TV
న్యూఢిల్లీ: పార్లమెంట్‌ సమావేశాల్లో ‘జమిలి’ బిల్లు గురించి చర్చ నడుస్తున్న వేళ.. వయనాడ్ ఎంపీ, కాంగ్రెస్ నేత ప్రియాంక గాంధీ వాద్రా మరోసారి హాట్‌ టాపిక్‌ అయ్యారు. మరోసారి భుజాన బ్యాగేసి ఇంకో సందేశం ఇచ్చారామె. నిన్న పాలస్తీనా బ్యాగుతో విమర్శలు ఎదుర్కొన్న ఆమె.. ఇవాళ కూడా బంగ్లా సందేశం ఉన్న బ్యాగుతో అందరి దృష్టిని ఆకర్షించారు.
మంగళవారం బంగ్లాదేశ్ రాతలున్న బ్యాగుతో ప్రియాంక గాంధీ పార్లమెంట్‌ ఆవరణలో కనిపించారు. ఆమెతో పాటు మరికొందరు ఎంపీలు కూడా అలాంటి బ్యాగులను వేసుకొచ్చారు. వాటిపై సందేశాన్ని పరిశీలించగా.. బంగ్లాదేశ్ హిందు, క్రిస్టియన్‌ మైనారిటీలపై దాడులను ఖండిస్తున్నట్లుగా ఉంది. అంతకు ముందు.. ప్రియాంకతో పాటు విపక్ష ఎంపీలు సైతం పార్లమెంటులో అడుగుపెట్టడానికి ముందు సభా ప్రాంగణం వెలుపల ప్లకార్డులు, బ్యాగులు పట్టుకుని బంగ్లాలో మైనారిటీలపై, ముఖ్యంగా హిందువులపై జరుగుతున్న దాడులకు వ్యతిరేకంగా నినాదాలు చేశారు.
प्रियंका के आने से विपक्ष में, कांग्रेस में एक जोश तो आया है, अंततः कोई तो बांग्लादेश के अल्पसंख्यकों के हितों की बात कर रहा है #PriyankaGandhi pic.twitter.com/awMqbrEVbe
— Pooja Tiwari (@Irony_Pooja) December 17, 2024
కాగా, ఒకరోజు పాలస్తీనా ప్రజలకు సంఘీభావంగా, ఒకరోజు బంగ్లా బ్యాగుతో ప్రియాంక నిరసన తెలపడం చర్చనీయాంశమైంది. పాలస్తీనా ప్రజలపై ఇజ్రాయెల్ అమానుష దాడులకు వ్యతిరేకంగా ’పాలస్తీనా’ బ్యాగుతో సోమవారంనాడు పార్లమెంటుకు ఆమెకు వచ్చారు. అయితే.. ప్రియాంక భుజాన పాలస్తీనా బ్యాగుపై బీజేపీ తీవ్రంగానే స్పందించింది. జాతీయ అంశాల కంటే అంతర్జాతీయ అంశాలపై ప్రాధాన్యం ఇచ్చే ప్రయత్నమేనంటూ బీజేపీ కొట్టిపారేసింది. పార్లమెంట్‌లో అసదుద్దీన్‌ ఒవైసీ ‘‘జై పాలస్తీనా’’ అంటే.. ప్రియాంక ఏకంగా బ్యాగు వేసుకొచ్చారని మండిపడ్డారు. అంతేకాదు బంగ్లాదేశ్‌లో హిందువులపై దాడులు, హింసాకాండపై ఒక్కమాట కూడా మాట్లాడని ప్రియాంక తన పాలస్తీనా బ్యాగుతో ఫ్యాషన్ స్టేట్‌మెంట్ ఇవ్వాలనుకుంటున్నట్టు అనురాగ్ ఠాకూర్ వ్యాఖ్యానించారు.
అనురాగ్ ఠాకూర్‌తో పాటు మరికొందరు బీజేపీ నేతల విమర్శలకు ప్రియాంక సూటిగానే స్పందించారు. తాను ఏమి ధరించాలో, ఎలా ఉండాలో నిర్ణయించేదెవరని ప్రశ్నించారు. చేతనైతే బంగ్లా ప్రభుత్వంతో మాట్లాడి.. హిందువులు, క్రిస్టియన్ల పై దాడులను అరికట్టేలా చూడాలని కేంద్రానికి ఆమె సూచించారు. మరోవైపు సోమవారం జీరో అవర్‌లోనే ఆమె బంగ్లాలో హిందు దాడులపై ప్రసంగించారు.
ఇదే కాదు.. ప్రియాంక గాంధీ బ్యాగ్‌ మెసేజ్‌ వారం కిందట కూడా చర్చనీయాంశమైంది. అదానీ వ్యవహారంపై పార్లమెంట్‌ సమావేశాలు అట్టుడికిపోయిన సంగతి తెలిసిందే. అయితే ఆ సమయంలో మోదీ-అదానీ భాయ్‌ భాయ్‌’ అని రాతలు, వాళ్లిద్దరి చిత్రాలు ఉన్న బ్యాగును ప్రియాంక హైలైట్‌ చేశారు.
పాలస్తీనా అంశంలో భారత్‌ వ్యవహరించిన తీరుపై ఆ మధ్య విమర్శలు వెల్లువెత్తాయి. గాజాపై ఐక్యరాజ్య సమితి తీర్మానానికి భారత్‌ దూరంగా ఉండడమే ఇందుకు కారణం. అయితే ఆ విమర్శలపై భారత విదేశాంగ శాఖ స్పందించింది. అయితే గాజా ఉద్రిక్తతలు మొదలైనప్పటి నుంచి.. పాలస్తీనాకు సంబంధించిన 13 తీర్మానాల్లో.. 10కి భారత్‌ మద్దతు ఇచ్చిన విషయాన్ని, మానవతాధృక్ఫథంతో భారత్‌ అందించిన సహాయం గురించి విదేశాంగ మంత్రి జైశంకర్‌ గుర్తు చేశారు.
ఇక.. భారత్‌ బంగ్లాదేశ్ మధ్య చారిత్రక సత్సంబంధాలు ఉన్నాయి. అయితే.. షేక్‌ హసీనా పదవీచ్యుతురాలు అయ్యాక మైనారిటీలపై దాడులు పెరిగిపోవడం.. అందులో హిందువులే ఎక్కువగా ఉండడంతో ఆ సంబంధాలపై నీలినీడలు అలుముకున్నాయి.
Comments
Please login to add a commentAdd a comment