గుండెపోటుతో ఉపాధ్యాయుడు మృతి

నేరడిగొండ: మండలంలోని బుగ్గారం(బి) గ్రామానికి చెందిన ఉపాధ్యాయుడు జాదవ్‌ లక్ష్మణ్‌ (53) గుండెపోటుతో శుక్రవారం తెల్లవారుజాము మృతిచెందారు. జిల్లాలోని బేల ప్రభుత్వ ఆశ్రమోన్నత పాఠశాలలో ఉపాధ్యాయుడిగా ఆయన విధులు నిర్వహిస్తున్నారు. రెండు నెలల క్రితం గుండెకు సంబంధించిన వైద్య చికిత్స చేయించుకుని స్వగ్రామంలో ఉంటున్నారు.

గురువారం అర్ధరాత్రి గుండెనొప్పి రావడంతో కుటుంబీకులు ఆస్పత్రికి తరలిస్తుండగా మార్గమధ్యలో మృతిచెందాడు. విషయం తెలుసుకున్న బోథ్‌ బీఆర్‌ఎస్‌ ఎమ్మెల్యే అభ్యర్థి జాదవ్‌ అనిల్‌, ఎంపీపీ రాథోడ్‌ సజన్‌, ఉపాధ్యాయ సంఘాల నాయకులు, పలువురు ఉపాధ్యాయులు గ్రామానికి చేరుకుని మృతికి గల కారణాలను అడిగి తెలుసుకున్నారు. బాధిత కుటుంబీకులకు ప్రగాఢ సానుభూతిని తెలియజేశారు.