నేడు హైందవ శంఖారావం

సాక్షి, అమరావతి/గన్నవరం: ఆలయాలను ప్రభుత్వ నియంత్రణ నుంచి విముక్తి కలిగించి, స్వయంప్రతిపత్తి కలిగిన ఉత్తమ ధార్మిక వ్యవస్థకు అప్పగించేలా చట్ట సవరణలు చేయాలని డిమాండ్‌ చేస్తూ విశ్వహిందూ పరిషత్‌ (వీహెచ్‌పీ) ఆదివా­రం ‘హైందవ శంఖారావం’పేరుతో విజయవాడ­కు సమీపంలోని కేసరపల్లి వద్ద భారీ బహిరంగ సభను నిర్వహించనుంది. వీహెచ్‌పీ దేశవ్యాప్తంగా ఈ ఉద్యమాన్ని చేపట్టి, ఏపీ నుంచే తొలి బహిరంగ సభ నిర్వహించనుంది. 

ఈ సభకు 3.5 లక్షల మంది ఈ సభకు హాజరవుతారని అంచనా. 30 ఎకరాల పరిధిలో బహిరంగ సభ నిర్వహణకు ఇప్పటికే అన్ని ఏర్పాట్లు పూర్తయ్యాయి. 3,500కి పైగా బస్సులు, 7 రైళ్ల ద్వారా సభకు ప్రజలు తర­లి­రానున్నారు. సభకు నాలుగు వైపుల 150 ఎక­రాల విస్తీర్ణంలో పార్కింగ్‌కు తగిన ఏర్పాట్లు చేశా­రు. 

ఆర్‌ఎస్‌ఎస్, దాని అనుబంధ సంఘాలు ఏపీలో చాలా ఏళ్ల తర్వాత ఇంతటి భారీ కార్యక్రమానికి శ్రీకారం చుట్టగా..వీహెచ్‌పీ, ఏబీ­వీపీ, భారతీయ కిసాన్‌ సంఘ్, భారతీయ మ­జ్దూర్‌ సంఘ్, భజరంగ్‌దళ్, భారతీయ వికాస్‌ పరి­షత్‌ వంటి 40కి పైగా సంస్థల ప్రతినిధులు ఈ సభ­ను విజయవంతం చేసేందుకు 3 నెలలు పాటు పనిచేసినట్లు వీహెచ్‌పీ నేతలు చెప్పారు. 

ఈ సభకు వీహెచ్‌పీ జాతీయ అధ్యక్షుడు అలోక్‌ కుమా­ర్, అర్గనైజింగ్‌ సెక్రటరీ మిలింద్‌ పరందే, శ్రీరామ జన్మభూమి తీర్థ క్షేత్ర కోశాధికారి గోవిందదేవ్‌ గిరి మహరాజ్‌తో పాటు పెద్ద సంఖ్యలో స్వామీజీలు హాజరుకానున్నారు. సభ నేపథ్యంలో ఆదివారం విజయవాడ, చట్టుప్రక్కల ప్రాంతాల్లో భారీ ట్రాఫి­క్‌ ఆంక్షలను పోలీసులు అమలు చేయనున్నారు.