నేను ఏ సినిమా చేసినా కామెడీ ఉంటుంది: శ్రీ సరిపల్లి

‘ఎన్‌ఐఏ (నేషనల్‌ ఇన్వెస్టిగేటివ్‌ ఏజెన్సీ)లో  కొత్తగా చేరిన యువకుడి కథే ‘రాజా విక్రమార్క’. క్రమశిక్షణ లేకపోవడం వలన అతను ఎలా ఇబ్బంది పడ్డాడు? అనేది ఆసక్తిగా ఉంటుంది. ఎంటర్‌టైన్‌మెంట్, యాక్షన్‌... ఇలా అన్ని అంశాలు ఉంటాయి. ‘మిషన్‌ ఇంపాజిబుల్‌’ స్ఫూర్తిగా ఈ సినిమా తీశా’’ అని డైరెక్టర్‌ శ్రీ సరిపల్లి అన్నారు. కార్తికేయ, తాన్యా రవిచంద్రన్‌ జంటగా తెరకెక్కిన చిత్రం ‘రాజా విక్రమార్క’. ఆదిరెడ్డి టి. సమర్పణలో ‘88’ రామారెడ్డి నిర్మించిన ఈ చిత్రం ఈ నెల 12న విడుదలవుతోంది.

ఈ సందర్భంగా శ్రీ సరిపల్లి మాట్లాడుతూ– ‘‘అమెరికాలోని యూనివర్సల్‌ స్టూడియోస్‌లో మాస్టర్‌ ఆఫ్‌ ఫిలిం మేకింగ్‌ చేసి, నాలుగేళ్లు అక్కడ ఇండిపెండెంట్‌ సినిమాలకు పని చేశాను. ఆ తర్వాత వీవీ వినాయక్‌గారి దగ్గర దర్శకత్వ శాఖలో చేరి ‘నాయక్‌’, ‘అల్లుడు శీను’ సినిమాలకు పనిచేశాను. ‘ఆర్‌ఎక్స్‌ 100’ టైమ్‌లో కార్తికేయను  చూసి, ‘రాజా విక్రమార్క’ కథ చెప్పాను. తనకి నచ్చడంతో ఈ సినిమా చేశాం. ఇందులో సందర్భానుసారంగా కామెడీ ఉంటుంది కానీ క్యారెక్టర్లు జోకులు వేయవు. దేశంలోని ఓ సమస్యపై ఎన్‌ఐఏ పోరాటం చేయడం సినిమాలో చూపించాం. నేను ఏ జానర్‌ చేసినా కామెడీ ఉండేలా చూసుకుంటాను’’ అన్నారు.