సాక్షి, చెన్నై: నకిలీ సర్టిఫికెట్లు చూపి అమెరికా వీసా పొందేందుకు ప్రయత్నించిన ఇద్దరు తెలుగు మహిళలు సహా నలుగురిని పోలీసులు అరెస్టు చేశారు. ఎప్పటిలాగే న్నైలోని అమెరికా రాయబార కార్యాలయంలో ఆ దేశ వీసా పొందేందుకు అనేక మంది వచ్చారు. వారిలో నలుగురు మాత్రం నకిలీ సర్టిఫికెట్లను అందజేసినట్లు అధికారులు గుర్తించారు. దీనిపై రాయబారి కార్యాలయం అధికారులు చెన్నై పోలీసు కమిషనర్‌ కార్యాలయానికి ఫిర్యాదు చేశారు. నకిలీ సర్టిఫికెట్లు ఇచ్చి వీసా పొందాలని యత్నించిన తెలంగాణకు చెందిన కృష్ణవేణి (41), కరుణశ్రీ (45) తోపాటు కన్యాకుమారికి చెందిన ధోని (46), దిలీప్‌ (26)పై చట్ట ప్రకారం చర్యలు తీసుకోవాలని అందులో కోరారు. చెన్నై సెంట్రల్‌ క్రైమ్‌ డిపార్ట్‌మెంట్‌ జాయింట్‌ కమిషనర్‌ మల్లిక పర్యవేక్షణలో పోలీసులు కేసు నమోదు చేసి విచారణ జరిపారు. అనంతరం నిందితులు కృష్ణవేణి, కరుణశ్రీ, ధోని, దిలీప్‌లను పోలీసులు అరెస్టు చేశారు. వీరిలో దిలీప్‌ పట్టభద్రుడు.  


 గుడివాడ : 
 మత్తు పదార్థాలు విక్రయిస్తున్న ఇరువురు మహిళలను అరెస్టు చేసి వారి నుంచి 6 కేజీల గంజాయి స్వాధీనం చేసుకున్నట్లు స్థానిక ఎక్సైజ్‌ సీఐ బి.వరాలరాజు తెలిపారు. మంగళవారం ఆయన విలేకరులతో మాట్లాడుతూ గంజాయి అమ్ముతున్న ఇరువురు మహిళలను నెహ్రుచౌక్‌ సెంటర్‌లో అదుపులోకి తీసుకున్నామని చెప్పారు. ముగ్గుబజారుకు చెందిన సీమసతీ చిన్నమ్మ వద్ద 4 కేజీలు, పెదఎరుకపాడుకు చెందిన షేక్‌ దేవమాత నుంచి 2 కేజీలు గంజాయిని స్వాధీనం చేసుకున్నట్లు చెప్పారు. వీరిని కోర్టులో హాజరుపర్చగా 15 రోజుల రిమాండ్‌ విధించారని తెలిపారు. మాదకద్రవ్యాలు అమ్మినా, వాటిని ప్రోత్సహించినా చట్టరీత్యా నేరమని, వారిపై కఠినచర్యలు తీసుకుంటామని హెచ్చరించారు. ఈ కార్యక్రమంలో ఎక్సైజ్‌ ఎస్సై తాతారావు, సిబ్బంది పాల్గొన్నారు.