హీరోయిన్ నయనతార జైలు జీవితం గడపడమేంటి? ఆమె అంత నేరం ఏం చేశారని కంగారు పడుతున్నారా!. ఆ కంగారు కాస్త పక్కన పెట్టేయండి. ఎందుకంటే ఆమె జైలు జీవితం గడిపింది రియల్ లైఫ్‌లో కాదులెండి! రీల్ లైఫ్‌లో మాత్రమే! ఉదయనిధి స్టాలిన్, నయనతార జంటగా ఏ. జగదీశ్ దర్శకత్వంలో తెరకెక్కిన ‘నన్‌బేన్డా’ (నీ ఫ్రెండ్‌నే అని అర్థం) తమిళంలో మంచి విజయం అందుకుంది.
  
  ఆ చిత్రాన్ని ‘గుడ్ ఈవెనింగ్’ పేరుతో భద్రకాళీ ఫిలిమ్స్ అధినేత ప్రసాద్ తెలుగు ప్రేక్షకులకు అందిస్తున్నారు. ఈ సందర్భంగా ప్రసాద్ మాట్లాడుతూ- ‘‘అష్టకష్టాలు పడి హీరోయిన్  ప్రేమను దక్కించుకుంటాడు హీరో. తాను పదిరోజుల పాటు జైలు జీవితాన్ని గడిపానని తన ఫ్లాష్‌బ్యాక్‌ను హీరోకు చెబుతుంది ఆమె.
  
  ఆ ఫ్లాష్‌బ్యాక్ లోని భయంకరమైన నిజాలేంటి? చివరకు ఏమైంది? అన్నదే చిత్ర కథాంశం. ఈ నెలలోనే పాటలు, సినిమా విడుదల చేసేందుకు సన్నాహాలు చేస్తున్నాం’’ అని తెలిపారు. సంతానం, కరుణాకరన్, శాయాజీ షిండే తదితరులు నటించిన ఈ చిత్రానికి సంగీతం: హ్యారిస్ జైరాజ్, కెమేరా: బాల సుబ్రమణ్యం, సహ నిర్మాతలు: ఏ.వెంకట్రావ్, సత్యశీతల.
  


 
 నయనానందానికి చిరునామా నయనతార అంటారు ఆమె అభిమానులు.  అందం, అభినయానికి అదృష్టం తోడైతే నయనతార. అందుకే ఆమె రెండో ఇన్నింగ్‌లోను విజయపరంపర కొనసాగిస్తున్నారు. వ్యక్తిగతంగా నయనతార ఎన్ని ఒడిదుడుకుల్ని ఎదుర్కొన్నా వృత్తిపరంగా ఎదుగుతూనే ఉన్నారు. ఇప్పటికీ స్టార్ హీరోలు ఆమెతో జతకట్టడానికి ఆసక్తి చూపుతుంటే యువ హీరోలు ఉవ్విళ్లూరుతున్నారు. తాజాగా ప్రముఖ హీరో సూర్యతోను  యువ హీరో విజయ్ సేతుపతితోను రొమాన్స్ చేస్తున్న నయనతార ఇటీవల ఇళయదళపతి విజయ్‌తో నటించే అవకాశాన్ని నిరాకరించారు ఇంతకుముందు నవ దర్శకుడు అట్లి తెరకెక్కించిన రాజారాణి చిత్రంలో ఆర్యతోను జయ్‌తో ఆడిపాడి విజయాన్ని అందుకున్న నయన ఆ దర్శకుడి తదుపరి చిత్రంలో విజయ్‌కు జంటగా నటించడానికి నో చెప్పడం చర్చనీయాంశమే కదా.
 
 మరో యువ నటుడు ఉదయనిధి స్టాలిన్‌తో జతకట్టిన నన్భేండా చిత్రం సమ్మర్ స్పెషల్‌గా విడుదలకు ముస్తాబవుతోంది. ప్రస్తుతం టుటికోరిన్‌లో సూర్యతో మాస్ స్టెప్స్ వేస్తున్నారు. వీరిద్దరూ జంటగా వెంకట్‌ప్రభు దర్శకత్వంలో నటిస్తున్న మాస్ చిత్రం షూటింగ్ టుటికోరిన్‌లో చిత్రీకరణ జరుపుకుంటోంది. యువగీత రచయిత మదన్‌కార్గి రాసిన తెరుకుత్తూ తెరుకుత్తు ఇదా కన్నా సిన్నా మాస్ అనే పాటను శోభి నృత్య దర్శకత్వంలో సూర్య, నయనతార, ప్రేమ్‌జీలో యమ మాస్ స్టెప్స్‌తో దుమ్మురేపుతున్నట్లు చిత్ర యూనిట్ వెల్లడించారు. చిన్న గ్యాప్ తరువాత నయనతారను మళ్లీ టాలీవుడ్ ఆహ్వానించిందనే ప్రచారం జరుగుతోంది. అక్కడే ప్రముఖ నటుడు బాలకృష్ణతో మరోసారి నటించడానికి ఈ బ్యూటీ సిద్ధమవుతున్నట్లు పరిశ్రమ వర్గాల టాక్.