చెలరేగిన ఢిల్లీ బ్యాటర్లు.. ఆర్సీబీ బౌలర్లకు చుక్కలు

మహిళల ఐపీఎల్‌ 2024లో భాగంగా రాయల్‌ ఛాలెంజర్స్‌ బెంగళూరుతో ఇవాళ (ఫిబ్రవరి 29) జరుగుతున్న మ్యాచ్‌లో ఢిల్లీ క్యాపిటల్స్‌ భారీ స్కోర్‌ చేసింది. టాస్‌ ఓడి ఆర్సీబీ ఆహ్వానం మేరకు తొలుత బ్యాటింగ్‌ చేసిన ఢిల్లీ.. నిర్ణీత ఓవర్లలో 5 వికెట్ల నష్టానికి 194 పరుగులు చేసింది. ఢిల్లీ​ బ్యాటర్లలో షఫాలీ వర్మ (31 బంతుల్లో 50; 3 ఫోర్లు, 4 సిక్సర్లు), అలైస్‌ క్యాప్సీ (33 బంతుల్లో 46; 4 ఫోర్లు, 2 సిక్సర్లు), మారిజన్‌ కప్‌ (16 బంతుల్లో 32; 2 ఫోర్లు, 3 సిక్సర్లు), జెస్‌ జొనాస్సెన్‌ (16 బంతుల్లో 36 నాటౌట్‌; 4 ఫోర్లు, 2 సిక్సర్లు), అరుంధతి రెడ్డి (4 బంతుల్లో 10 నాటౌట్‌; 2 ఫోర్లు) చెలరేగిపోయారు. కెప్టెన్‌ మెగ్‌ లాన్నింగ్‌ (11), జెమీమా రోడ్రిగెజ్‌ (0) నిరాశపరిచారు.

ఆర్సీబీ బౌలర్లలో సోఫీ డివైన్‌, డి క్లెర్క్‌ తలో 2 వికెట్లు పడగొట్టగా.. శ్రేయాంక పాటిల్‌ ఓ వికెట్‌ దక్కించుకుంది. ఆర్సీబీ బౌలర్లలో ఆశా శోభన (2-0-30-0), మోలినెక్స్‌ (3-0-23-0), వేర్హమ్‌ (1-0-13-0) దారాళంగా పరుగులు సమర్పించకోగా.. రేణుకా సింగ్‌ (4-0-28-0) వికెట్లు తీయలేకపోయినా పర్వాలేదనిపించింది.  అనంతరం భారీ లక్ష్య ఛేదనకు దిగని ఆర్సీబీ ధాటిగా ఇన్నింగ్స్‌ను  ప్రారంభించింది. కెప్టెన్‌ స్మృతి మంధన 11 బంతుల్లో 3 ఫోర్లు, సిక్స్‌ సాయంతో 20 పరుగులు చేసి ఇన్నింగ్స్‌ను కొనసాగిస్తుంది. 2 ఓవర్ల తర్వాత ఆర్సీబీ స్కోర్‌ 20/0గా ఉంది.