IND vs BAN: చరిత్ర సృష్టించిన శ్రేయస్‌ అయ్యర్‌.. తొలి భారత బ్యాటర్‌గా

టీమిండియా మిడిల్‌ ఆర్డర్‌ బ్యాటర్‌ శ్రేయస్‌ అయ్యర్‌ అరుదైన రికార్డు సాధించాడు. వన్డే క్రికెట్‌లో అత్యంత వేగంగా 1500 పరుగులు సాధించిన తొలి భారత బ్యాటర్‌గా నిలిచాడు. బుధవారం బంగ్లాదేశ్‌తో జరిగిన రెండో వన్డేలో 82 పరుగులు సాధించిన అయ్యర్‌.. ఈ అరుదైన ఘనతను తన ఖాతాలో వేసుకున్నాడు.

అంతకుముందు ఈ రికార్డు భారత స్టార్‌ ఆటగాడు కేఎల్‌ రాహుల్‌ పేరిట ఉండేది. రాహుల్‌ 36 ఇన్నిం‍గ్స్‌లలో ఈ ఘనత సాధించగా.. అయ్యర్‌ 34 ఇన్నింగ్స్‌లలో నే ఈ రికార్డును తన పేరిట లిఖించుకున్నాడు. అయ్యర్‌ ప్రస్తుతం అద్భుతమైన ఫామ్‌లో ఉన్నాడు. ఇప్పటివరకు తన అంతర్జాతీయ కెరీర్‌లో 38 వన్డేలు ఆడిన అయ్యర్‌.. 1534 పరుగులు సాధించాడు. అతడి ఇన్నింగ్స్‌లలో 2 సెంచరీలతో పాటు 14 అర్ధ శతకాలు ఉన్నాయి.

ధావన్‌ రికార్డు బద్దలు కొట్టిన శ్రేయస్‌..
ఇక ఈ మ్యాచ్‌లో శ్రేయస్‌ అయ్యర్‌ మరో రికార్డును కూడా సాధించాడు. 2022 ఏడాది వన్డేల్లో అత్యధిక పరుగులు చేసిన భారత బ్యాటర్‌గా అయ్యర్‌ రికార్డు సృష్టించాడు. ఇప్పటివరకు ఈ రికార్డు టీమిండియా వెటరన్‌ ఓపెనర్‌ శిఖర్‌ ధావన్‌(685) పేరిట ఉండేది. తాజా మ్యాచ్‌తో ధావన్‌ రికార్డును అయ్యర్‌ బ్రేక్‌ చేశాడు. ఈ ఏడాదిలో 14 మ్యాచ్‌లు ఆడిన అయ్యర్‌ 721 పరుగులు సాధించాడు.
చదవండి: IND vs BAN: వరుసగా రెండు సెంచరీలు.. రోహిత్‌ స్థానంలో జట్టులోకి! ఎవరీ ఈశ్వరన్?