Pooja Hegde: అలా చేయాలనుకుంటే నాకు కారు కొనివ్వండి: పూజా హెగ్డే

బుట్ట బొమ్మ పూజా హెగ్డే క్రేజ్‌ గురించి ప్రత్యేకంగా చెప్పనక్కర్లేదు. ఇండస్ట్రీకి వచ్చిన అతి తక్కువ సమయంలోనే స్టార్‌ హీరోయిన్‌గా ఎదిగింది. ఒకలైలా కోసం సినిమాతో టాలీవుడ్‌కు పరిచయమైంది. ఆ తర్వాత ముకుంద, డీజే, మహర్షి, అరవింద సమేత, అలా వైకుంఠపురంలో లాంటి  హిట్‌ చిత్రాలతో మంచి గుర్తింపు తెచ్చుకుంది. 

తాజాగా సల్మాన్‌ ఖాన్‌తో కిసీ కా భాయ్.. కిసీ కీ జాన్‌ చిత్రంలో నటించింది. ఈ చిత్రం ఈనెల 21న ప్రేక్షకుల ముందుకు రానుంది. మరోవైపు టాలీవుడ్‌లో మహేశ్ బాబు సరసన హీరోయిన్‌గా నటిస్తోంది. ఈ చిత్రంలో పెళ్లిసందడి ఫేమ్ శ్రీలీల కీలక పాత్రలో నటిస్తున్నారు. ఈ చిత్రానికి త్రివిక్రమ్ దర్శకత్వం వహిస్తున్నారు. అరవింద సమేత వీర రాఘవ’, ‘అలా.. వైకుంఠపురములో’ తర్వాత ముచ్చటగా మూడోసారి పూజాకు ఛాన్స్‌ ఇచ్చాడు తివిక్రమ్‌. 

అయితే ఇటీవల బుట్టబొమ్మపై రూమర్స్ సోషల్ మీడియాలో తెగ వైరలవుతున్నాయి. ప్రస్తుతం 'కిసీకా భాయ్​ కిసీ కీ జాన్' మూవీ​ ప్రమోషన్లలో పాల్గొన్న రూమర్స్‌పై స్పందించింది. ఇటీవలే డేటింగ్‌ వార్తలపై క్లారిటీ ఇచ్చిన బుట్టబొమ్మ.. ఓ నిర్మాత కాస్ట్లీ కారు గిఫ్ట్‌ ఇచ్చారన్న రూమర్స్‌పై తాజాగా స్పందించింది. అవన్నీ పుకార్లేనని స్పష్టం చేసింది. ఆ వార్తలో ఏ మాత్రం నిజం లేదని తెలిపింది. కాగా.. బాలీవుడ్​ హీరో హృతిక్​ రోషన్  నటించిన చిత్రం​ 'మొహం​జదారో'తో బాలీవుడ్‌లో ఎంట్రీ ఇచ్చింది. ఆ తర్వాత 'హౌస్‌ఫుల్‌- 4', సర్కస్ చిత్రాల్లో కనిపించింది. 

పూజా మాట్లాడుతూ.. 'నా గురించి ఏదో ఒక రూమర్ వినిపిస్తూనే ఉంటుంది. నేను వాటన్నింటినీ చదువుతా. కానీ సమాధానాలు ఇస్తూ కూర్చోలేను. అప్పుడప్పుడు నా పేరేంట్స్ కూడా ఇవన్నీ నిజమేనా అని అడుగుతుంటారు. నేను నటిస్తున్న ఓ సినిమా నిర్మాతలు నాకు కాస్ట్లీ కారు గిఫ్ట్ ఇచ్చారంటూ వార్తలొచ్చాయి. ఒక వేళ నా గురించి చెడుగా ప్రచారం చేయాలనుకుంటే నిజంగా నాకు కారు ఇవ్వండి.' అంటూ చెప్పుకొచ్చింది బుట్టబొమ్మ.