బెల్‌గ్రేడ్‌ (సెర్బియా): ప్రపంచ సీనియర్‌ రెజ్లింగ్‌ చాంపియన్‌షిప్‌ను భారత్‌ కాంస్య పతకంతో ముగించేందుకు మరో అవకాశం లభించింది. పురుషుల ఫ్రీస్టయిల్‌ 65 కేజీల విభాగంలో భారత స్టార్‌ రెజర్ల్, బర్మింగ్‌హామ్‌ కామన్వెల్త్‌ గేమ్స్‌ స్వర్ణ పతక విజేత బజరంగ్‌ పూనియా కాంస్య పతకం రేసులో నిలిచాడు. శనివారం జరిగిన 65 కేజీల విభాగంలో 28 ఏళ్ల బజరంగ్‌ క్వార్టర్‌ ఫైనల్లో 0–10తో జాన్‌ మైకేల్‌ డియాకొమిహాలిస్‌ (అమెరికా) చేతిలో ఓడిపోయాడు. అంతకుముందు బజరంగ్‌ ప్రిక్వా ర్టర్‌ ఫైనల్లో 5–4తో అలెజాంద్రో ఎన్రిక్‌ వాల్డెస్‌ (క్యూబా)పై గెలుపొందాడు. బజరంగ్‌ను ఓడించిన జాన్‌ మైకేల్‌ ఫైనల్‌ చేరడంతో ‘రెపిచాజ్‌’ పద్ధతి ద్వారా బజరంగ్‌కు కాంస్య పతకం గెలిచే అవకాశం వచ్చింది. వాజ్‌జెన్‌ తెవాన్యన్‌ (అర్మేనియా), వ్లాదిమిర్‌ దుబోవ్‌ (బల్గేరియా) మధ్య విజేతతో నేడు జరిగే ‘రెపిచాజ్‌’ తొలి రౌండ్‌లో బజరంగ్‌ తలపడతాడు. ఈ బౌట్‌లో బజరంగ్‌ గెలిస్తే కాంస్య పతకం కోసం సెబాస్టియన్‌ రివెరా (ప్యూర్టోరికో)తో ఆడతాడు. ఏడోసారి ప్రపంచ చాంపియన్‌షిప్‌లో పోటీపడుతున్న బజరంగ్‌ ఇప్పటి వరకు ఈ మెగా ఈవెంట్‌లో మూడు పతకాలు సాధించాడు. 2013లో 60 కేజీల విభాగంలో బజరంగ్‌ కాంస్యం నెగ్గగా... 2018లో 65 కేజీల విభాగంలో రజతం, 2019లో కాంస్యం సాధించాడు.   మరోవైపు పురుషుల 74 కేజీల విభాగంలో భారత రెజ్లర్‌ సాగర్‌ జగ్లాన్‌ కాంస్య పతకం సాధించలేకపోయాడు. ఆసియా చాంపియన్‌ యూనస్‌ అలీఅక్బర్‌ (ఇరాన్‌)తో జరిగిన కాంస్య పతక బౌట్‌లో సాగర్‌ 0–6తో ఓడిపోయాడు. భారత్‌కే చెందిన విక్కీ (97 కేజీలు), పంకజ్‌ (61 కేజీలు) తొలి రౌండ్‌లోనే ఓటమి చవిచూశారు. వీరిద్దరిని ఓడించిన రెజ్లర్లు తదనంతరం ఫైనల్‌ చేరుకోకపోవడంతో భారత రెజ్లర్లకు కాంస్య పతకం సాధించే అవకాశం లేకుండా పోయింది.

బెల్‌గ్రేడ్‌ (సెర్బియా): ప్రపంచ సీనియర్‌ రెజ్లింగ్‌ చాంపియన్‌షిప్‌లో భారత్‌కు మరో పతకం చేజారింది. పురుషుల ఫ్రీస్టయిల్‌ 70 కేజీల విభాగంలో నవీన్‌ త్రుటిలో కాంస్య పతకాన్ని కోల్పోయాడు. ఎర్నాజర్‌ అక్మతలియెవ్‌ (కిర్గిజిస్తాన్‌)తో శుక్రవారం జరిగిన కాంస్య పతక బౌట్‌లో నవీన్‌ 1–4 పాయింట్ల తేడాతో ఓడిపోయాడు. తొలి రౌండ్‌ ఆరంభంలో 1–0తో ఆధిక్యంలోకి వెళ్లిన నవీన్‌ ఆ తర్వాత రెండు పాయింట్లు సమర్పించుకున్నాడు. రెండో రౌండ్‌లో మరో రెండు పాయింట్లు కోల్పోయిన నవీన్‌ తేరుకోలేకపోయాడు. ఇటీవల బర్మింగ్‌హామ్‌ కామన్వెల్త్‌ గేమ్స్‌లో 74 కేజీల విభాగంలో పోటీపడిన నవీన్‌ స్వర్ణ పతకం సాధించాడు. అయితే ప్రపంచ చాంపియన్‌షిప్‌లో 70 కేజీల విభాగంలో బరిలోకి దిగి తొలి రౌండ్‌లో 1–6తో తైషి నరుకుని (జపాన్‌) చేతిలో ఓటమి పాలయ్యాడు. తైషి నరుకుని ఫైనల్‌ చేరుకోవడంతో ‘రెపిచాజ్‌’ పద్ధతి ప్రకారం నవీన్‌కు కాంస్య పతకం కోసం పోటీపడే అవకాశం లభించింది. ‘రెపిచాజ్‌’ తొలి రౌండ్‌లో నవీన్‌ 11–3తో సిర్బాజ్‌ తల్గాట్‌ (కజకిస్తాన్‌)పై నెగ్గిన నవీన్‌కు రెండో రౌండ్‌లో ఇలియాస్‌ బెక్బులతోవ్‌ (ఉజ్బెకిస్తాన్‌) నుంచి వాకోవర్‌ లభించింది. దాంతో నవీన్‌ కాంస్య పతక పోరుకు అర్హత సాధించాడు.   అనూహ్య ఫలితం... మరోవైపు భారత్‌కు కచ్చితంగా పతకం అందిస్తాడని ఆశించిన స్టార్‌ రెజ్లర్‌ రవి కుమార్‌ రిక్త హస్తాలతో స్వదేశానికి రానున్నాడు. ఈ మెగా ఈవెంట్‌ కోసం రష్యాలో ప్రత్యేక శిక్షణ పొందిన రవి కుమార్‌ పురుషుల ఫ్రీస్టయిల్‌ 57 కేజీల విభాగంలో ప్రిక్వార్టర్‌ ఫైనల్లోనే ఓడిపోయాడు. తొలి రౌండ్‌లో 10–0తో మరియన్‌ కొవాక్స్‌ (రొమేనియా)పై గెలిచిన రవి ప్రిక్వార్టర్‌ ఫైనల్లో 0–10తో గులామ్‌జాన్‌ అబ్దులయెవ్‌ (ఉజ్బెకిస్తాన్‌) చేతిలోఓడిపోయాడు. అబ్దులయెవ్‌ ఫైనల్‌ చేరుకొని ఉంటే ‘రెపిచాజ్‌’ పద్ధతి ప్రకారం రవి కుమార్‌కు కనీసం కాంస్యం కోసం పోటీపడేందుకు మరో అవకాశం లభించేది. కానీ అబ్దులయెవ్‌ క్వార్టర్‌ ఫైనల్లో 2–13తో జెలీమ్‌ఖాన్‌ అబకరోవ్‌ (అల్బేనియా) చేతిలో ఓడిపోవడంతో రవి పతకం ఆశలు ఆవిరయ్యాయి. 2019 ప్రపంచ చాంపియన్‌షిప్‌లో కాంస్యం సాధించిన రవి గత ఏడాది జరిగిన టోక్యో ఒలింపిక్స్‌లో రజత పతకం గెలిచాడు. 2020, 2021, 2022 ఆసియా చాంపియన్‌షిప్‌లో వరుసగా మూడేళ్లు స్వర్ణ పతకాలు నెగ్గిన రవి ఇటీవల బర్మింగ్‌హామ్‌ కామన్వెల్త్‌ గేమ్స్‌లోనూ పసిడి పతకం గెలిచాడు. అయితే ప్రపంచ చాంపియన్‌షిప్‌లో మాత్రం నిరాశపరిచాడు. 74 కేజీల విభాగంలో సాగర్‌ జగ్లాన్‌ క్వార్టర్‌ ఫైనల్లో 0–5తో కైల్‌ డగ్లస్‌ డేక్‌ (అమెరికా) చేతిలో ఓడిపోయాడు. కైల్‌ ఫైనల్‌ చేరుకోవడంతో సాగర్‌ నేడు కాంస్య పతకం కోసం బరిలో నిలిచాడు. రెండు బౌట్‌లలో సాగర్‌ గెలిస్తే అతనికి కాంస్యం లభిస్తుంది.

ఓస్లో (నార్వే): టోక్యో ఒలింపిక్స్‌లో నిరాశ పరిచినా... ప్రపంచ సీనియర్‌ రెజ్లింగ్‌ చాంపియన్‌షిప్‌లో భారత యువ రెజ్లర్‌ అన్షు మలిక్‌ అదరగొట్టింది. గతంలో ఏ భారతీయ మహిళా రెజ్లర్‌కు సాధ్యంకాని ఘనతను 20 ఏళ్ల అన్షు సాధించింది. ఈ మెగా ఈవెంట్‌ చరిత్రలో ఫైనల్‌కు చేరిన తొలి భారతీయ మహిళా రెజ్లర్‌గా అన్షు రికార్డు నెలకొల్పింది. 57 కేజీల విభాగంలో అన్షు స్వర్ణ పతక పోరుకు అర్హత సాధించింది. బుధవారం జరిగిన సెమీఫైనల్లో అన్షు 11–0 పాయింట్లతో ‘టెక్నికల్‌ సుపీరియారిటీ’ పద్ధతిలో సొలోమియా వినిక్‌ (ఉక్రెయిన్‌)పై విజయం సాధించింది. 3 నిమిషాల 53 సెకన్లలో అన్షు విజయం ఖాయమైంది. ‘టెక్నికల్‌ సుపీరియారిటీ’ పద్ధతి అంటే ప్రత్యర్థిపై కనీసం 10 పాయింట్ల ఆధిక్యం సంపాదించిన వెంటనే బౌట్‌ను ముగించి ఈ ఆధిక్యం సాధించిన రెజ్లర్‌ను విజేతగా ప్రకటిస్తారు. అంతకుముందు క్వార్టర్‌ ఫైనల్లో అన్షు 5–1తో దావాచిమెగ్‌ ఎర్కెమ్‌బాయర్‌ (మంగోలియా)పై, తొలి రౌండ్‌లో 4 నిమిషాల 5 సెకన్లలో 15–5 పాయింట్లతో ‘టెక్నికల్‌ సుపీరియారిటీ’ పద్ధతిలో నీలూఫర్‌ రైమోవా (కజకిస్తాన్‌)పై విజయం సాధించింది. నేడు జరిగే ఫైనల్లో 2016 రియో ఒలింపిక్స్‌ చాంపియన్, 2020 టోక్యో ఒలింపిక్స్‌ కాంస్య పతక విజేత హెలెన్‌ లూయిస్‌ మరూలిస్‌ (అమెరికా)తో అన్షు తలపడుతుంది.   ప్రపంచ చాంపియన్‌ను ఓడించి... మరోవైపు 59 కేజీల విభాగంలో భారత రెజ్లర్‌ సరితా మోర్‌ కాంస్య పతకం కోసం పోటీపడనుంది. బుధవారం జరిగిన సెమీఫైనల్లో సరితా మోర్‌ 0–3 పాయింట్ల తేడాతో యూరోపియన్‌ చాంపియన్‌ నిలిచిన బిల్యానా జికోవా డుడోవా (బల్గేరియా) చేతిలో ఓడిపోయింది. అంతకుముందు ప్రిక్వార్టర్‌ ఫైనల్లో సరితా 8–4తో ప్రపంచ చాంపియన్‌ లిండా మొరైస్‌ (కెనడా)పై సంచలన విజయం సాధించింది. క్వార్టర్‌ ఫైనల్లో సరితా 3–1తో సాండ్రా (జర్మనీ)పై గెలిచింది. ఇనెటా (లిథువేనియా), సారా జోనా లిండ్‌బోర్గ్‌ (స్వీడన్‌) మధ్య బౌట్‌ విజేతతో నేడు జరిగే కాంస్య పతక పోరులో సరితా మోర్‌ తలపడుతుంది.   72 కేజీల విభాగంలో దివ్యా కక్రాన్‌ కాంస్య పతకం రేసులో నిలిచింది. దివ్య క్వార్టర్‌ ఫైనల్లో 0–10తో మసాకో ఫురూచి (జపాన్‌) చేతిలో ఓడిపోయింది. అయితే మసాకో ఫైనల్‌ చేరడంతో దివ్యా ‘రెపిచాజ్‌’ రౌండ్‌లో నేడు దావానసన్‌ (మంగోలియా)తో ఆడుతుంది. ఈ బౌట్‌లో దివ్య గెలిస్తే కాంస్య పతకం కోసం అనా కార్మెన్‌ షెల్‌ (జర్మనీ)తో పోటీపడుతుంది. ప్రపంచ సీనియర్‌ రెజ్లింగ్‌ చాంపియన్‌షిప్‌ చరిత్రలో పతకం ఖాయం చేసుకున్న ఆరో భారతీయ మహిళా రెజ్లర్‌ అన్షు మలిక్‌. గతంలో అల్కా తోమర్‌ (2006లో; 59 కేజీలు), బబితా ఫొగాట్‌ (2012లో; 51 కేజీలు), గీతా ఫొగాట్‌ (2012లో; 55 కేజీలు), పూజా ధాండా (2018లో; 57 కేజీలు), వినేశ్‌ ఫొగాట్‌ (2019లో; 53 కేజీలు) కాంస్య పతకాలు సాధించారు. కిరణ్‌కు నిరాశ మహిళల 76 కేజీల విభాగంలో భారత్‌కు త్రుటిలో కాంస్య పతకం చేజారింది. కాంస్య పతక బౌట్‌లో భారత రెజ్లర్‌ కిరణ్‌ 1–2తో సమర్‌ హంజా (ఈజిప్‌్ట) చేతిలో ఓడిపోయింది. ఈ టోరీ్నలో భారత్‌కు నాలుగోసారి కాంస్య పతకం చేజారింది. పురుషుల ఫ్రీస్టయిల్‌లో రవీందర్‌ (61 కేజీలు), రోహిత్‌ (65 కేజీలు), మహిళల విభాగంలో పింకీ (55 కేజీలు) కూడా కాంస్య పతక బౌట్‌లలో ఓడిపోయారు.

World Senior Wrestling Championship: ప్రపంచ సీనియర్‌ రెజ్లింగ్‌ చాంపియన్‌షిప్‌లో భారత రెజ్లర్‌ రవీందర్‌ దహియాకు నిరాశ ఎదురైంది. నార్వేలో జరుగుతున్న ఈ మెగా ఈవెంట్‌లో ఆదివారం జరిగిన పురుషుల ఫ్రీస్టయిల్‌ 61 కేజీల విభాగం కాంస్య పతక పోరులో రవీందర్‌ 0–10తో హరుతున్యాన్‌ (అర్మేనియా) చేతిలో ఓటమి చవిచూశాడు. భారత్‌కే చెందిన పంకజ్‌ (57 కేజీలు), రోహిత్‌ (65 కేజీలు) ప్రిక్వార్టర్‌ ఫైనల్లో... యశ్‌ (74 కేజీలు), గౌరవ్‌  (79 కేజీలు), పృథ్వీరాజ్‌ (92 కేజీలు), అనిరుధ్‌ (125 కేజీలు) తొలి రౌండ్‌లో పరాజయం పాలయ్యారు. చదవండి: Ind W Vs Aus W: 30 ఏళ్ల తర్వాత... తొలిసారిగా.. 


 పారిస్‌: ప్రపంచ సీనియర్‌ రెజ్లింగ్‌ చాంపియన్‌షిప్‌లో గ్రీకో రోమన్‌ విభాగంలో భారత రెజ్లర్ల పోరాటం ముగిసింది. రెండో రోజు బరిలోకి దిగిన  జ్ఞానేందర్‌ (59 కేజీలు), రవీందర్‌ (66 కేజీలు), హర్‌ప్రీత్‌ సింగ్‌ (80 కేజీలు), నవీన్‌ (130 కేజీలు) ప్రిక్వార్టర్‌ ఫైనల్‌ను దాటలేకపోయారు. జ్ఞానేందర్‌ తొలి రౌండ్‌లో 4–1తో లిబిన్‌ డింగ్‌ (చైనా)పై గెలిచి, ప్రిక్వార్టర్‌ ఫైనల్లో 0–9తో మిరామ్‌బెక్‌ (కజకిస్తాన్‌) చేతిలో ఓడిపోయాడు.