‘తనిష్క్’ చోరీలో రెండో నిందితుడి అరెస్ట్‌ను చూపిన పోలీసులు
  
  సాక్షి, హైదరాబాద్: పంజాగుట్టలోని తనిష్క్ జ్యువెలరీ షో రూమ్‌లో భారీ దోపిడీకి పాల్పడిన రెండో నిందితుడు ఆనంద్‌ను అరెస్టు చేసినట్లు పశ్చిమ మండల డీసీపీ వి.సత్యనారాయణ బుధవారం వెల్లడించారు. భవనం వెనుక గోడకు వేసిన రంధ్రం ద్వారా దుకాణంలోకి ప్రవేశించి సొత్తును మూటకట్టింది ఇతడేనని గుర్తించినట్లు తెలిపారు. చోరీ సొత్తు నుంచి రెండు బంగారు గాజుల్ని విక్రయించేందుకు యత్నిస్తుండగా కలకలం రేగడంతోనే నిందితులు లొంగిపోయారని పేర్కొన్నారు. పంజాగుట్ట డిటెక్టివ్ ఇన్‌స్పెక్టర్ కె.సత్తయ్య యాదవ్‌తో కలిసి ఆయన మీడియాతో మాట్లాడారు. ఆయన తెలిపిన అంశాలివీ..
 
  - తనిష్క్ షోరూమ్‌లో చోరీ కేసులో ప్రధాన నిందితుడు ఆనంద్ అయినా సూత్రధారి, ప్రేరేపించిన వ్యక్తి కిరణ్‌కుమారే.
  -    షోరూమ్‌కు ఉన్న వెనుక పైపు ‘పాత కిటికీ’ని పగులకొట్టడానికి 3 రోజుల్లో రెండు దఫాలుగా ఆనంద్ ప్రయత్నించాడు.
  -    శనివారం తెల్లవారుజామున షోరూమ్ నుంచి రూ.5.97 కోట్ల విలువైన 851 బంగారు ఆభరణాల్ని మూడు బ్యాగుల్లో సర్దుకున్న ఆనంద్ వాటిని చిన్న సందు ద్వారా ఓ తాడు సాయంతో కిరణ్‌కు అందించగా... అతడు పెద్ద బ్యాగ్‌లో పెట్టాడు.
  -    చోరీ సమయంలో ముఖం దాచుకున్నా కంటిపాపలు సీసీ కెమెరాల్లో రికార్డైతే వాటిని విశ్లేషిస్తే దొరికిపోతామన్న ఉద్దేశంతో ప్రత్యేకంగా కళ్లజోడు ధరించాడు.
  -    తల వెంట్రుకలు రాలిపడితే డీఎన్‌ఏ ఆధారంగా గుర్తిస్తారనే భయంతో తలకు ప్రత్యేక జెల్ రాసుకున్నాడు.
  -    శని-ఆదివారాల్లో రెండు గాజులు, రెండు ఉంగరాలు అమ్మడానికి నిందితులు యత్నించారు.
  -    తమ ఇంటికి పొరుగున ఉండే పద్మ అనే మహిళ ద్వారా రెండు గాజుల్ని బేగంపేటలోని ఆనంద్ జ్యువెలర్స్ అండ్ పాన్ బ్రోకర్స్‌లో అమ్మేందుకు పంపారు.
  -    ఈ రెండు గాజులు ఒకే జతవి కాకపోవడం, అప్పటికే మీడియాలో ‘తనిష్క్’ వ్యవహారం వెలుగుచూడడంతో యజమాని వాటిని కొనేందుకు తిరస్కరించారు.
  -    దీంతో కంగుతిన్న పద్మ వెనక్కు వచ్చి ఆనంద్, కిరణ్‌లను నిలదీయడంతో ఇద్దరూ కంగారుపడ్డారు.
  -    ఈ పరిణామంతో సొత్తు అమ్మడం తేలికకాదు అని, కచ్చితంగా పోలీసులకు దొరికిపోతామనే భావన ఇద్దరికీ కలిగింది.
  -    720 గ్రాముల బరువున్న బంగారు ఆభరణాల్ని ఇచ్చి పారిపోవాల్సిందిగా కిరణ్... ఆనంద్‌కు చెప్పాడు. తర్వాత కిరణ్ మీడియా ద్వారా పోలీసులకు లొంగిపోయాడు. కిరణ్ అరెస్టు, తదనంతర పరిణామాల నేపథ్యంలో ఆనంద్ కూడా మరో మీడియా ద్వారా పోలీసులకు లొంగిపోయాడు.


 హైదరాబాద్: తనిష్క్ షోరూమ్‌లో దోపిడీకి పాల్పడిన రెండో నిందితుడు గంటినపాటి ఆనంద్ను పోలీసులు ఈ సాయంత్రం మీడియా ముందు ప్రవేశపెట్టారు. మొదటి నిందితుడు భూమన కిరణ్ కుమార్ను ఇంతకుముందే లొంగిపోయాడు. వీరిద్దరూ పథకం ప్రకారం దోపిడీ చేశారని పోలీసులు తెలిపారు.
 
 మూడుసార్లు రెక్కీ నిర్వహించి దొంగతనానికి పథకం నిర్వహించారని చెప్పారు. కిరణ్ ప్రణాళిక రచించగా ఆనంద్ అమలు చేశాడని వెల్లడించారు. స్కూ డ్రైవర్పై చేతి రుమాలు పెట్టి సుత్తితో కొట్టి గోడ బద్దలు కొట్టి లోపలికి ప్రవేశించారని తెలిపారు. కిరణ్ బయట కాపలాగా ఉండగా ఆనంద్ దుకాణం లోపలకు వెళ్లి దొంగతనం చేశాడని చెప్పారు. మూడు బ్యాగుల్లో నగలు ఎత్తుకు పోయారని చెప్పారు. అయితే  సంఘటనా స్థలంలో ఆధారాలు లభ్యం కాకుండా జాగ్రత్త పడ్డారని వెల్లడించారు. ఐరీష్ కనబడకుండా కళ్లద్దాలు, తల వెంట్రుకలు ఘటనా స్థలంలో పడకుండా జెల్ రాసుకున్నారని చెప్పారు. పోలీసు కుక్కలు గుర్తు పట్టకుండా కారప్పొడి చల్లారని తెలిపారు.
 
 చోరీ సొత్తు అమ్మడానికి, తాకట్టు పెట్టడానికి చేసిన ప్రయత్నాలు ఫలించకపోవడంతో భయపడిపోయి కిరణ్ కుమార్ లొంగిపోయాడని తెలిపారు. దీన్ని కప్పిపుచ్చుకోవడానికి కట్టుకథ అల్లాడని పేర్కొన్నారు. వేరే వాళ్ల ప్రమేయం ప్రత్యక్షంగాని, పరోక్షంగాని కనబడలేదన్నారు.


 ఈ అవసరాల కోసమే తనిష్క్‌లో భారీ చోరీ
 గుంటూరుకు చెందిన సమీప బంధువులే దొంగలు
 సొత్తుతో ఒకరి లొంగుబాటు... మరొకరు పరారీ
 రూ. 5.75 కోట్ల విలువైన 15.5 కేజీల పసిడి రికవరీ
  
  సాక్షి, సిటీబ్యూరో/గుంటూరు: పైలట్ కావాలన్న కోరిక ఒకరికి.. ఇబ్బంది పెడుతున్న పోలియోకు చికిత్స పొందాలన్న తపన మరొకరికి..! ఇద్దరూ సమీప బంధువులు. ఈ రెండు అవసరాలు తీరాలంటే వారికి కనీసం రూ. 30 లక్షలు కావాలి. తాపీ మేస్త్రీలుగా పనిచేస్తున్న తమకు అంతమొత్తం సంపాదించాలంటే బంగారు ఆభరణాల దుకాణంలో దొంగతనం చేయడమే సరైన మార్గమనిపించింది. అంతే, ముందుగా రెక్కీ నిర్వహించి ఆ తరువాత పకడ్బందీగా.. ఈ శనివారం తెల్లవారుజామున నగరంలోని పంజాగుట్టలో ఉన్న తనిష్క్ జ్యువెలరీ దుకాణాన్ని కొల్లగొట్టారు. అయితే, ఆ మరునాడు మీడియాలో వచ్చిన వార్తలు, పోలీసుల ప్రకటనలు చూసి భయపడిపోయారు. ఒకరు పారిపోగా.. మరొకరు పోలీసులకు లొంగిపోయాడు. పూర్తి వివరాలు..
  
  -   గుంటూరు జిల్లా వినుకొండ నియోజకవర్గం, ఈపూరు గ్రామానికి చెందిన భూమన కిరణ్ కుమార్(24) ఇంటర్మీడియెట్ మధ్యలో ఆపేశాడు. బతుకుతెరువు కోసం నగరానికి వలసవచ్చి అనేక ఉద్యోగాల కోసం ప్రయత్నించి విఫలమయ్యాడు. చివరకు రసూల్‌పుర ప్రాంతంలో ఓ గదిలో అద్దెకుంటూ తాపీ మేస్త్రీగా పని చేస్తున్నాడు. కిరణ్ సమీప బంధువు గంటినపాటి ఆనంద్ కూడా ఆ గదిలోనే ఉంటూ తాపీ పనే చేస్తున్నాడు. కిరణ్ మరోపక్క కొన్ని చిన్నాచితక పార్ట్‌టైమ్ ఉద్యోగాలు చేస్తున్నాడు.
  -    కిరణ్‌కు శిక్షణ తీసుకుని పైలట్ వృత్తిలో స్థిరపడాలనే ఆశ ఉంది. ఆనంద్ ఎడమకాలుకు పోలియో  ఉండటంతో దానికి వైద్యం చేయించుకుని తానూ అందరిలాగే తిరగాలని ఆశించేవాడు. ఆ అవసరాలకు దాదాపు రూ. 30 లక్షలు ఖర్చవుతుందని తెలియడంతో.. వాటికోసం వారిద్దరూ బంగారం షాపులో దొంగతనం చేయాలనుకున్నారు.
  -    రసూల్‌పురకు దగ్గర కావడంతో పంజగుట్టను టార్గెట్‌గా ఎంచుకుని నెల రోజులుగా అక్కడున్న నాలుగు బంగారం దుకాణాల వద్ద రెక్కీ నిర్వహించారు. తనిష్క్ బంగారం దుకాణానికి, దాని వెనుక ఉన్న కమర్షియల్/రెసిడెన్షియల్ కాంప్లెక్స్ ప్రహరీ గోడకు మధ్య అడుగున్నర సందు ఉండటం గమనించి.. అదే సరైన లక్ష్యమనుకున్నారు.
  -    తనిష్క్ జ్యువెలరీ షోరూమ్ నడుస్తున్న భవనం 1997-98ల్లో నిర్మించారు. 2009లో మరమ్మతుల సందర్భంగా వెనుక వైపున్న ఓ కిటికీని ఇటుకలతో మూసేశారు. దీనికి లోపలి వైపు మాత్రమే సిమెంట్‌తో ప్లాస్టరింగ్ చేయడంతో బయటకు (సందులోకి) ఇటుకలు స్పష్టంగా కనిపిస్తున్నాయి. వీటిని గమనించిన నిందితులు తేలిగ్గా లోపలకు ప్రవేశించవచ్చని నిర్ణయించుకున్నారు. ఇద్దరూ తాపీ మేస్త్రీలే అయినప్పటికీ... గోడల్ని పగులకొట్టి కరెంటు పైపులు, వాటర్ పైపులు వేయడంలో అనుభవం ఉండడంతో ఆ ప్రాంతంలో రంధ్రం చేయడం తేలికని గుర్తించారు. ఒకటి రెండుసార్లు షోరూమ్ పని చేస్తున్న వేళల్లో కస్టమర్లుగా వెళ్లి అక్కడి పరిస్థితులు గమనించారు. సెక్యూరిటీ గార్డులు సైతం అప్రమత్తంగా లేరని గుర్తించారు.
  
  -    నిజానికి బుధవారం రాత్రే వారు తమ పని ప్రారంభించారు. ఆ రోజు అర్ధరాత్రి పాత కిటికీ దగ్గరకు చేరుకున్న ఇరువురూ స్క్రూడ్రైవర్, స్పానర్ తదితరాలను వినియోగించి ఇటుకల మధ్య ఉన్న సిమెంట్‌ను కొద్దికొద్దిగా తొలగించారు. కొన్ని ఇటుకల్ని పక్కకు తీసి వెనుక ప్లాస్టరింగ్ కనిపించడంతో పని ఆపేసి ఇటుకల్ని వాటి స్థానంలో పెట్టేశారు. ఎవరికీ అనుమానం రాకూడదనే ఉద్దేశంతో ఒకరోజు గ్యాప్ ఇచ్చారు. తిరిగి శుక్రవారం అర్ధరాత్రి దాటిన తరువాత షోరూమ్ వద్దకు వచ్చిన ఇద్దరూ ఇటుకల్ని తొలగించి బ్యాటరీ సాయంతో పని చేసే చిన్న డ్రిల్లింగ్ మిషన్ సాయంతో లోపలి సిమెంట్‌ను తొలగించారు. కిరణ్ బయటే ఉండిపోగా... ఆనంద్ ఆ రంధ్రంలో నుంచి లోపలకు వెళ్లాడు. కిరణ్ నుంచి స్క్రూడ్రైవర్ తీసుకుని అనువైన కౌంటర్ల తాళాల్ని పగులకొడుతూ సొత్తును కిరణ్‌కు అందించాడు. ముఖానికి, చేతికి తొడుగులు ధరించారు. కారం పొడి కూడా తీసుకెళ్లారు.
  -   వాస్తవానికి ఇద్దరూ మొదట తమ అవసరాలు తీరడానికి రూ.30 లక్షల నుంచి రూ.40 లక్షల విలువైన సొత్తునే ఎత్తుకుపోవాలని భావించారు. అయితే లోపలకు వెళ్లిన ఆనంద్ అక్కడి బంగారాన్ని చూసి అందినకాడికి బయట ఉన్న కిరణ్‌కు అందించాడు. దాదాపు గంటకు పైగా ఈ చోరీ చేసిన తరవాత ఇద్దరూ కలిసి అదే సందులో నుంచి బయటకు వచ్చి పంజగుట్ట చౌరస్తా వరకు వెళ్లారు. అక్కడ ఆటో తీసుకుని తిరిగి షోరూమ్ మీదుగానే రసూల్‌పురలో ఉన్న తమ రూమ్‌కు వెళ్లిపోయారు.
  -    మరునాడు మీడియాలో హంగామా, పోలీసుల ప్రకటనలు చూశాక వారిలో భయం మొదలైంది. ఆనంద్ రెండు బంగారు గాజుల్ని తీసుకుని పారిపోగా... కిరణ్ ఓ ఉంగరాన్ని అమ్మి రూ.8,640 క్యాష్ చేసుకున్నాడు. మిగిలిన సొత్తు గదిలోనే బ్యాగ్‌లో ఉంచేశారు. ఆనంద్ పారిపోవడంతో పూర్తిగా భయపడిపోయిన కిరణ్ ఓ వార్తాచానెల్‌ను ఆశ్రయించి కొత్త నాటకానికి తెరలేపాడు.
  సమాజం కుళ్లిపోయిందని..!
  -    ఆ చానెల్‌తో మాట్లాడిన కిరణ్ సమాజం కుళ్లిపోయిందని, రాజకీయాలు అవినీతి మయమైపోయాయని, మనుషుల్ని మేల్కొలపడంతో పాటు సెక్యూరిటీ విధానాల్లో ఉన్న లోపాల్నీ ఎత్తిచూపడానికే ఈ చోరీ చేశానంటూ ఘనంగా ప్రకటించాడు. తానొక్కడినే దొంగతనం చేశానని, పోలీసుల్ని తప్పుదోవ పట్టించడానికే అవిటివాడిలా నటించానంటూ నమ్మబలికి ఆనంద్‌ను రక్షించే ప్రయత్నం చేశాడు. పోలీసులకూ అదే కథ చెప్పడంతో.. వారు కిరణ్‌ను అదుపులోకి తీసుకుని తమదైన శైలిలో విచారించడంతో అసలు విషయం బయటపడింది. నిందితుడిని అరెస్టు చేసిన పోలీసులు రూ.5.75 కోట్ల విలువైన 15.5 కేజీల బంగారం, రూ.8,640 నగదు స్వాధీనం చేసుకున్నారు. పరారీలో ఉన్న ఆనంద్ కోసం గాలిస్తున్నారు.
 -    లొంగిపోకపోయినా..  ఒకటి రెండు రోజుల్లో నిందితులు దొరికేవారేనని పోలీసులు చెప్పారు.  దర్యాప్తు ఒక కొలిక్కి వచ్చిందని, లొంగిపోకముందే కిరణ్‌ను ప్రధాన అనుమానితుడిగా గుర్తించామని ఒక పోలీసు అధికారి తెలిపారు.
  
  మానసికస్థితి సరిగ్గా ఉండని ఆనంద్..
  తనిష్క్ షోరూం దోపిడీలో కిరణ్‌తో పాటు పాల్గొన్న ఆనంద్ ఈపూరు నుంచి పది రోజుల క్రితమే కూలిపనికి హైదరాబాద్ వెళ్లాడు. మూడోతరగతితో చదువు ఆపేసిన ఆనంద్ చిన్నప్పట్నుంచి ఆవారాగా తిరుగుతుండే వాడని గ్రామస్తులు చెప్పారు. ఒక్కోసారి మానసిక పరిస్థితి బాగోలేక రోజులతరబడి ఎవరికీ చెప్పకుండా దూర ప్రాంతాలకు వెళ్లిపోతుండేవాడన్నారు.
  
  ఆడిటింగ్ తరవాత అసలు మొత్తం
  ‘చోరీ వెలుగులోకి వచ్చిన రోజు సంస్థ జనరల్ మేనేజర్ మణికందన్ ప్లెయిన్ గోల్డ్ ఆర్నమెంట్స్ 18 కిలోలు (విలువ సుమారు రూ.7.2 కోట్లు), కలర్ స్టోన్స్, ముత్యాలు పొదిగిన ఆభరణాలు 12 కిలోలు (విలువ సుమారు రూ.12 కోట్లు) పోయాయని ఫిర్యాదు చేశారు. ఆ తరవాత పూర్తి ఆడిట్ నిర్వహించి చోరీ అయిన సొత్తు రూ.5.98 కోట్ల విలువైన 15.57 కేజీలు మాత్రమే అని తెలిపారు. ఈ కేసులో ఒక నిందితుడిని అరెస్టు చేశాం. మరొకరి కోసం గాలిస్తూ వివిధ కోణాల్లో దర్యాప్తు చేస్తున్నాం. వివిధ సంస్థల్లో ఉన్న సెక్యూరిటీ లోపాలపై పోలీసులు కేవలం సలహాలు మాత్రమే ఇవ్వగలరు తప్ప ఆదేశాలు జారీ చేయలేరు. నిర్లక్ష్యంపై ఎలాంటి చర్యలు తీసుకోవాలో ఏ చట్టంలోనూ పేర్కొనలేదు’    
 - అనురాగ్ శర్మ, హైదరాబాద్ పోలీసు కమిషనర్
  
  రాజకీయాల్లోకి వెళ్తాననేవాడు
  ‘నా కొడుకు దొంగతనం చేశాడన్న విషయం నమ్మలేకపోతున్నాను. ఆయన వెనుక ఎవరి ప్రోద్బలమో ఉండిఉంటుంది. సంచలనం కోసం నాబిడ్డ దొంగగా ఎలా మారతాడు?’ అని ఈపూరు గ్రామం ఎస్సీ కాలనీలో నివాసం ఉంటున్న కిరణ్ తల్లి అన్నపూర్ణమ్మ ప్రశ్నించారు. ఐదుగురు అన్నదమ్ముల్లో నాల్గోవాడైన కిరణ్ తండ్రి మర ణించిన దగ్గర్నుంచి రాజకీయాల పట్ల ఆసక్తి చూపుతూ.. ఎప్పటికైనా తాను రాజకీయ నాయకుడిని అవుతాననేవాడని తెలిపారు. గ్రామంలో ఉండగా కిరణ్ తెలుగుదేశం పార్టీలో క్రియాశీలకంగా పనిచేశాడని గ్రామస్తులు తెలిపారు.