గతేడాది టి20ల్లో ఉత్తమ ప్రదర్శన కనబరిచినందుకు గానూ టీమిండియా క్రికెటర్‌ సూర్యకుమార్‌ యాదవ్‌ ఐసీసీ మెన్స్‌ టి20 క్రికెటర్‌ ఆఫ్‌ ది ఇయర్‌ అవార్డు గెలుచుకున్న సంగతి తెలిసిందే. టి20ల్లో ఇప్పటికే సూపర్‌స్టార్‌గా పేరు తెచ్చుకున్న సూర్యకుమార్‌ వన్డేల్లోనూ నిలదొక్కుకునే ప్రయత్నంలో​ ఉన్నాడు. అయితే ఆస్ట్రేలియాతో జరగనున్న బోర్డర్‌-గావస్కర్‌ ట్రోఫీ టెస్టు సిరీస్‌కు కూడా సూర్య ఎంపికయ్యాడు. ఒకవేళ​ తుదిజట్టులోకి ఎంపికైతే మాత్రం మూడు ఫార్మాట్లు ఆడిన క్రికెటర్‌గా సూర్యకుమార్‌ నిలవనున్నాడు. అయితే పరిమిత ఓవర్ల క్రికెట్‌లో పేరు తెచ్చుకున్న సూర్య టెస్టుల్లో ఏ మేరకు రాణిస్తాడనేది ఆసక్తికరంగా మారింది. ఈ నేపథ్యంలో భారత మాజీ క్రికెటర్‌ సురేశ్‌ రైనా సూర్యకుమార్‌పై ఆసక్తికర వ్యాఖ్యలు చేశాడు." కచ్చితంగా సూర్యకుమార్‌ ఆడుతున్న తీరు చూస్తుంటే.. అతడు మూడు ఫార్మాట్లలోనూ ఉండాల్సిందేనని భావిస్తున్నా. అతడు లేకపోతే మూడు ఫార్మాట్లూ ఉండవు. అతని ఆటతీరు, సంకల్పం, షాట్లు ఆడే తీరు నాకు చాలా ఇష్టం. పైగా ఎలాంటి భయం లేకుండా ఆడడం అతని నైజం. గ్రౌండ్ కొలతలను తనకు తగినట్లుగా మార్చుకోగలడు. అతడు ముంబై ప్లేయర్. రెడ్ బాల్ క్రికెట్ ఎలా ఆడాలో అతనికి తెలుసు. అతనికిది గొప్ప అవకాశం. టెస్టు క్రికెట్ ఆడటం వల్ల వన్డే టీమ్ లోనూ తన స్థానాన్ని సుస్థిరం చేసుకోగలడు. తర్వాత ఎన్నో సెంచరీలు, డబుల్ సెంచరీలు చేయగలడు" అని రైనా అన్నాడు. ఇక ఇదే చర్చలో పాల్గొన్న మరో మాజీ క్రికెటర్ ప్రజ్ఞాన్ ఓజా కూడా రైనా వ్యాఖ్యలతో ఏకీభవించాడు. "కచ్చితంగా అతడు టెస్టు టీమ్ లో ఉండాలి. సూర్య ఆడిన తీరు చూస్తే అతడు మూడు ఫార్మాట్లలోనూ ఉండాలి. ఈ ప్రశ్న ఎందుకు వస్తుందో నాకు తెలుసు. సర్ఫరాజ్ ఖాన్ ఆడుతున్న తీరు చూస్తే అదే అనిపిస్తుంది. కానీ అతనికి కూడా టైమ్ వస్తుంది. కానీ సూర్య టెస్టు టీమ్ లో ఉండటానికి 100 శాతం అర్హుడు" అని ఓజా స్పష్టం చేశాడు. ఇక ఏడాది కాలంగా ఇండియన్ క్రికెట్ లో మార్మోగుతున్న పేరు సూర్యకుమార్ యాదవ్. వేగానికి మారుపేరైన సూర్యను టెస్టులకు ఎంపిక చేయడంపై విమర్శలు వచ్చాయి. టాప్ ఫామ్ లో ఉన్న సర్ఫరాజ్ ఖాన్ బదులు సూర్యకు చోటివ్వడమేంటని మాజీ క్రికెటర్లు సహా అభిమానులు ఆగ్రహం వ్యక్తం చేశారు.  చదవండి: అభిమానులనుద్దేశించి సూర్యకుమార్‌ ఎమోషనల్‌ పోస్టు

Anil Kumble: టీ20 వరల్డ్‌కప్‌-2022 సెమీఫైనల్లో టీమిండియా ఓటమి అనంతరం భారత మాజీ కెప్టెన్‌, కోచ్‌ అనిల్‌ కుంబ్లే ఆసక్తికర వ్యాఖ్యలు చేశాడు. భవిష్యత్తులో టీమిండియా సక్సెస్‌ సాధించేందుకు తోడ్పడే కీలక ప్రతిపాదనతో ముందుకొచ్చాడు. ఇంగ్లండ్‌, ఆస్ట్రేలియా ఫాలో అవుతున్న.. '3 ఫార్మాట్లకు 3 వేర్వేరు జట్లు' అనే ఫార్ములాను టీమిండియా కూడా ఫాలో అవ్వాలని సూచించాడు. 2021లో ఆసీస్‌.. తాజాగా ముగిసిన వరల్డ్‌కప్‌ (2022)లో ఇంగ్లండ్‌ సక్సెస్‌ మంత్ర ఇదేనని పేర్కొన్నాడు. టెస్ట్‌ల్లో , పరిమిత​ ఓవర్ల క్రికెట్‌లో వేర్వేరు కోచ్‌లు, వేర్వేరు కెప్టెన్లతో ఇంగ్లండ్‌ జట్టు అద్భుత ఫలితాలు సాధిస్తున్న నేపథ్యంలో జరుగుతున్న చర్చపై కుంబ్లే తన అభిప్రాయాన్ని ఈమేరకు వెల్లడించాడు. మూడు ఫార్మాట్లకు ముగ్గురు కెప్టెన్లు, ముగ్గురు కోచ్‌లు ఉండాలని కచ్చితంగా చెప్పలేను కానీ, జట్టు మాత్రం డిఫరెంట్‌గా (ఆయా ఫార్మాట్లలో స్పెషలిస్ట్‌లతో కూడిన జట్టు) ఉంటే తప్పక సత్ఫలితాలు వస్తాయని కాన్ఫిడెంట్‌గా చెప్పాడు.   ముఖ్యంగా టీ20లకు ప్రత్యేక జట్టు చాలా అవసరమని, ఈ ఫార్మాట్‌లో హార్డ్‌ హిట్టర్లు, ఆల్‌రౌండర్లు, టీ20 స్పెషలిస్ట్‌ల పాత్ర చాలా కీలకమని, 2021 వరల్డ్‌కప్‌లో ఆస్ట్రేలియా, తాజాగా ముగిసిన వరల్డ్‌కప్‌లో ఇంగ్లండ్‌ ఈ ఫార్ములా అమలు చేసే విజయాలు సాధించాయని అభిప్రాయపడ్డాడు. ఇంగ్లండ్‌ జట్టులో లివింగ్‌స్టోన్‌, ఆసీస్‌ టీమ్‌లో స్టొయినిస్‌ లాంటి ఆటగాళ్లు 6, 7 స్థానాల్లో బ్యాటింగ్‌ చేస్తున్నారంటే, ఆయా జట్ల కూర్పు ఎలా ఉందో  ఇట్టే అర్ధమవుతుందని ఉదహరించాడు. కుంబ్లే చేసిన ఈ ప్రతిపాదనకు ఆసీస్‌ మాజీ ఆల్‌రౌండర్‌ టామ్‌ మూడీ కూడా మద్దతు పలికాడు. అన్ని జట్లు ఈ విషయం గురిం‍చి సీరియస్‌గా ఆలోచించాలని సూచిం‍చాడు. కాగా, విశ్వవిజేత ఇంగ్లండ్‌ జట్టుకు టెస్ట్‌ల్లో, పరిమిత ఓవర్ల ఫార్మాట్‌లో వేర్వేరు కోచ్‌లు, కెప్టెన్లు, జట్లు ఉన్న విషయం తెలిసిందే. ఆ జట్టుకు టెస్ట్‌ల్లో బ్రెండన్‌ మెక్‌కల్లమ్‌ కోచ్‌గా, బెన్‌ స్టోక్స్‌ కెప్టెన్‌గా వ్యవహరిస్తుండగా.. పరిమిత ఓవర్ల ఫార్మాట్‌లో మాథ్యూ మాట్‌ కోచ్‌గా, జోస్‌ బట్లర్‌ కెప్టెన్‌గా ఉన్నాడు. టీ20ల్లో మాజీ ఛాంపియన్‌ అయిన ఆసీస్‌కు టెస్ట్‌ల్లో, లిమిటెడ్‌ ఓవర్స్‌ ఫార్మాట్‌లో వేర్వేరు కోచ్‌లు లేనప్పటికీ.. కెప్టెన్లు (కమిన్స్‌, ఫించ్‌), జట్టు పూర్తిగా వేరుగా ఉంది. టీమిండియా విషయానికొస్తే.. మన జట్టు మూడు ఫార్మాట్లలో ఒకే కెప్టెన్‌ (రోహిత్‌ శర్మ), ఒకే కోచ్‌ (ద్రవిడ్‌), ఇంచుమించు ఒకే జట్టు కలిగి ఉంది. అప్పుడప్పుడు అంతగా ప్రాధాన్యత లేని సిరీస్‌లకు రెస్ట్‌ పేరుతో కెప్టెన్‌కు, కోచ్‌కు రెస్ట్‌ ఇస్తుంది. ఆ సమయంలో కోచ్‌గా ఎన్‌సీఏ డైరెక్టర్‌ వీవీఎస్‌ లక్ష్మణ్‌ కోచ్‌గా వ్యవహరిస్తుంటాడు. కెప్టెన్ల మాట చెప్పనక్కర్లేదు. రోహిత్‌ గైర్హాజరీలో ఒక్కో సిరీస్‌కు ఒక్కో ఆటగాడు కెప్టెన్‌గా పని చేశాడు. గత ఏడాది కాలంలో భారత్‌ ఏకంగా ఏడుగురు కెప్టెన్లను మార్చింది.    చదవండి: ఐపీఎల్‌ 2023కు ముగ్గురు ఆసీస్‌ స్టార్లు డుమ్మా.. దేశ విధులే ముఖ్యమంటూ..!


 డాషింగ్ బ్యాట్స్‌మన్ వీరేంద్ర సెహ్వాగ్ ఢిల్లీ క్రికెట్ జట్టుతో తన సుదీర్ఘ అనుబంధానికి ముగింపు పలికే ఆలోచనలో ఉన్నాడు. ఢిల్లీ జట్టులో కొత్త కుర్రాళ్లకు అవకాశాలు దక్కేందుకు గాను తాను మరో క్రికెట్ జట్టును ఎంచుకోవాలని భావిస్తున్నాడు. వీరూకు ఇప్పటికే పలు రాష్ట్రాల రంజీ జట్ల నుంచి ఆఫర్‌లు ఉన్నాయి. ఢిల్లీ తరఫున అత్యంత విజయవంతమైన క్రికెటర్‌గా సెహ్వాగ్‌కు పేరుంది. మూడు ఫార్మాట్లలో కలిపి 17 వేలకు పైగా పరుగులు సాధించాడు.