జనరంజక గీతం. అలాగే, ‘అవ్వా బువ్వా కావాలంటే అయ్యేదేనా అబ్బాయి’ పాట. ‘చలివేస్తోంది... చంపేస్తోంది...’ పాట కుర్రకారు మదిలో గిలిగింతలు పెట్టింది. ‘సోగ్గాడు’తో పతాక స్థాయికి చేరిన ఇమేజ్‌తో... పెళ్ళి కావాల్సిన అమ్మాయిలకు ఇలాంటి అబ్బాయి కావాలనే కోరిక పుట్టింది. కన్నవాళ్ళకు అలాంటి కొడుకు కావాలనే ప్రేమ వచ్చింది. తోడబుట్టినవాడు శోభన్‌ బాబు లాంటి తమ్ముడైతే బాగుండనే అభిమానం వెల్లువెత్తింది. ఆ తరువాత దాదాపు రెండు దశాబ్దాల పాటు ఇద్దరు ప్రేయసుల మధ్య నలిగే అందాల నటుడిగా శోభన్‌ బాబు తెలుగుతెరను ఏలారు. అదీ ‘సోగ్గాడు’గా శోభన్‌బాబు చేసిన మేజిక్‌. – రెంటాల జయదేవ  


 దర్శకుడిగా రెండు విజయాలు అందుకున్న అవసరాల శ్రీనివాస్, నటుడిగానూ అదే జోరు చూపిస్తున్నాడు. ఇప్పటికే కామెడీ, క్యారెక్టర్ రోల్స్తో ఫుల్ బిజీగా ఉన్న అవసరాల శ్రీనివాస్ త్వరలోనే హీరోగా కూడా ఎంట్రీ ఇవ్వబోతున్నాడు. బాలీవుడ్లో తెరకెక్కిన అడల్ట్ కామెడీ 'హంటర్' సినిమా తెలుగు రీమేక్తో హీరోగా మారుతున్నాడు అవసరాల శ్రీనివాస్.
 
 ఓ కుర్రాడి సెక్సువల్ ఫాంటసీలకు సంబంధించిన కథతో తెరకెక్కుతున్న ఈ సినిమా అభిషేక్ పిక్చర్స్ సంస్థ నిర్మిస్తోంది. ఈ సినిమాకు సోగ్గాడు అనే టైటిల్ను పరిశీలుస్తున్నారట. 70లలో శోభన్ బాబు, జయసుథ హీరోయిన్లుగా తెరకెక్కిన సూపర్ హిట్ సినిమా టైటిల్ సొగ్గాడు. తరువాత అదే టైటిల్ తోతరుణ్ హీరోగా ఓ సినిమా తెరకెక్కిన ఆకట్టుకోలేకపోయింది.
 
 ఇప్పుడు మరోసారి అదే టైటిల్ తో ఆడియన్స్ ముందుకు వస్తున్నాడు అవసరాల శ్రీనివాస్. యాంకర్ శ్రీముఖి, మిస్తీ చక్రవర్తిలతో పాటు మరో ఇద్దరు హీరోయిన్లు ఈ సినిమాలో నటించనున్నారు. ఇప్పటికే కమెడియన్గా, దర్శకుడిగా సక్సెస్ అయిన అవసరాల శ్రీనివాస్, ఈ సినిమాతో హీరోగానూ హిట్ కొడతాడేమో చూడాలి.


 నగరంతో రామానాయుడుకు విడదీయరాని అనుబంధం
 ప్రతి సినిమా బాక్స్‌కు దుర్గమ్మ సన్నిధిలో, దాసాంజనేయ ఆలయంలో పూజలు
 కోలవెన్ను వినాయకుడిపైనా మక్కువ ఎక్కువే..  అక్కడే సోగ్గాడు షూటింగ్
  
 విజయవాడ కల్చరల్/ కంకిపాడు/ భవానీపురం : తెలుగు సినిమా చరిత్రలో ఒక అధ్యాయం ముగిసింది. జిల్లాతో విడదీయలేని అనుబంధం గల ఒక దిగ్గజం దివికేగింది. ప్రతి అపజాయాన్ని విజయానికి మెట్లుగా మార్చుకుని సినీప్రపంచంలో ఎవరికీ అందనంత ఎత్తుకు ఎదిగిన మూవీ మొఘల్.. ఇటీవల కాలం వరకు తన ప్రతి చిత్రం విడుదలకు ముందు మెట్లమార్గంలో నడిచి వెళ్లి దుర్గమ్మను దర్శించుకునేవారు. సినిమా బాక్స్‌లను కూడా ఆయన మోసుకెళ్లి అమ్మవారి చెంత ఉంచి పూజలుచేయించేవారు. మాచవరంలోని దాసాంజనేయ స్వామి ఆలయంపైనా దగ్గుబాటి రామానాయుడుకు అచంచల విశ్వాసం. తాను నిర్మించిన సినిమా బాక్సులకు మాచవరంలోని దాసాంజనేయ స్వామి దేవస్థానంలో పూజలు చేయిస్తే విజయం లభిస్తుందని నమ్మేవారు. నగరంలోని మమత హోటల్ కూడా ఆయన బాగా సెంటిమెంట్. ఆయన ఇక్కడికి వచ్చినప్పుడు ఎక్కువసార్లు ఆ హోటల్‌లోని ఒకే గదిలో ఉండేవారు. నగరంలో ఉన్న తన బంధువులైన విజయ ఫిలిమ్స్ అధినేతలు సురేటి వెంకటరత్నం, రాజేంద్రప్రసాద్‌ల నివాసానికి కూడా వెళ్లి వారి యోగక్షేమాలు తెలుసుకునేవారు. మరో బంధువు సురేటి శాంతాదేవి నివాసానికి కూడా పలుమార్లు వచ్చారు.నగరంలోని పలువురు ప్రముఖులు ఆయనతో సన్నిహితంగా మెలిగేవారు. సురేష్ ప్రొడక్షన్స్ కార్యాలయంలో రామానాయుడు చిత్ర పటం వద్ద ఉద్యోగులు, అభిమానులు ఘన నివాళి అర్పించారు.
 
 కామినేనితో బంధుత్వం : రాష్ట్ర వైద్య, ఆరోగ్య శాఖ మంత్రి డాక్టర్ కామినేని శ్రీనివాస్‌కు రామానాయుడుకు మధ్య దగ్గర బంధుత్వం ఉంది. రామానాయుడు చిన్న కుమారుడు, సినీ హీరో వెంకటేష్‌కు కామినేని అక్క ఉషారాణి చిన్న కుమార్తె నీరజను ఇచ్చి వివాహం చేశారు. ఆయన అనేకసార్లు కామినేని స్వగ్రామమైన కైకలూరు మండలం వరహాపట్నం గ్రామానికి వచ్చారు.
  
 కోలవెన్నుతో ప్రత్యేక అనుబంధం
 
 డాక్టర్ రామానాయుడుకు కంకిపాడు మండలం కోలవెన్ను గ్రామంతో ప్రత్యేక అనుబంధం ఉంది. శోభన్‌బాబు నటించిన ‘సోగ్గాడు’, జితేంద్ర, రేఖ నటించిన దిల్‌దార్ చిత్రాలను రామానాయుడు ఈ గ్రామంలో చిత్రీకరించారు. గ్రామానికి చెందిన వెంకటరత్నం నివాసంలో నెల రోజులపాటు ఉండి 1975లో సోగ్గాడు చిత్రాన్ని నిర్మించారు. వెంకటరత్నానికి చెందిన ఎడ్ల జతను సోగ్గాడు చిత్రంలో ఎంతో అందంగా చూపి సినిమాలో ఎడ్లకు ప్రత్యేక స్థానాన్ని కల్పించారు. గ్రామంలో వేంచేసి ఉన్న వరసిద్ధి వినాయకుడి విగ్రహంపై పాటను చిత్రీకరించారు. ఆ సినిమా విజయం సాధించడంతో అప్పటి నుంచి ప్రతి సినిమా టైటిల్స్‌లోనూ ఈ వినాయకుడి విగ్రహాన్ని సెంటిమెంట్‌గా చూపిస్తున్నారు. రామానాయుడు మరణవార్త కోలవెన్ను వాసులను కలచివేసింది. నాటి జ్ఞాపకాలను గుర్తుచేసుకుని పలువురు సంతాపం తెలిపారు. సినీ నిర్మాత, పీఏసీఎస్ అధ్యక్షుడు అడుసుమిల్లి వెంకటేశ్వరరావు (పసిబాబు), నకిరికంటి శేఖర్ సంతాపం తెలిపినవారిలో ఉన్నారు.
  
  విలువలకు ప్రాధాన్యత ఇస్తారు
 
  రామానాయుడు నాతో ఎంతో సన్నిహితంగా మెలిగేవారు. నగరానికి వచ్చిన ప్రతిసారి నా కోసం వాకబు చేసేవారు. నగరంలో గానీ, చుట్టుపక్కల గానీ సినిమా సభలు నిర్వహిం చినప్పుడు నన్నే అధ్యక్షత వహించాలని కోరేవారు. చీరాలలో 1971లో జరిగిన ఆంధ్రప్రదేశ్ ఫిల్మ్ అవార్డుల ప్రదానోత్సవ సభకు నేనే అధ్యక్షత వహించాను. ఆయనలేని తెలుగు సినిమాను ఊహించలేం. కుటుంబ బంధాలు, విలువలకు ఆయన అధిక ప్రాధాన్యం ఇచ్చేవారు.  
  - తుర్లపాటి కుటుంబరావు, సీనియర్ పాత్రికేయులు
  
  కన్నతండ్రిలా ఆదుకొనేవారు
 
  నేను 1987లో సురేష్ ఫిలిమ్స్‌లో చేరాను. అప్పటి నుంచి రామానాయుడు నిర్మించిన అన్ని సినిమాలను పంపిణీ చేశాం. విజ యవాడ వచ్చిన ప్రతిసారి తప్పక ఆఫీస్‌కు వచ్చేవారు. ప్రతి ఒక్కరినీ పేరుపేరునా పలకరించేవారు. కన్నతండ్రిలా ఆదుకొనేవారు.      
  - శ్రీరామ్, సురేష్ ఫిలిమ్స్ మేనేజర్
  
 సున్నిత మనస్కుడు
 
 రామానాయుడితో మా అనుబంధం 1953 నుంచి సాగుతోంది. ఆయనది చాలా సున్నితమైన మనసు. చాలా కష్టపడి పైకి వచ్చారు. దేవుడిని విపరీతంగా నమ్మేవారు. తాను నిర్మించిన సినిమా మొదటికాపీని విజయవాడ కనకదుర్గమ్మ, మాచవరం ఆంజనేయస్వామి ఆలయాలకు తీసుకెళ్లి ఆశీస్సులు కోరేవారు. విజయవాడ వచ్చినప్పుడల్లా హోటల్ మమతాలోని ఒకే గదిలో దిగేవారు. ఆయనకు సెంటిమెంట్ ఎక్కువ.
  - సురేటి వెంకటరత్నం
  
 బంధుప్రీతి ఎక్కువ
 
 మాది కూడా ప్రకాశం జిల్లా కారంచేడే. రామానాయుడికి బంధు ప్రీతి ఎక్కువ. నా వివాహం కూడా ఆయనే చేయించారు. విజయవాడ వచ్చినప్పుడల్లా మా ఇంటికి వచ్చేవారు. గత వారమే ఆయన్ని చూడటానికి హైదరాబాదు వెళ్లా. ఇంతలో ఇలా జరిగింది.        - సురేటి శాంతాదేవి
  
  
 ఇలా జరుగుతుందనుకోలేదు  
 
 కోలవెన్ను గ్రామంతో ఆయనకు ప్రత్యేక అనుబంధం ఉంది. చిట్టచివరి రోజుల్లో నన్ను పిలిపించారు. గ్రామానికి ఎంతో కొంత అభివృద్ధి పనుల్లో సాయపడదామనుకుంటున్నానని చెప్పారు. ఇంతలోనే ఇలా జరిగింది. ఆయన కుమారులైనా గ్రామంపై ఉన్న ఆపేక్షతో అభివృద్ధికి సహకరించాలని కోరుతున్నా.
  - తుమ్మల చంద్రశేఖర్ (బుడ్డి), సర్పంచ్, కోలవెన్ను  
  
 40 ఏళ్ల పరిచయం మాది
 
 నాకు రామానాయుడుతో 40 ఏళ్ల నుంచి అనుబంధం ఉంది. ఆయన గతంలో నగరానికి వచ్చినప్పుడల్లా మమ్మల్ని కలిసే వారు. గతంలో మాకు లీలామహల్ సినిమా హాల్ ఉండేది. ఆయన అక్కడకు వచ్చి మావాళ్లతో మాట్లాడేవారు. ఎక్కువ చర్చలు సినిమాల గురించే ఉండేవి. ఆయనతో మాకు బంధుత్వం కూడా ఉంది. దీంతో రాకపోకలు ఎక్కువగా ఉండేవి. మేము హైదరాబాద్ వెళ్లినప్పుడల్లా ఫిలిం ఛాంబర్‌లో ఆయన్ను కలిసేవాళ్లం. సినిమా రంగంలో ఆయన నిజంగానే రాజు. ఒక్క సినిమా రంగంలోనే నాలుగు విభాగాల్లో అత్యద్భుతంగా రాణించిన అరుదైన వ్యక్తి ఆయన. రామానాయుడుకు ఒంగోలులో ఒక థియేటర్ ఉండేది. దానిలో ఇంగ్లిష్ సినిమా ఆడించాలన్నది ఆయన అభిమతం. దానికి సంబంధించి సినిమాల లిస్ట్‌లు, ఇతర కార్యక్రమాలు నన్ను చూడాలని కోరారు.
  - భూపాల్ ప్రసాద్, నవరంగ్ థియేటర్ అధినేత