సాక్షి, కరీంనగర్‌: భార్య మృతిని తట్టుకోలేక ఓ వ్యక్తి బలవన్మరణానికి పాల్పడితే.. అది తట్టుకోలేక అతని తల్లి గుండె బద్ధలైంది. తిమ్మపూర్‌ మండలం నెదునూరు గ్రామంలో చోటు చేసుకున్న విషాదానికి మరో మరణం తోడయ్యింది.  భార్య మృతితో ఒంటరి జీవనం గడుపుతున్న శ్యామ్‌ సుందర్‌.. భార్య ఎక్కడైతే ఆత్మహత్యకు పాల్పడిందో అదే ప్రదేశంలో పురుగుల మందు తాగి ఆత్మహత్య చేసుకున్న ఉదంతం తెలిసే ఉంటుంది. అయితే.. కొడుకు మృతిని తట్టుకోలేక 24 గంటలు గడవకముందే అతని తల్లి సైతం ప్రాణం విడిచింది. కొడుకు అంత్యక్రియల తర్వాత ఇంటికి చేరుకున్న కనకలక్ష్మి గుండెలు అవిసేలా ఏడుస్తూ ఒక్కసారిగా కుప్పకూలింది. ఛాతీలో నొప్పి రావడంతో ఆమెను హుటాహుటిన ఆస్పత్రికి తరలించారు బంధువులు. కానీ, మార్గం మధ్యలోనే కన్నుమూసింది. కొడుకు చనిపోయిన కొద్దిగంటలకే కనకవ్వ సైతం కన్నుమూయడంతో ఊరంతా దుఃఖసాగరంలో మునిగిపోయింది.  కరీంనగర్ జిల్లా తిమ్మాపూర్ మండలం నేదునూరు గ్రామానికి చెందిన శ్యామ్ సుందర్(35) ఆర్కెస్ట్రా గాయకుడు. ఏడాది కిందట.. సిద్దిపేట జిల్లా హుస్నాబాద్ కు చెందిన శారదతో వివాహం జరిగింది. దాదాపు ఏడు నెలల కిందట..  శారద హుస్నాబాద్ లోని ఓ బహిరంగ ప్రదేశంలో చెట్టుకు ఉరేసుకొని చనిపోయింది. మనస్పర్థల కారణంగా ఆమె చనిపోయినట్లు తేలింది. అయితే.. భార్య ఎడబాటును తట్టుకోలేని భర్త శ్యాంసుందర్ తన పెళ్లి రోజునే అతని భార్య ఉరివేసుకొని చనిపోయిన చెట్టు దగ్గరికి వెళ్లి పురుగుల మందు తాగి ఆత్మహత్య చేసుకున్నాడు. అయితే.. ఆ బాధను తట్టుకోలేని తల్లి కూడా కొడుకు దగ్గరికే చేరుకుందేమో!.

చందుర్తి (వేములవాడ): ఎప్పుడో విడిపోయిన తల్లిదండ్రులను కలపడానికి ప్రయత్నించి విఫలమైన ఒక కొడుకు.. మనస్తాపంతో ఆత్మహత్యకు పాల్పడ్డాడు. ఈ సంఘటన రాజన్నసిరిసిల్ల జిల్లా చందుర్తి మండలంలో జరిగింది. ఈ విషాద ఘటనపై పోలీసులు, గ్రామస్తులు తెలిపిన వివరాలు ఇలా ఉన్నాయి. ఆశిరెడ్డిపల్లెకు చెందిన కట్కూరి ప్రశాంత్‌ (23) ఆటో నడుపుతూ జీవనం సాగిస్తున్నాడు. తల్లిదండ్రులు నర్సయ్య, నాగవ్వ పదిహేనేళ్ల క్రితం విడిపోయారు. అప్పటి నుంచి తల్లి.. అమ్మమ్మ గ్రామం వేములవాడ మండలం హన్మాజిపేటలో కూలి పనులు చేసుకుంటూ జీవిస్తోంది.  తల్లిదండ్రుల ఎడబాటుతో ఎంతో జీవితాన్ని కోల్పోయానని భావించిన కొడుకు ప్రశాంత్‌.. తల్లి వద్దకు వెళ్లి ఇంటికి రావాలని కోరాడు. ఇందుకు తల్లి నిరాకరించడంతో మనస్తాపానికి గురయ్యాడు. ఇంట్లో ఎవరూ లేని సమయంలో బుధవారం ఉరి వేసుకుని ఆత్మహత్య చేసుకున్నాడు. మృతుని తండ్రి ఫిర్యాదుతో కేసు దర్యాప్తు చేస్తున్నట్లు ఎస్‌ఐ రమేశ్‌ తెలిపారు.    

భీమడోలు(ఏలూరు జిల్లా): తల్లి వివాహేతర సంబంధం పెట్టుకుందని మనస్తాపంతో కొడుకు ఆత్మహత్యకు పాల్పడిన ఘటన భీమడోలులో శుక్రవారం జరిగింది. ఎస్‌ఐ చావా సురేష్‌ కథనం ప్రకారం.. భీమడోలు గాంధీబొమ్మ సెంటర్‌కు చెందిన దాసరి వెంకట్‌ (21) తాపీ కార్మికుడు. అతని చిన్నతనంలోనే తండ్రి మృతిచెందగా, తల్లితో కలసి ఓ అద్దె ఇంట్లో నివాసముంటున్నాడు. చదవండి: మహిళతో వెటర్నరీ అటెండర్‌ సన్నిహిత సంబంధం.. చివరికి ట్విస్ట్‌ గత కొన్నేళ్లుగా తన తల్లి వేరొక వ్యక్తితో వివాహేతర సంబంధం పెట్టుకుంది. ఎన్నిసార్లు మందలించినా ఆమె తీరు మారలేదు. శుక్రవారం తాపీ పనికి వెళ్లి మధ్యాహ్నం ఇంటికి భోజనం చేసేందుకు రాగా, ఇంట్లో తల్లి సహజీవనం చేస్తున్న వ్యక్తితో కనిపించింది. దీంతో కోపోద్రిక్తుడైన వెంకట్‌ తల్లితో గొడవ పడి బయటికి వెళ్లి మద్యం సేవించి తిరిగి వచ్చాడు. లోపలికి వెళ్లి గడియ పెట్టుకుని తల్లి చీరతో ఫ్యాన్‌కి ఉరి వేసుకున్నాడు. కొద్దిసేపటికి అతని స్నేహితుడు ఆనంద్‌ ఇంటికి రావడంతో ఆత్మహత్య విషయం వెలుగుచూసింది. కేసు దర్యాప్తు చేస్తున్నట్టు పోలీసులు చెప్పారు.   

సాక్షి, మెదక్‌: ఓ యువకుడి ప్రేమ వ్యవహారం ఇద్దరిని బలిగొంది. ప్రేమ వ్యవహారంలో మనస్తాపం చెంది యువకుడు మూడు రోజల క్రితం ఆత్మహత్య చేసుకున్నాడు. కన్న కొడుకు ఆత్మహత్య చేసుకోవడంతో తీవ్ర మనస్తాపానికి గురైన తల్లి శుక్రవారం తెల్లవారు జామున చెరువులో దూకి ఆత్మహత్య చేసుకుంది. పోలీసులు, మృతుల కుటుంబ సభ్యులు తెలిపిన వివరాలు ఇలా ఉన్నాయి. రామాయంపేటకు చెందిన కటిక శివకుమార్‌ (21) నార్సింగికి చెందిన బాలికను ప్రేమించి రెండు నెలలక్రితం పెళ్లి చేసుకున్నాడు. ఈనెల 14వ తేదీన ఆ అమ్మాయి మేజర్‌కాగా, తన ఇంటికి రావాలని  శివకుమార్‌ పలుమార్లు  ఫోన్‌చేసినా ఆమె స్పందించలేదు. దీనితో మనస్తాపానికి గురైన శివకుమార్‌ మూడు రోజలక్రితం పట్టణ శివారులో చెట్టుకు ఉరివేసుకున్నాడు. ఒక్కగానొక్క కుమారుడి మృతితో తల్లడిల్లిన  తల్లి వరలక్ష్మి (42)  మూడు రోజులుగా నిద్రాహారాలు మాని విలపించసాగింది. అందరూ నిద్రించిన తరువాత శుక్రవారం తెల్లవారుజామున పాండ చెరువులో దూకి ఆత్మహత్యకు పాల్పడింది. ఉదయం వరలక్ష్మి కనిపించకపోవడంతో కుటుంబసభ్యులు ఆమె కోసం గాలింపు చేపట్టారు. చెరువు కట్టవద్ద చెప్పులు కనిపించడంతో గజ ఈతగాళ్ల సహాయంతో చెరువులో గాలించగా ఆమె మృతదేహం లభ్యమైంది. భార్య, కుమారుడి మరణంతో భర్త లక్ష్మణ్‌ మాత్రమే మిగిలాడు. ఎస్‌ఐ రాజేశ్‌ కేసు దర్యాప్తు చేస్తున్నారు. 

రాజేంద్రనగర్‌/పహాడీషరీఫ్‌: ‘అమ్మ చావుకు ఆస్పత్రి వైద్యులే కారణం, వారి నిర్లక్ష్యం కారణంగానే అమ్మ చనిపోయింది’అని సెల్ఫీ వీడియోలో ఆరోపిస్తూ తల్లి మరణాన్ని తట్టుకోలేని ఓ యువకుడు చెరువులో దూకి ఆత్మహత్యకు పాల్పడ్డాడు. తల్లి వైద్య ఖర్చులకోసం శ్రీహరి తన స్నేహితుల వద్ద రూ.10 లక్షలు అప్పు చేసి ఆస్పత్రి బిల్లులు చెల్లించాడని, మరో రూ.3 లక్షలు చెల్లించాలని చెప్పడంతో అటు తల్లిని కోల్పోయి.. ఇటు మిగిలిన బిల్లు ఎలా కట్టాలో తెలియక శ్రీహరి ఆత్మహత్యకు పాల్పడ్డాడని బంధువులు అంటున్నారు. వివరాలిలా ఉన్నాయి.. డిగ్రీ చదువుతున్న శ్రీహరి (25) తండ్రి రిటైర్డ్‌ కానిస్టేబుల్‌ రామచంద్రయ్య, తల్లి రుక్మిణి (60)తో కలసి రంగారెడ్డి జిల్లా మైలార్‌దేవ్‌పల్లి మధుబన్‌ కాలనీలో నివసిస్తున్నాడు. వారం కిందట తల్లి రుక్మిణికి కరోనా సోకడంతో గచ్చిబౌలిలోని ఓ ప్రైవేట్‌ ఆస్పత్రిలో చేర్పించారు. పరిస్థితి విషమించడంతో శుక్రవారం మధ్యాహ్నం ఆమె మృతి చెందింది. కాగా, అంతకు కొద్ది సేపటి ముందు ఇంటికి వెళ్లి భోజనం చేసి వస్తానని చెప్పిన శ్రీహరి.. తన స్నేహితుడు సాయిని ఆస్పత్రి వద్ద ఉంచి వెళ్లాడు. అదే సమయంలో రుక్మిణి మరణవార్తను ఆస్పత్రి సిబ్బంది సాయికి చెప్పడంతో ఆ విషయాన్ని ఫోన్‌ చేసి శ్రీహరికి చెప్పాడు. అప్పటినుంచి శ్రీహరి ఆచూకీ లభ్యంకాలేదు. అయితే తన తల్లిని ఆస్పత్రి డాక్టర్లే చంపారని, వారి నిర్లక్ష్యమే తల్లిని బలితీసుకుందని ఆరోపిస్తూ అతను సెల్ఫీ వీడియో రికార్డు చేసి స్నేహితులకు పోస్ట్‌ చేశాడు. దీంతో వారు మైలార్‌దేవ్‌పల్లి పోలీసులకు సమాచారం అందించారు. పోలీసులు ఆయా ప్రాంతాల్లో వెతికినా శ్రీహరి జాడ లభించలేదు. చివరకు పహాడీషరీఫ్‌ పోలీస్‌స్టేషన్‌ పరిధిలోని ఉందాసాగర్‌ చెరువులో శనివారం మధ్యాహ్నం శ్రీహరి మృతదేహం లభించింది. ఈ ఘటనపై ఇన్‌స్పెక్టర్‌ విష్ణువర్ధన్‌రెడ్డి ఆధ్వర్యంలో పోలీసులు కేసు నమోదు చేసి దర్యాప్తు చేపట్టారు.   అటు భార్య, ఇటు కుమారుడు..   గంటల వ్యవధిలో భార్య, కుమారుడు మృతిచెందడంతో రామచంద్రయ్య కుప్పకూలాడు. కుమారుడు శ్రీహరి ఏమైపోయాడో తెలియని పరిస్థితుల్లో శనివారం మధ్యాహ్నం భార్య అంత్యక్రియలు నిర్వహిస్తున్న సమయంలో కుమారుడు కూడా మృతిచెందాడన్న వార్త విని రామచంద్రయ్య తట్టుకోలేకపోయాడు. బంధువులు అతడికి సపర్యలు చేసి ఇంటికి తీసుకువచ్చారు. ఆ తర్వాత పోలీసులు శ్రీహరి మృతదేహాన్ని అప్పగించడంతో రాత్రి దహన సంస్కారాలు పూర్తి చేశారు. 

సాక్షి ప్రతినిధి, చెన్నై: తల్లి మృతిని తట్టుకోలేక కుమారుడు, భర్తని విడిచి ఉండలేక గర్భిణి అయిన భార్య ప్రాణాలు తీసుకున్న విషాద ఘటన తమిళనాడులో జరిగింది. చెన్నై మడిపాక్కంకు చెందిన గురురాజన్, లలిత దంపతులకు మణిబాలన్‌ (35), సారథి (32) అనే ఇద్దరు కుమారులున్నారు. కొన్నేళ్ల క్రితం గురురాజన్, గత ఏడాది నవంబరులో లలిత మరణించారు. తల్లి చనిపోయిన నాటి నుంచి సారథి దిగాలు పడిపోయాడు. అతని మానసిక స్థితి కుదుటపడాలన్న ఉద్దేశంతో పెద్దలు ఐదునెలల క్రితం తల్లిదండ్రులు లేని అనాథైన ప్రశాంతి (20) అనే యువతితో వివాహం జరిపించారు. ఈనెల 12న సాయంత్రం వరకు ఇంటి తలుపులు తెరుచుకోకపోవడంతో సారథి అన్న మణిబాలన్‌కు సమాచారం ఇచ్చారు. అన్న ఎన్నిసార్లు ఫోన్‌ చేసినా దంపతులిద్దరూ తీయలేదు. పోలీసులు తలుపులు పగులగొట్టి చూడగా బెడ్‌రూములోని సీలింగ్‌ ఫ్యాన్‌కు దంపతులిద్దరూ వేర్వేరుగా ఉరివేసుకుని వేళాడుతున్నారు. మృతదేహాలున్న గదిలో దొరికిన ఉత్తరంలో దంపతులిద్దరూ ఆత్మహత్యకు గల కారణాలను ఎవరికి వారుగా రాసుకున్నారు. ‘అమ్మ మృతిని తట్టుకోలేకపోతున్నాను. అమ్మలేని ప్రపంచంలో నేను ఉండలేను. నాతోపాటూ భార్య ప్రశాంతి కూడా తనువు చాలించుకుంటోంది. మా ఆత్మహత్యకు ఎవరూ కారణం కాదు. మా అంత్యక్రియల ఖర్చుకు అవసరమైన డబ్బు నా బ్యాంకు అకౌంట్‌లో ఉంది’ అని సారథి రాసుకున్నారు.  భార్య ప్రశాంతి తన ఉత్తరంలో ‘నేను తల్లిదండ్రులు లేని అనాథను, నాకున్న ఒకేఒక బంధువు భర్త మాత్రమే. అతనికి జీవించడం ఇష్టం లేక ఆత్మహత్య చేసుకోవాలని నిర్ణయించుకున్నారు.’ అని రాసింది. పోస్ట్‌మార్టంలో ప్రశాంతి 4 నెలల గర్భవతి అని వైద్యులు తెలిపారు.

సాగుకు చేసిన అప్పులు యమపాశాలయ్యాయి. వ్యవసాయాన్నే నమ్ముకుని బతికిన రైతు కుటుంబం చితికిపోయింది.  పంటలకు చేసిన అప్పులే ఆ కుటుంబాన్ని రోడ్డునపడేలా చేశాయి. భూమిని నమ్ముకొని పంటకు పెట్టుబడిగా పెట్టిన అప్పులు కుప్పలుగా మారడంతో మనోవేదనతో పత్తి రైతు రాజమౌళి సోమవారం ఆత్మహత్య చేసుకున్నాడు. కొడుకు మృతితో తీవ్ర మనోవేదనకు గురైన తండ్రి శంకరయ్య సైతం ఇంటి ఎదుట ఉన్న చెట్టుకు ఉరివేసుకున్నాడు. ఈ ఘటన సైదాపూర్‌ మండలం బొమ్మకల్‌లో విషాదం నింపింది.     సైదాపూర్‌(హుస్నాబాద్‌): అప్పుల బాధతో పత్తి రైతు రాజమౌళి ఆత్మహత్య చేసుకోగా.. కొడుకు చనిపోయాడనే బెంగతో అతని తండ్రి శంకరయ్య ప్రాణాలు తీసుకున్న హృదయ విదారకర ఘటన మండలంలోని బొమ్మకల్‌లో జరిగింది. ఒకేరోజు తండ్రీకొడుకుల మృతితో ఆ కుటుంబం రోడ్డునపడింది. మండలంలోని బొమ్మకల్‌కు చెందిన  గొల్లప ల్లి రాజమౌళి(42) తనకున్న రెండెకరాల్లో పత్తి సాగు చేస్తున్నాడు. సాగునీటి కోసం బావి తవ్వినా, బోర్‌ వేసినా సాగునీరు లేక ఆశించినస్థాయిలో పంట ది గుబడి రాక అప్పులు పెరిగాయి. గతేడాది కూతురు వివాహం చేశాడు. దీంతో అప్పులు రూ.5లక్షలకు చే రాయి. అప్పులు తీర్చే మార్గం కనిపించకపోవడం తో కొద్ది రోజులుగా మనోవేదనకు గురవుతున్నా డు. సోమవారం వేకువజామున వ్యవసాయబావి వద్దకు వెళ్లి ఉరివేసుకుని ప్రాణాలు తీసుకున్నాడు. ఎంతకూ ఇంటికి రాకపోవడంతో తెల్లవారి బావి వద్దకు వెళ్లగా ఉరివేసుకుని కనిపించాడు. కొడుకు మృతిని తట్టుకోలేక.. సాగుకు చేసిన అప్పులు మీదపడడంతో మనోవేదనకు గురై కొడుకు ప్రాణాలు తీసుకుంటే.. అది భరించలేని తండ్రి సైతం ఆత్మహత్య చేసుకున్నాడు. కొడుకు అంత్యక్రియలు ముగించుకుని ఇంటికి వచ్చేసరికి తండ్రి గొల్లపల్లి శంకరయ్య(75) ఇంటి ఎదు రుగా చెట్టుకు ఉరేసుకొని మృతిచెందాడు. శంకరయ్య(75)కు ముగ్గురు కుమారులు. పెద్దకొడుకు బ్రహ్మచారి, రెండో కొడుకు శ్రీనివాసాచారి మంచిర్యాల జిల్లా మందమర్రిలో కార్పెంటర్‌లుగా పనిచేస్తున్నారు. చిన్నకుమారుడు రాజమౌళి బొమ్మకల్‌లోనే వ్యవసాయం చేసుకుంటున్నాడు. శంకరయ్య భార్య ఐదేళ్ల క్రితం మృతిచెందింది. శంకరయ్యకు చూపు సరిగ్గా లేదు. కొడుకు రాజమౌళి మృతితో తనను సాదేవారు లేదనే మనోవేదనకు గురైన శంకరయ్య సైతం ఆత్మహత్యకు పాల్పడ్డాడు. ఒకే రోజు తండ్రీకొడుకుల మృతితో ఆ కుటుంబం రోడ్డున పడింది. ఉదయం కొడుకు, సాయంత్రం తండ్రి మృతితో గ్రామంలో విషాదం నెలకొంది.  రైతు రాజమౌళి భార్య ఫిర్యాదుతో కేసు నమోదు చేసిన పోలీసులు దర్యాప్తు చేస్తున్నారు. 

హవానా: క్యూబా మాజీ అధ్యక్షుడు ఫిడెల్‌ క్యాస్ట్రో పెద్ద కొడుకు డియాజ్‌ బలార్ట్‌(68) శుక్రవారం ఆత్మహత్య చేసుకున్నారు. ‘ గత కొన్ని నెలలుగా డియాజ్‌ తీవ్రమైన డిప్రెషన్‌కు చికిత్సపొందుతున్నారు’ అని క్యూబా అధికార పత్రిక గ్రాన్మా తెలిపింది.  క్యాస్ట్రో మొదటి భార్య మిర్తా డియాజ్‌ బలార్ట్‌కు 1949 సెప్టెంబర్‌ 1న డియాజ్‌ జన్మించారు. డియాజ్‌ రాజకీయాల్లో లేనప్పటికీ అచ్చు తన తండ్రి కాస్ట్రో పోలికలతో  ఉండటంతో అక్కడి వారికి ఈయన ఫిడెల్‌ జూనియర్‌గా చాలా ఫేమస్‌. ఫిజిక్స్‌లో శాస్త్రవేత్త అయిన డియాజ్‌ క్యూబాలో అణుశక్తి కార్యక్రమాల అభివృద్ధిలో కీలక పాత్ర పోషించారు. చనిపోయే దాకా ఆయన క్యూబా ప్రభుత్వానికి శాస్త్రీయ సలహాదారుగా, అకాడమీ ఆఫ్‌ సైన్సెస్‌కు వైస్‌ప్రెసిడెంట్‌గా పనిచేశారు.  

నంద్యాల టౌన్‌: బెల్టుషాపు నిర్వహిస్తున్నారని తల్లిదండ్రులను ఎస్‌ఐ తన సిబ్బందితో కలిసి అందరి ముందు కొట్టడంతో మనస్తాపానికి గురైన కుమారుడు పురుగుల మందు తాగి ఆత్మహత్యకు ప్రయత్నించాడు. ఈ సంఘటన గురువారం  చోటు చేసుకుంది. బాధితుల కథనం మేరకు వివరాలిలా ఉన్నాయి. బండిఆత్మకూరు మండలం సింగవరం గ్రామానికి చెందిన ధనుంజయగౌడ్, లక్ష్మిదేవిలు బెల్టుషాపు నిర్వహిస్తున్నారని పోలీసులకు సమాచారం అందింది. దీంతో వారు ఆ గ్రామానికి వెళ్లారు. భార్యాభర్త పట్ల దురుసుగా ప్రవర్తించడమే కాకుండా దాడి చేసి కొట్టారు. మధ్యాహ్నం పాఠశాల నుంచి ఇంటికి వచ్చిన వారి కుమారుడు వెంకటేశ్వర్లుగౌడ్‌(13) తల్లిదండ్రులను కొట్టడం చూసి మనస్తాపానికి గురయ్యాడు. వెంటనే పురుగుల మందు తాగాడు.  స్థానికులు అతన్ని 108 అంబులెన్స్‌లో నంద్యాల ప్రభుత్వాస్పత్రికి తరలించారు. ఈ విషయంపై బండిఆత్మకూరు ఎస్‌ఐ విష్ణునారాయణ వివరణ ఇస్తూ బెల్టుషాప్‌ నిర్వహిస్తున్నారన్న సమాచారం మేరకు వారి ఇంటిపై దాడి చేశామన్నారు. 25మద్యం బాటిళ్లు స్వాధీనం చేసుకున్నట్లు చెప్పారు. ఈ క్రమంలో వారిని పోలీస్‌స్టేషన్‌కు తీసుకొని వెళ్లడానికి జీపులో ఎక్కాలని చెప్పగా అందుకు అంగీకరించలేదన్నారు. దీంతో బలవంతంగా స్టేషన్‌కు తరలించే ప్రయత్నం చేశామనే ఉద్దేశంతో వారు ఫిర్యాదు చేసి ఉండొచ్చని తెలిపారు. కొన్ని రోజుల క్రితమే ఎక్సైజ్‌ అధికారులు కూడా వారి ఇంటిపై దాడి చేసి మద్యం బాటిళ్లు స్వాధీనం చేసుకున్నారని, అయినా బెల్ట్‌షాపు కొనసాగిస్తుండటంతో తాము సిబ్బందితో అక్కడికి వెళ్లామని తెలిపారు. భవిష్యత్తులో పోలీసులెవరూ వారి ఇంటి వద్దకు వెళ్లకుండా ఉండాలనే ఉద్దేశంతోనే ఇలా బ్లాక్‌మెయిల్‌ చేస్తున్నారని ఆరోపించారు. 


 నార్పల: కుటుంబ కలహాలతో తల్లిదండ్రుల ఎడబాటును తట్టుకోలేని తనయుడు ఆత్మహత్య చేసుకున్నాడు. మండల కేంద్రంలోని చింతవనం కొట్టాలకు చెందిన వ్యవసాయ కూలీ హుస్సేన్, బాబావలి దంపతులు. కుటుంబ కలహాలతో వీరి మధ్య దూరం పెరిగింది. బాబావలి ధర్మవరం వెళ్లిపోయాడు. ఎన్నాళ్లయినా తమను చూసేందుకు తండ్రి తిరిగి రాకపోవడంతో కుమారుడు రజాక్‌ (18) మనస్తాపానికి గురయ్యాడు. సోమవారం ఉదయం తల్లి హుస్సేన్ బీ వ్యవసాయ పనులకు వెళ్లగానే రజాక్‌ ఇంట్లో ఉరి వేసుకుని ఆత్మహత్య చేసుకున్నాడు. తల్లి ఫిర్యాదుమేరకు పోలీసులు కేసు నమోదు చేసుకుని, మృతదేహాన్ని పోస్టుమార్టం నిమిత్తం అనంతపురం ఆస్పత్రికి తరలించారు. 


 శంషాబాద్‌: చదువుకోవడం లేదని తండ్రి మందలించడంలో మనస్తాపానికి గురై ఓ ఇంటర్ విద్యార్థి ఆత్మహత్యకు పాల్పడిన సంఘటన ఆర్‌జీఐఏ పోలీస్‌స్టేషన్ పరిధిలో చోటు చేసుకుంది. వివరాలు ఇలా ఉన్నాయి. ఆంధ్రప్రదేశ్, శ్రీకాకుళం జిల్లాకు చెందిన ఆనంద్ మండల కేంద్రంలోని రుద్రా కాలనీలో అద్దెకు నివాసముంటు స్థానికంగా కూలీ పనులు చేసుకుంటు కుమారుడు శేఖర్‌ను ఇంటర్ చదివిస్తున్నాడు.
 స్థానికంగా ప్రయివేటు కళాశాలలో ఇంటర్ ప్రథమ సంవత్సరం పూర్తి చేసిన శేఖర్ ఇటీవల వచ్చిన ఫలితాల్లో తప్పడంలో గురువారం ఉదయం తండ్రి అతడిని పిలిచి చదువుకోవాలని మందలించాడు. దీంతో మనస్తాపానికి గురైన శేఖర్ ఇంట్లో గదిలో ఫ్యాన్‌కు ఉరేసుకుని ఆత్మహత్య చేసుకున్నాడు. విషయం తెలుసుకున్న స్థానికులు పోలీసులకు సమాచారం అందించారు. ఈ మేరకు పోలీసులు కేసు నమోదు చేసుకుని దర్యాప్తు చేస్తున్నారు.


 ఖమ్మం: తండ్రి మరణాన్ని తట్టుకోలేక మనస్తాపానికి గురైన కుమారుడు ఆత్మహత్యకు పాల్పడ్డాడు. ఈ సంఘటన ఖమ్మం జిల్లా తల్లాడ మండలం నారాయణపురం గ్రామంలో బుధవారం చోటుచేసుకుంది.
 గ్రామానికి చెందిన శీలం నర్సింహారెడ్డి(55) వ్యవసాయం చేసుకుంటూ జీవనం సాగిస్తున్నాడు. ఈ క్రమంలో అనారోగ్యం బారిన పడటంతో.. ఆస్పత్రికి తరలించగా చికిత్స పొందుతూ మృతిచెందాడు. దీంతో మనస్తాపానికి గురైన ఆయన కుమారుడు నాగిరెడ్డి బుధవారం బావిలోదూకి ఆత్మహత్య చేసుకున్నాడు. ఇది గుర్తించిన స్థానికులు అతని మృతదేహాన్ని బయటకు తీసి పోలీసులకు సమాచారం అందించారు. సంఘటనా స్థలానికి చేరుకున్న పోలీసులు కేసు నమోదు చేసుకొని దర్యాప్తు చేస్తున్నారు. తండ్రీ కొడుకుల మృతితో గ్రామంలో విషాద ఛాయలు అలుముకున్నాయి.