థియేటర్స్‌లో చూడాల్సిన సినిమా 1920

మహేశ్‌భట్, నాగార్జున, అవికా గోర్, కృష్ణ

‘‘నాకు హారర్‌ సినిమాలు చూడాలంటే భయం. కానీ ‘1920 హారర్స్‌ ఆఫ్‌ ది హార్ట్‌’ సినిమా చూడాలనిపిస్తోంది. చూడాలని పించేలా ఈ సినిమాను చేశారు’’ అన్నారు నాగార్జున. అవికా గోర్, రాహుల్‌ దేవ్, బర్ఖా బిష్త్, డానిష్‌ పండోర్‌ ప్రధాన పాత్రల్లో నటించిన చిత్రం ‘1920 హారర్స్‌ ఆఫ్‌ ది హార్ట్‌’. దర్శక–నిర్మాత మహేశ్‌భట్‌ రచన, సమర్పణలో కృష్ణాభట్‌ దర్శకత్వంలో రాకేష్‌ జునేజా,
శ్వేతాంబరీ భట్‌ డా.రాజ్‌కిషోర్‌ ఖవ్రే నిర్మించిన ఈ చిత్రం ఈ నెల 23న విడుదల కానుంది.

ఈ సందర్భంగా జరిగిన ‘1920 హారర్స్‌ ఆఫ్‌ ది హార్ట్‌’ ట్రైలర్‌ లాంచ్‌ ఈవెంట్‌కు అతిథిగా హాజరైన నాగార్జున మాట్లాడుతూ– ‘‘మహేశ్‌భట్‌గారు చాలా స్ఫూర్తినిచ్చే వ్యక్తి. ‘తెలుసా మనసా’ (‘క్రిమినల్‌’) పాటను ఆయన చేయించుకున్న విధానం నాకిప్పటికీ గుర్తు ఉంది. ఇక ‘1920’ ట్రైలర్‌ బాగుంది. ఇలాంటి సినిమాలను థియేటర్స్‌లోనే చూడాలి. అవికా కెరీర్‌లో ఈ సినిమా పెద్దహిట్‌గా నిలవాలి. అలాగే ఇవాళ ఒక పెద్ద సినిమా ప్రభాస్‌ ‘ఆదిపురుష్‌’ రిలీజ్‌ అవుతోంది. ఈ సినిమా అందరినీ మళ్లీ థియేటర్‌లోకి తీసుకు రావాలి.. జై శ్రీరామ్‌’’ అన్నారు నాగార్జున.

‘‘నాగార్జునగారి వల్లే ‘1920 హారర్స్‌ ఆఫ్‌ ది హార్ట్‌’ను తెలుగులో విడుదల చేస్తున్నాం. వాళ్ల నాన్నగారి విలువలు, సంస్కారాన్ని ముందుకు తీసుకువెళ్తున్నారు నాగార్జున. విలువలు, సంస్కారం కాపాడుకోవడం చాలా ముఖ్యం. ‘1920’ సినిమా కథ ఈ అంశాల గురించే’’ అన్నారు మహేశ్‌భట్‌. ‘‘నా తొలి సినిమా ‘ఉయ్యాల జంపాల’ నుంచి నాగార్జునగారు నన్ను సపోర్ట్‌ చేస్తున్నారు. ఇప్పుడు హిందీలో నా తొలి చిత్రం ‘1920’ సినిమా ట్రైలర్‌ లాంచ్‌కు ఆయన రావడం చాలా సంతోషంగా ఉంది. ‘1920’ నా కెరీర్‌లో స్పెషల్‌ మూవీ’’ అన్నారు అవికా గోర్‌. ‘‘ఇదొక ఎమోషనల్‌ లవ్‌స్టోరీ. హారర్‌లో ఎమోషన్ ను ప్రయత్నించడం ఇదే తొలిసారి’’ అన్నారు కృష్ణాభట్‌.