నా ఛాతీలో దమ్ముంది

‘నా కలర్‌ నలుపు... కానీ, నా క్యారెక్టర్‌ ఎరుపు’ అంటూ నటుడు అశోక్‌ కుమార్‌ చెప్పే డైలాగ్‌తో ‘ఈశ్వర్‌’ సినిమా ట్రైలర్‌ ఆరంభమైంది. ప్రభాస్‌ హీరోగా పరిచయమైన చిత్రం ‘ఈశ్వర్‌’. జయంత్‌ సి. పరాన్జీ దర్శకత్వం వహించిన ఈ సినిమాలో శ్రీదేవి విజయ్‌కుమార్‌ హీరోయిన్‌గా నటించారు. బ్రహ్మానందం, శివ కృష్ణ, రేవతి ఇతర పాత్రలు పోషించారు. కొల్ల అశోక్‌ కుమార్‌ నిర్మించిన ఈ సినిమా 2002 నవంబరు 11న రిలీజై హిట్‌గా నిలిచింది.

కాగా ఈ నెల 23న ప్రభాస్‌ పుట్టినరోజు సందర్భంగా ‘ఈశ్వర్‌’ సినిమాని అదే రోజు 4కే క్వాలిటీలో రీ రిలీజ్‌ చేస్తోంది లక్ష్మీ నరసింహా మూవీస్‌. ఈ నేపథ్యంలో ఈ మూవీ రీ రిలీజ్‌ ట్రైలర్‌ని విడుదల చేశారు. రీ ఇంట్రడ్యూసింగ్‌ ప్రభాస్‌ అంటూ రిలీజ్‌ చేసిన ట్రైలర్‌ చూస్తే... ‘నీ చేతిలో డబ్బుంటే... నా ఛాతీలో దమ్ముంది రా, ఈ రోజు ఆ పోరి సంగతి అటో ఇటో తేల్చేస్తాను, ప్రేమించింది మర్చిపోవడానికి కాదు’ అంటూ ప్రభాస్‌ చెప్పే డైలాగులు ఉన్నాయి. ఈ చిత్రానికి సంగీతం: ఆర్పీ పట్నాయక్‌.