పట్నంబజారు(గుంటూరు ఈస్ట్‌) : వాసవీకన్యకా పరమేశ్వరి అమ్మ సన్నిధిలో టీడీపీ నేతలు అరాచకానికి తెగబడుతున్నారు. ఆలయ కమిటీపై దౌర్జన్యం చేస్తున్నారు. యథేచ్ఛగా ప్రొటోకాల్‌ ఉల్లంఘిస్తూ కమిటీని పక్కనబెట్టి పెత్తనం సాగిస్తున్నారు. అయినా దేవదాయ శాఖ అధికారులు పట్టించుకోవడం లేదు. గుంటూరు నగరంలోని ఆర్‌ అగ్రహారం వాసవీ కన్యకాపరమేశ్వరి ఆలయానికి వందేళ్లపైబడి చరిత్ర ఉంది. పూర్వం నుంచి దేవస్థానం ఆధ్వర్యంలో సేవా కార్యక్రమాలు చేపడుతున్నారు. ఏటా ఆలయంలో అమ్మ ఆత్మార్పణ దినోత్సవం నిర్వహిస్తారు. ఈ ఏడాదీ ఈనెల 31న దినోత్సవం నిర్వహణకు ఏర్పాట్లు జరుగుతున్నాయి. అయితే ఈ వ్యవహారంలో తెలుగుదేశం నేతలు తలదూర్చి పెత్తనం సాగిస్తున్నారు. ఆలయ పాలక మండలితో సంబంధం లేకుండా నిర్ణయాలు తీసుకుంటున్నారు. ఆలయ అధికారులకూ విలువ ఇవ్వడం లేదు. వాసవీ క్లబ్‌ ఆధ్వర్యంలో ఆలయం ఎదుట నిత్యం జరిగే అన్నదానానికీ అడ్డుతగిలారు.వైఎస్సార్‌ సీపీ అధినేత వైఎస్‌ జగన్‌మోహన్‌రెడ్డి జన్మదినం సందర్భంగా ఆ పార్టీ ఆధ్వర్యంలో అన్నదానం చేయాలని తలంచడంతో టీడీపీ నేతలు జోక్యం చేసుకున్నారు. అన్నదానం జరగడానికి వీలు లేదని ఆపేశారు. అప్పటి నుంచి అన్నదానం జరగనీయడం లేదు. గతంలో రోజూ ఇక్కడ 300 నుంచి 400 మంది ఆకలి తీర్చుకునేవారు. పాపమని తెలిసి కూడా టీడీపీ నేతలు పేదల ఉసురుపోసుకున్నారు. అధికార లాంఛనమా..! అధికార పార్టీ లాంఛనమా..? ఆలయంలో ఆత్మార్పణ దినోత్సం పేరు చెప్పి టీడీపీ నేతలు పెద్ద ఎత్తున అక్రమ వసూళ్లకు పాల్పడుతున్నారనే ఆరోపణలు వెల్లువెత్తుతున్నాయి. నేరుగా వాట్సాప్‌ల్లో పూజల కోసం రూ.5,500 చెల్లించాలంటూ భక్తులకు మెసేజ్‌లు పెడుతున్నారు. భారీగా వసూళ్లకు తెగబడుతున్నారు. దీంతోపాటు ఆ రోజు అన్నదానం, ప్రసాదాల పంపిణీ, డెకరేషన్‌లు, ఇతరరత్రా కార్యక్రమాల పేరిట కూడా అక్రమ వసూళ్లు చేస్తున్నట్టు సమాచారం. టీడీపీ నేతల తీరుతో ఆర్యవైశ్య ప్రముఖులు విసిగిపోయారు. తీవ్ర ఆగ్రహంతో ఉన్నట్టు తెలుస్తోంది. వెంటనే టీడీపీ నేతల ఆగడాలకు ప్రజాప్రతినిధులు, దేవదాయ శాఖ అధికారులు అడ్డుకట్ట వేయాలని డిమాండ్‌ చేస్తున్నారు. వాసవీ కన్యకాపరమేశ్వరి ఆత్మార్పణ దినోత్సవాన్ని అధికార లాంఛనాలతో నిర్వహిస్తామని రాష్ట్ర ప్రభుత్వం ఉత్తర్వులు జారీ చేసింది. అయితే టీడీపీ నేతల తీరు అధికారపార్టీ లాంఛనంగా మారిందని పలువురు విమర్శిస్తున్నారు. నా దృష్టికి రాలేదు అనధికారికంగా డబ్బులు వసూళ్లు చేస్తున్నారనేది నా దృష్టికి రాలేదు. దీనిపై ఫిర్యాదు అందితే చర్యలు తీసుకుంటాం. అక్రమ వసూళ్ల విషయంలో మాకు ఎటువంటి సంబంధం లేదు. – జి.మాధవి, ఏసీ, దేవదాయశాఖ సంబంధం లేని వ్యక్తుల పేర్లతో కరపత్రాలు ఆలయంలో పెత్తనం సాగిస్తున్న టీడీపీ నేతలకు ఎటువంటి అధికారం లేదు. గుడికి, వారికి అసలు సంబంధం లేదు. అయినా దేవదాయ శాఖ అధికారులు మౌనం దాలుస్తున్నారు. ఇదంతా స్థానిక ఎమ్మెల్యేకు తెలిసినా పట్టించుకోవడం లేదు. ఈ నెల 31వ తేదీ అమ్మవారి ఆత్మార్పణ దినోత్సవ కార్యక్రమానికి సంబంధించి ముద్రించిన కరపత్రాల్లోనూ ముందుగా టీడీపీ నేతల పేర్లు వేయించుకున్నారు. ఆ తర్వాత ధర్మకర్తల మండలి, ఆలయ అధికారి పేర్లు ముద్రించారు. దీనిపై ఆర్యవైశ్య ప్రముఖులు బాహాటంగానే విమర్శలు గుప్పిస్తున్నారు.గుడికి ఏ సంబంధం లేని వ్యక్తులు ఎలా పెత్తనం చేస్తారని ప్రశ్నిస్తున్నారు.

హైదరాబాద్: ఆర్య వైశ్య సంఘం ఇసామియా బ‌జార్ ఆధ్వ‌ర్యంలో శ్రీ వాసవీ క‌న్య‌కాప‌ర‌మేశ్వ‌రి దేవి జ‌యంతి ఉత్స‌వాలు ఘ‌నంగా శ‌నివారం నిర్వ‌హించారు. ఇది ఇసామియా బ‌జార్‌లోని న‌ర‌సింహాస్వామి ఆల‌యం ద‌గ్గ‌ర జ‌రిగింది. ఈ కార్య‌క్రమంలో ఉద‌యం ఫ‌ల‌హారం, అభిషేకం, స‌హ‌స్త్ర నామార్చ‌నతోపాటు హోమ‌ము నిర్వ‌హించి అనంత‌రం తీర్థ ప్రసాద విత‌ర‌ణ జ‌రిపారు. ఇక సాయంత్రం 5 గంట‌ల నుంచి సంఘం స‌భ్యులంద‌రికీ ప‌గ‌డి క‌ట్ట‌డం జ‌రిపారు. ఈ స‌మయంలోనే సామూహిక కుంకుమార్చ‌న సంఘంలోని మ‌హిళ స‌భ్యులు నిర్వ‌హించారు. ఈ కార్య‌క్రమాల అనంత‌రం, అమ్మ‌వారి ఊరేగింపు జ‌రిగింది. ఈ ఊరేగింపులో సంఘం స‌భ్యులంతా దాండియా ఆడుతూ సంద‌డి చేశారు. ఈ కార్య‌క్రమంలో ఆర్య‌వైశ్య సంఘం ప్రెసిడెంట్ కొమిరిశెట్టి అనిల్‌కుమార్, జ‌న‌ర‌ల్ సెక్రట‌రీ ఆలంప‌ల్లి ర‌వికుమార్, ట్రెజ‌ర‌ర్ ఎర్రం ల‌క్ష్మ‌ణ్, ఐపిపి మ్యాడ‌మ్ అశోక్‌. ప్రాజెక్ట్ క‌న్వీన‌ర్ హ‌రినాతినీ శ్రీ‌నివాస్, ప్రాజెక్ట్ చైర్మ‌న్‌ క‌ల్వ‌కుంట్ల శ్రీ‌నివాస్‌. కోక‌న్వీన‌ర్స్‌: పారెపల్లి మ‌ల్లేష్, ప‌ల్లెర్ల హ‌రీష్ కుమార్, చీక‌టిమ‌ర్ల సంగ‌య్య‌. కో చైర్మ‌న్‌: ముర్కి చంద్రమౌళి, రెగొండ చంద్రశేఖ‌ర్, నూనె నాగ‌రాజు ఈ కార్యక్రమంలో పాల్గొన్నారు

సాక్షి, ప్రకాశం చౌక్‌: భీమవరం త్యాగరాజ భవనంలో ఆర్యవైశ్య వర్తక సంఘం, యువజన సంఘం ఆధ్వర్యంలో మంగళవారం వాసవీ కన్యకా పరమేశ్వరీ దేవికి రూ.కోటి నోట్లు, దండలతో ధనలక్ష్మిదేవిగా అలంకరణ చేశారు. ప్రత్యేక పూజలు నిర్వహించారు. అధిక సంఖ్యలో భక్తులు తరలివచ్చారు. సభ్యులు బొండా కిషోర్, వబిలిశెట్టి రాజా, వబిలిశెట్టి కిషోర్, జూలూరి వెంకటేశ్వరరావు తదితరులు పర్యవేక్షించారు.  చదవండి: (దుర్గమ్మ సేవలో ఏపీ సీఎం)

పెనుగొండ: పశ్చిమగోదావరి జిల్లా పెనుగొండ వాసవీ శాంతిధాం 102 రుషీగోత్ర స్తంభ మందిరంలో ఏర్పాటు చేసిన 90 అడుగుల శ్రీవాసవీ కన్యకాపరమేశ్వరి అమ్మవారి పంచలోహ విగ్రహ ప్రతిష్టాపన శుక్రవారం వైభవంగా జరిగింది. జీఎంఆర్‌ గ్రూపు అధినేత జి.మల్లికార్జునరావు దంపతులు అమ్మవారి విగ్రహావిష్కరణ చేసి తొలి అభిషేకం చేశారు. వాసవీ శాంతి ధాంలో 700 రోజుల పాటు శ్రమించి 90 అడుగుల వాసవీ మాత పంచలోహ విగ్రహాన్ని తయారు చేశారు. ఇందుకు 42 టన్నుల రాగి, 20 టన్నుల జింకు, 1.3 టన్నుల తగరం, 600 కేజీల వెండి, 40 కేజీల బంగారం కలిపి 65 టన్నుల విగ్రహాన్ని తయారు చేశారు. డిసెంబర్‌ 4న ప్రారంభమైన ప్రతిష్టాపన ఉత్సవాల్లో భాగంగా ఈనెల 11 నుంచి హోమ క్రతువులు, నిత్య కల్యాణోత్సవాలు నిర్వహిస్తున్నారు. శుక్రవారం 102 ఆర్యవైశ్యుల గోత్రీకులకు చిహ్నంగా 102 స్తంభాల రుషీగోత్ర మందిరాన్ని ప్రారంభించారు. అరుదైన మరకత శిలతో చెక్కించిన 3 అడుగుల మరకత శిలా విగ్రహాన్ని ప్రతిష్టించి అభిషేకాలు నిర్వహించారు. ట్రస్ట్‌ అధ్యక్షుడు డాక్టర్‌ పీఎన్‌ గోవిందరాజులు ఆధ్వర్యంలో జరిగిన ఆర్యవైశ్యుల ఇలవేల్పు వాసవీ కన్యకాపరమేశ్వరి విగ్రహ ప్రతిష్ట మహోత్సవాన్ని తిలకించడానికి కర్ణాటక, తమిళనాడు, కేరళ, మహారాష్ట్ర, తెలంగాణతో పాటు రాష్ట్రం నలుమూలల నుంచి ఆర్యవైశ్యులు వేలాదిగా తరలి వచ్చారు.