17 ఏళ్లుగా పరారీలో ఉన్న నిందితుడి అరెస్ట్‌

17 ఏళ్లుగా పరారీలో ఉన్న నిందితుడి అరెస్ట్‌

● ఇన్‌స్పెక్టర్‌కు పోలీసు కమిషనర్‌ అరుణ్‌ రివార్డు ● ముగింపుకొచ్చిన దోపిడీ కేసు ● ప్రధాన నిందితుడు ఇప్పటికే ఎన్‌కౌంటర్‌

కొరుక్కుపేట:. ఓ వ్యాపారికి తుపాకీ చూపి డబ్బులు దోచుకున్న కేసులో 17 ఏళ్లుగా పరారీలో ఓ నిందితుడిని అరెస్టు చేసిన సెంట్రల్‌ క్రైమ్‌ బ్రాంచ్‌ ఇన్‌స్పెక్టర్‌ శివకుమార్‌కు నగర పోలీసు కమిషనర్‌ అరుణ్‌ అభినందించి రివార్డు అందజేశారు. వివరాలు..2003 ఆగస్టు 13న చైన్నె కీల్పాక్కంలోని ఓ కంపెనీలోకి చొరబడి, ఉద్యోగినులను తుపాకీతో బెదిరించి దక్షిణాది జిల్లాలో పేరొందిన వెంకటేశ పన్నియార్‌ తన స్నేహితులతో కలిసి రూ.41.80 లక్షలు దోచుకెళ్లాడు. ఈ సంఘటన 2003 ఆగస్టు 13న చోటుచేసుకుంది. ప్రధాన నిందితుడైన వెంకటేశ పెన్నియార్‌ నుంగంబాక్కం లేక్‌ సైడ్‌ రోడ్డులోని ఓ అపార్ట్‌ మెంట్‌ బ్లాక్‌లో దాక్కుని ఉండగా అప్పటి చైన్నె మున్సిపల్‌ పోలీస్‌ కమిషనర్‌ విజయకుమార్‌ నేతృత్వంలోని పోలీసులు 2003 సెప్టెంబర్‌ 26న ఎన్‌కౌంటర్‌ చేశారు. కేసులో మిగిలిన 9 మందిలో ఏడుగురిని ఇప్పటికే అరెస్టు చేశారు. పరారీలో గోకుల్‌, జనార్థన్‌ కోసం సెంట్రల్‌ క్రైమ్‌ బ్రాంచ్‌ అధికారులు గాలించారు. 2017లో గోకుల్‌ మరణించాడు. ఈ నేపథ్యంలో సెంట్రల్‌ క్రైమ్‌ బ్రాంచ్‌ ఇన్‌ స్పెక్టర్‌ శివకుమార్‌ నేతృత్వంలోని ప్రత్యేక బలగాలు గత 28వ తేదీన చైన్నెలోని ఎంజీఆర్‌ నగర్‌, కళ్యాణ్‌ నగర్‌, మూవేందర్‌ స్ట్రీట్‌లోని ఓ ఇంట్లో తలదాచుకున్న జనార్థన్‌ను అరెస్ట్‌ చేశారు. ఇతడు సాక్షాత్తు ప్రధాన నిందితుడు వెంకటేశ పన్నియార్‌కు అల్లుడు కావడం గమనార్హం! మొత్తానికి 17 ఏళ్లుగా కళ్లుగప్పి, ముప్పుతిప్పలు పెట్టిన జనార్థన్‌ను అరెస్ట్‌ చేయడంతో పోలీస్‌ కమిషనర్‌ అభినందించారు.