శ్రీరామ్‌ రాఘవన్‌ దర్శకత్వంలో ఆయుష్మాన్‌ ఖురానా, రాధికా ఆప్టే, టబు ముఖ్య పాత్రల్లో నటించిన హిందీ బ్లాక్‌బస్టర్‌ చిత్రం ‘అంధాధూన్‌’. ఈ చిత్రం తమిళంలో రీమేక్‌ కాబోతుందని ఆ మధ్య వార్తలు వచ్చాయి. హీరోగా ధనుష్, సిద్ధార్థ్‌ ఇలా పలువురు పేర్లు కూడా వినిపించాయి. ఓ సందర్భంలో ‘అంధాధూన్‌’ చేయాలని చాలా ఆసక్తిగా ఉన్నానని కూడా తెలిపారు ధనుష్‌. ఇప్పుడు ‘అంధాధూన్‌’ తమిళ రీమేక్‌లో ‘జీన్స్‌’ ఫేమ్‌ ప్రశాంత్‌ నటిస్తారని తెలిసింది. ఈ హిందీ చిత్రం తమిళ రైట్స్‌ను ప్రశాంత్‌ తండ్రి, నటుడు–దర్శకుడు–నిర్మాత త్యాగరాజన్‌ సొంతం చేసుకున్నారు. ప్రశాంత్‌ నటించిన గత చిత్రం ‘జానీ’ (తమిళం) కూడా శ్రీరామ్‌ రాఘవన్‌ తెరకెక్కించిన ‘జానీ గద్దర్‌’ (హిందీ)కు రీమేకే కావడం విశేషం.

కంటెంట్‌ బాగున్న సినిమాకు ఏ ఇండస్ట్రీలో అయినా మంచి ఆదరణ లభిస్తుంది. ఈ మధ్యకాలంలో తెలుగులో విడుదలైన ఇలాంటి చిత్రాల్లో ‘జెర్సీ’ ఒకటి. అందుకే ఈ సినిమాపై ఇతర భాషల దర్శక–నిర్మాతల దృష్టి పడింది. ఆల్రెడీ హిందీలో రీమేక్‌ కానుంది. అల్లు అరవింద్, ‘దిల్‌’రాజు, సూర్యదేవర నాగవంశీ నిర్మించనున్నారు. తాజాగా తమిళ రీమేక్‌ కూడా తెరపైకి వచ్చింది. ‘జెర్సీ’ తమిళ రీమేక్‌ రైట్స్‌ను హీరో రానా దక్కించుకున్నారని టాక్‌. ఇందులో రానా నటించబోవడం లేదు. నిర్మాతగా మాత్రమే వ్యవహరించనున్నారు. ఇందులో విష్ణు విశాల్‌ తమిళ ‘జెర్సీ’ హీరోగా నటించనున్నారని తెలిసింది. రానా హీరోగా నటిస్తున్న ‘కాడన్‌’ (తెలుగులో ‘అరణ్య’) సినిమాలో విష్ణు విశాల్‌ ఓ కీలక పాత్ర చేస్తున్న సంగతి తెలిసిందే. ఈ సినిమా హిందీ వెర్షన్‌ ‘హాథీ మేరీ సాథీ’లో మాత్రం విష్ణు విశాల్‌ పాత్రను ఓ హిందీ నటుడు పోషిస్తున్నారు. అలాగే క్రికెట్‌పై విష్ణు విశాల్‌కు మంచి అవగాహన ఉందట. అందుకే  ‘జెర్సీ’ తమిళ రీమేక్‌లో విష్ణు విశాలే కన్ఫార్మ్‌ అనుకోవచ్చు.

ఏదైనా భాషలో హిట్‌ అయిన చిత్రాన్ని తమ ఆడియన్స్‌కి చూపించాలనుకుంటారు వేరే భాషల ప్రముఖులు. రీమేక్‌ చేస్తే ‘ఫ్లేవర్‌’ పోతుందనిపిస్తే అనువదించి, విడుదల చేస్తారు. లేకపోతే రీమేక్‌ చేస్తారు. ఇప్పుడు నితిన్‌ ఓ తమిళ సినిమాకు తెలుగు నేటివిటీ దట్టించి రీమేక్‌ చేయాలనుకుంటున్నారని టాక్‌. తమిళ సూపర్‌ హిట్‌ చిత్రం ‘రాక్షసన్‌’ రీమేక్‌ రైట్స్‌ను నితిన్‌ తీసుకున్నారని ఫిల్మ్‌నగర్‌ సమాచారం. విష్ణు విశాల్, అమలాపాల్‌ జంటగా నటించిన ఈ సైకో థ్రిల్లర్‌ తమిళనాట ప్రేక్షకులను థ్రిల్‌కు గురి చేస్తోంది. కథ, కథనాలు, హీరో క్యారెక్టరైజేషన్‌ నచ్చడంతో ఈ సినిమా తెలుగు రీమేక్‌లో నితిన్‌ నటించాలనుకుంటున్నారట.

తెలుగులో హిట్టయిన ‘100% లవ్‌’, ‘అర్జున్‌ రెడ్డి’ చిత్రాలు తమిళంలో రీమేక్‌ అవుతున్నాయి. ఇప్పుడీ దారిలో మరో సినిమా చేరింది. ఆ సినిమా ‘అత్తారింటికి దారేది’. త్రివిక్రమ్‌ దర్శకత్వంలో పవన్‌ కల్యాణ్‌ హీరోగా బీవీయస్‌యన్‌ ప్రసాద్‌ నిర్మించిన ఈ చిత్రం ఘనవిజయం సాధించింది. ఈ చిత్రం రీమేక్‌ రైట్స్‌ను ప్రముఖ నిర్మాణ సంస్థ లైకా ప్రొడక్షన్స్‌ దక్కించుకుంది. నవంబర్‌ 29న విడుదల కానున్న రజనీకాంత్‌ ‘2.0’ని నిర్మించింది లైకానే. ఇంకా పలు భారీ చిత్రాలను నిర్మించడంతో పాటు విడుదల కూడా చేస్తుంటుంది. ‘అత్తారింటికి దారేది’ తమిళ రీమేక్‌లో హీరోగా ఎవరు నటిస్తారు? అనేది ఇంకా ఫైనలైజ్‌ చేయలేదని సంస్థ ప్రతినిధులు పేర్కొన్నారు. అత్త పాత్రకు మాత్రం నదియానే తీసుకుంటారని ఊహించవచ్చు. ఎందుకంటే తెలుగు వెర్షన్‌లో అత్త పాత్రను ఆమె బ్రహ్మాండంగా చేసిన విషయం సినిమా చూసినవారికి గుర్తుండే ఉంటుంది.


 చిన్న సినిమాగా విడుదలై ఘనవిజయం సాధించిన సినిమా పెళ్లి చూపులు. కేవలం కోటిన్నర బడ్జెట్లో రాజ్ కందుకూరి నిర్మాతగా, తరుణ్ భాస్కర్ దర్శకత్వంలో తెరకెక్కిన ఈ సినిమాలో విజయ్ దేవరకొండ, రీతూ వర్మలు హీరో హీరోయిన్లుగా నటించారు. ఎలాంటి అంచనాలు లేకుండా ప్రేక్షకుల ముందుకు వచ్చిన పెళ్లిచూపులు 20 కోట్లకు పైగా కలెక్షన్లు సాధించి రికార్డ్ సృష్టించింది.
 
 ఈ సినిమా రిలీజ్ అయిన దగ్గర నుంచే రీమేక్ రైట్స్కు భారీ క్రేజ్ ఏర్పడింది. పలువురు టాప్ సెలబ్రిటీలు రైట్స్ కోసం ప్రయత్నించగా హిందీ రీమేక్ రైట్స్ను వశు భగ్నానీ సొంతం చేసుకున్నారు. తాజాగా తమిళ రీమేక్ రైట్స్ను కూడా స్టార్ డైరెక్టర్ గౌతమ్ మీనన్ దక్కించుకున్నారు. దర్శకుడిగానే కాక నిర్మాతగాను పలు విజయవంతమైన చిత్రాలను అందించిన గౌతమ్ మీనన్, ఈ సినిమాను తన నిర్మాణంలో మరో దర్శకుడితో రూపొందించేందుకు ప్లాన్ చేస్తున్నారు. త్వరలోనే నటీనటులు, సాంకేతిక నిపుణుల వివరాలను వెల్లడించనున్నారు.


 ఒక భాషలో హిట్ అయిన చిత్ర రీమేక్ హక్కుల కోసం గట్టి పోటీ నెలకొనడం సహజం. అలా ఇటీవల తెలుగులో చిన్న చిత్రంగా విడుదలై పెద్ద విజయం సాధించిన చిత్రం క్షణం. వైవిధ్యభరిత హారర్ కథా చిత్రంగా తెరకెక్కిన క్షణం చిత్ర విజయం కోలీవుడ్ వరకూ పాకింది. అడివి శేషు, ఆదాశర్మ జంటగా నటించిన ఈ చిత్రానికి రవికాంత్ దర్శకుడు.
  
   కాగా ఈ చిత్రం తమిళంలో రీమేక్ కానుందన్నది తాజా వార్త. దీని తమిళ రీమేక్ హక్కుల్ని యువ నుటుడు సిబిరాజ్ పొందారు. అడివి శేషు పోషించిన పాత్రను తమిళంలో సిబిరాజ్ చేయనున్నారు. ఇక ఆదాశర్మ పాత్రను పోషించే అదృష్టం దక్కించుకునే నటి ఎవరన్నది త్వరలోనే తేలనుంది. అదే విధంగా ఈ చిత్రానికి దర్శకుడు, ఇతర నటీనటులు, సాంకేతిక వర్గం ఎంపిక జరుగుతోందని తెలిసింది.
  
  ఇటీవల విడుదలైన పోకిరిరాజా చిత్రంలో విలన్‌గా విలక్షణ నటనను ప్రదర్శించిన సిబిరాజ్ ప్రస్తుతం నవ దర్శకుడు మణికందన్ దర్శకత్వంలో నటిస్తున్నారు.ఇంకా పేరు నిర్ణయించని ఈ చిత్రం షూటింగ్ శరవేగంగా జరుగుతోంది.  సిబిరాజ్ నటించిన హారర్ కథా చిత్రం జాక్సన్‌దురై నిర్మాణ కార్యక్రమాలు పూర్తి చేసుకుని త్వరలో విడుదలకు ముస్తాబవుతోంది.