సాక్షి, కూడేరు: విషపురుగు కాటుకు గురై ఓ విద్యార్థి మృత్యువాత పడ్డాడు. వివరాలిలా ఉన్నాయి. ఉదిరిపికొండకు చెందిన దేవేంద్ర (17) ఇంటర్‌ చదువుతున్నాడు. బుధవారం రాత్రి ఇంటి ముందు కట్టపై నిద్రకు ఉపక్రమించాడు. రాత్రి బాగా పొద్దుపోయాక చెవి వద్ద విషపురుగు కాటేయడంతో గట్టిగా అరిచాడు. కుటుంబ సభ్యులు హుటాహుటిన ఉరవకొండ ప్రభుత్వాస్పత్రిలో ప్రథమ చికిత్స చేయించారు. పరిస్థితి విషమంగా ఉండటంతో వైద్యుల సూచన మేరకు అనంతపురం సర్వజనాస్పత్రికి తీసుకెళ్లారు. పరీక్షించిన వైద్యులు అప్పటికే దేవేంద్ర మృతి చెందినట్లు ధ్రువీకరించారు. కుటుంబ సభ్యుల ఫిర్యాదు మేరకు ఎస్‌ఐ నబిరసూల్‌ కేసు నమోదు చేశారు.    


 ►పుట్టినరోజే తిరిగిరాని లోకాలకు..
 ► కోడుమూరులో విషపురుగు కాటుతో విద్యార్థి మృతి
 
 ‘పొద్దుపొడిస్తే పుట్టిన రోజు.. పుట్టిన రోజున ఎవరెవరికి చాక్లెట్లు ఇవ్వాలి. ఎన్ని గంటలకు కేకు కట్‌ చేయాలంటూ రాత్రి ముచ్చటగొలిపే మాటలు చెబితివి..  హ్యాపీ బర్త్‌డే లే నాన్నా లే... మీ సారొళ్లు వచ్చారు.. మీ స్నేహితులు వచ్చారు.. చాక్లెట్లు పంచు.. నాన్నా’ అంటూ విగతజీవిగా మారిన ముద్దుల కుమారుడిని ఒడిలో పెట్టుకొని బేలగా బతిమాలుతూ ఆ తల్లి తల్లడిల్లిన తీరు అందరినీ కంటతడి పెట్టించింది.
 
 కోడుమూరు రూరల్‌: పట్టణంలోని చేనేత కాలనీలో ఓ విద్యార్థి విషపురుగుకాటుతో మృతి చెందాడు. వివరాలిలా ఉన్నాయి.. కాలనీకి చెందిన నాగెళ్ల శేఖర్, నాగమణి దంపతులకు కుమార్తె శ్వేత , కుమారుడు కౌసిక్‌ (11) సంతానం. కౌశిక్‌ పట్టణంలోని ఓ ప్రైవేట్‌ పాఠశాలలో 4 వతరగతి చదువుతున్నాడు. బుధవారం తన పుట్టిన రోజు కావడంతో మంగళవారమే పుట్టిన రోజుకు కావాల్సిన కొత్త దుస్తులు, కేక్, చాక్లెట్లను సిద్ధంగా ఉంచుకున్నాడు. రాత్రి యథావిధిగా తల్లిదండ్రులతో కలిసి నిద్రించాడు. బుధవారం తెలవారుజామున ఒంట్లో నలతగా ఉందంటూ తల్లిదండ్రులను నిద్రలేపాడు. వాంతులు, విరేచనాలు కావడంతో తల్లిదండ్రులు సమీపంలోని ఓ ప్రైవేట్‌ వైద్యుడి వద్దకు తీసుకెళ్లగా వైద్యుడు పరిశీలించి మందులిచ్చి పంపాడు.
 
 అయినప్పటికీ నయం కాకపోగా మరింత ఎక్కువ కావడం, నోట్లో నుంచి నురగ రావడంతో బెంబేలెత్తిన తల్లిదండ్రులు మళ్లీ వైద్యుడి వద్దకు తీసుకెళ్లారు. అయితే అప్పటికే ఆ బాలుడు మృతి చెందినట్లు వైద్యుడు చెప్పడంతో తల్లిదండ్రులు కుప్పకూలారు. విషపురుగు ప్రభావంతో ఇలా జరిగిందని వైద్యుడు నిర్ధారించాడు. తల్లి కుమారుడి మృతదేహాన్ని ఒడిలో పెట్టుకొని హ్యాపీ బర్త్‌డే నాన్న లే అంటూ రోదించిన తీరు చూపరులను కలచివేసింది. విద్యార్థి మృతితో చేనేత కాలనీలో తీవ్ర విషాదం నెలకొంది.