లంక చెర నుంచి తిరిగొచ్చిన 13 మంది జాలర్లు

లంక చెర నుంచి తిరిగొచ్చిన 13 మంది జాలర్లు

● విమానంలో చైన్నెకి రాక.. ● ప్రత్యేక వాహనాలలో స్వస్థలాలకు తరలింపు

సేలం : శ్రీలంక జైలు నుంచి విడుదలైన 13 మంది రామేశ్వరం జాలర్లను విమానంలో చైన్నెకి తీసుకువచ్చి, తరువాత వారి ప్రత్యేక వాహనాలలో స్వస్థలాలకు పంపించారు. వివరాలు.. తమిళనాడులోని రామేశ్వరం నుండి ముగ్గురు మత్స్యకారులు ఫిబ్రవరి 19న మోటారు పడవలో సముద్రానికి వెళ్లి చేపలు పట్టారు. ఆ సమయంలో, శ్రీలంక కోస్ట్‌ గార్డ్‌ ఒక గస్తీ నౌకలో వచ్చి, రామేశ్వరం జాలర్లు సరిహద్దు దాటి చేపలు పడుతున్నారని ఆరోపించారు. వారు ముగ్గురు మత్స్యకారులను అరెస్టు చేసి, పడవను శ్రీలంకకు తీసుకెళ్లారు. అదే విధంగా ఫిబ్రవరి 23న, రామేశ్వరం నుంచి 10 మంది మత్స్యకారులు రెండు పడవలలో చేపలు పట్టడానికి వెళ్లారు. వారు భారత జలాల్లో చేపలు పడుతుండగా, శ్రీలంక కోస్ట్‌ గార్డ్‌ పెట్రోలింగ్‌ షిప్‌ వచ్చి, 10 మంది రామేశ్వరం జాలర్లను అరెస్టు చేసి, 2 ఫిషింగ్‌ బోట్లను సీజ్‌ చేశారు. తర్వాత శ్రీలంక కోర్టులో హాజరుపరిచి జైలుకు తరలించారు. ఈ పరిస్థితుల్లో ముఖ్యమంత్రి ఎం.కె. స్టాలిన్‌ శ్రీలంక నావికాదళం అరెస్టు చేసిన తమిళనాడు జాలర్లను విడుదల చేయడానికి చర్యలు తీసుకోవాలని కోరుతూ విదేశాంగ మంత్రి ఎస్‌. జైశంకర్‌కు లేఖ రాశారు. అనంతరం శ్రీలంకలోని భారత రాయబార కార్యాలయ అధికారులు శ్రీలంక ప్రభుత్వ అధికారులతో చర్చలు జరిపారు. ఈ పరిస్థితిలో, మంగళవారం శ్రీలంక కోర్టు రామేశ్వరంకు చెందిన 13 మంది జాలర్లను విడుదల చేసి, శ్రీలంకలోని భారత రాయబార కార్యాలయానికి అప్పగించాలని ఆదేశించింది. అనంతరం, భారత రాయబార కార్యాలయ అధికారులు రామేశ్వరం నుంచి విడుదలైన 13 మంది మత్స్యకారులకు అత్యవసర ధ్రువీకరణ పత్రాలు జారీ చేశారు. ఆ తర్వాత 13 మంది జాలర్లను మంగళవారం అర్ధరాత్రి శ్రీలంక రాజధాని కొలంబో నుండి చైన్నెకి పంపించారు. ఈ క్రమంలో చైన్నె విమానాశ్రయానికి చేరుకున్న 13 మంది జాలర్లను తమిళనాడు మత్స్య శాఖ అధికారులు స్వాగతించారు. తర్వాత ప్రభుత్వం ఏర్పాటు చేసిన వాహనంలో రామేశ్వరానికి పంపించారు. అంతకుముందు, మత్స్యకారులు కేంద్ర, రాష్ట్ర ప్రభుత్వాలు తమ పడవలను, చేపల వలలను చైన్నె విమానాశ్రయంలోని తమిళనాడు ప్రభుత్వ మత్స్య శాఖ అధికారులకు వెంటనే తిరిగి ఇవ్వాలని డిమాండ్‌ చేశారు.