గుమ్మఘట్ట మండలం తాళ్లకెరలో బుధవారం అశేష భక్తజనం నడుమ వీరభద్రస్వామి రథోత్సవాన్ని అంగరంగ వైభవంగా నిర్వహించారు. పలువురు పీఠాధిపతులు, వేదపండితుల ఆధ్వర్యంలో వేకువ జామునే ఆలయంలో ప్రత్యేక పూజలు నిర్వహించారు. తర్వాత స్వామి వారి ఉత్సవ విగ్రహాన్ని రాష్ట్ర వీరశైవ సంఘం అధ్యక్షులు, రాయదుర్గం మాజీ ఎమ్మెల్యే కాపు రామచంద్రారెడ్డి గ్రామస్తులతో కలసి పల్లకీలో ఊరేగింపుగా తీసుకొచ్చి రథంపై కొలువుదీర్చారు. రథోత్సవాన్ని తిలకించేందుకు చుట్టుపక్కల గ్రామాల ప్రజలతో పాటు కర్ణాటక నుంచి భక్తులు అధిక సంఖ్యలో తరలివచ్చారు. రేవణ సిద్ధేశ్వర ట్రస్ట్‌ సభ్యులు అన్నదానం తో పాటు భక్తులకు సౌకర్యాలు కల్పించారు
 
  


 గుమ్మఘట్ట: మండలంలోని తాళ్లకెరలో ఈడిగ క్రిష్టప్ప, ప్రమీలమ్మల ఏకైక కుమారుడు లేపాక్షి (10)   డెంగీ జ్వరం సోకి సోమవారం మృతి చెందాడు.  గ్రామస్తుల వివరాల మేరకు వారం రోజుల క్రితం బాలుడికి తీవ్ర జ్వరం రావడంతో కుటుంబీకులు కర్ణాటక రాష్ట్రం చెళ్లకెర ప్రభుత్వ ఆస్పత్రిలో చికిత్స కోసం తీసుకెళ్లారు. ప్లేట్‌లెట్స్‌ పడిపోవటాన్ని గమనించిన వైద్యులు బాలుడిని బెంగళూరుకు తీసుకెళ్లాలని సూచించారు. బెంగళూరులో చికిత్స పొందుతూ సోమవారం తెల్లవారుజామున మృతి చెందాడు. బాలుడు రాయదుర్గం సెయింట్‌ పాల్‌ స్కూల్‌లో నాల్గో తరగతి చదువుతున్నాడు. గ్రామంలో పారిశుద్ధ్యం లోపించి దోమలు వృద్ధి చెందడంతోనే ఇలా వ్యాధులు ప్రబలుతున్నాయని గ్రామస్తులు ఆరోపించారు.