ఫ్రెండ్లీ స్టయిలిస్ట్‌ శరణ్యారావు

ఫ్యాషన్‌ వరల్డ్‌లో తెలుగువాళ్లు తక్కువగా కనిపిస్తారు.
కానీ క్రియేటివ్‌ స్కిల్స్‌తో గట్టిగా నిలబడతారు!
వాళ్లలో శరణ్యారావు పేరును చెప్పుకోవచ్చు గొప్పగా!

శరణ్య స్వస్థలం విశాఖపట్నం. ముస్తాబు చేయడంలో ముందుండేది చిన్నప్పటి నుంచీ! శరణ్య అలంకరణ, స్టయిలింగ్‌కి తొలి మోడల్‌ ఆమె చెల్లెలే! ఇంటి పనుల్లో అమ్మ బిజీగా ఉండి, చెల్లిని రెడీ చేయలేకపోతే ఆ బాధ్యత తను తీసుకునేది! అది క్రమంగా అభిరుచిగా మారింది. తన పాకెట్‌ మనీతో మేకప్‌ వస్తువులు కొనేది. ఏ చిన్న ఫంక్షన్‌ అయినా చెల్లిని చక్కగా ముస్తాబు చేసి మురిసిపోయేది. ఆ అలంకరణను కొన్నిసార్లు అందరూ మెచ్చుకున్నా, చెల్లికి నచ్చేది కాదు. మరికొన్నిసార్లు ఎవ్వరికీ నచ్చకపోయినా, చెల్లికి మాత్రం తెగ నచ్చేది. 

ఇష్టాయిష్టాల్లో ఒకొక్కరిదీ ఒక్కో టేస్ట్‌ అని అర్థంచేసుకుంది శరణ్య. వాటిని బ్యాలెన్స్‌ చేస్తూ అందరూ మెచ్చే స్టయిలింగ్‌ని చూపించొచ్చు అని తెలుసుకుంది. రానురాను అదే ఆమె సిగ్నేచర్‌ స్టయిలింగ్‌ అయింది. ఫ్యాషన్‌ మీదున్న మక్కువతో బెంగళూరులో ఫ్యాషన్‌ కోర్సుచేసి, పేరున్న డిజైనర్‌ దగ్గర కొంతకాలం పనిచేసింది. తర్వాత హైదరాబాద్‌ వచ్చి స్టయిలింగ్‌ స్టార్ట్‌ చేసింది. పర్‌ఫెక్ట్‌ బాడీ, బ్రాండెడ్‌ దుస్తులతోనే స్టయిలింగ్‌ అనే ప్రాక్టీస్‌ని మార్చేసింది. పర్సనాలిటీ, బాడీ టైప్, బాడీ టోన్, కంఫర్ట్‌ వంటివాటిని దృష్టిలో పెట్టుకుని స్ట్రీట్‌ షాపింగ్‌ దుస్తులతో స్టయిలింVŠ  చేస్తూ పర్‌ఫెక్ట్‌ అనిపించుకోవడం మొదలుపెట్టింది. 

అలా శరణ్య స్టయిలింగ్‌కి ఫిదా అయ్యి, ఆమె స్టయిలింగ్‌తో గార్జస్‌ అనిపించుకున్న వారిలో శ్రీలీల, ఐశ్వర్యా మీనన్, కావ్యా థాపర్, దక్షా నాగర్కర్, అదితీ గౌతమి, మాళవికా నాయర్, మిర్నా మీనన్‌ ఉన్నారు. రామ్‌ పోతినేని, సుశాంత్, సత్యదేవ్‌ లాంటి మేల్‌ యాక్టర్స్‌కూ శరణ్య స్టయిలింగ్‌ చేసింది. ‘తిమ్మరుసు’, ‘స్కంద’, ‘భోళా శంకర్‌’ వంటి సినిమాలకు స్టయిలిస్ట్‌గా పనిచేసింది. సినిమా కలర్‌ పాలెట్‌ను ఫాలో అవుతూ.. లెవెన్త్‌ అవర్‌లో కూడా కూల్‌గా స్టయిలింగ్‌ అందించే డైరెక్టర్స్‌ ఫ్రెండ్లీ స్టయిలిస్ట్‌గా శరణ్యకు మంచి పేరుంది. అలా బోయపాటి, మెహర్‌ రమేశ్‌ వంటి డైరెక్టర్లకు ఆమె ఫేవరిట్‌ స్టయిలిస్ట్‌ అయింది.