తమిళంలో పేరు బోర్డులు తప్పనిసరి

తమిళంలో పేరు బోర్డులు తప్పనిసరి

● మే 15 వరకు గడువు

సాక్షి, చైన్నె: తమిళంలో పేరు బోర్డులు లేకపోతే చర్యలు తప్పదని ప్రభుత్వం ప్రకటించింది. మే 15 వరకు గడువు విధిస్తూ బుధవారం అధికారులు ప్రకటన విడుదల చేశారు. వివరాలు.. చైన్నె, మదురై, తిరుచ్చి కోవై, తిరునెల్వేలి వంటి ముఖ్య నగరాలలో తమిళంలో పేరు బోర్డులు ఖచ్చితంగా ఉంచాలని, దాన్ని క్రమంగా పాటించాలని, ఆ విధంగా పాటించని దుకాణాలపై చర్యలు చేపట్టాలని రాష్ట్ర ప్రభుత్వం గతంలో సూచించింది. నగరాలలోని వ్యాపార సంస్థలు, దుకాణాలు, మాల్స్‌ , విద్యాలయాలు, ఇలా...తదితర అన్ని రకాల వ్యాపార సంబంధిత కార్యాలయాల నేమ్‌ బోర్డుల్లో పేర్లు పెద్దవిగా తమిళ అక్షరాలలోను, దానికంటే చిన్న అక్షరాలలో ఆంగ్లం లేదా ఇతర భాషలు ఉండాలన్న ఆదేశాలు జారీ చేసింది. అయితే దీన్ని వ్యాపారులు పాటించడం లేదు. అయితే తమిళ అక్షరాలు అతి చిన్నవిగాను, ఇంగ్లీషు అక్షరాలు అతి పెద్దవిగాను అనేక నేమ్‌ బోర్డులు కనిపిస్తుంటాయి. దీనికి సంబంధించి అధికారులు పరిశీలన చేపట్టారు. తమిళం బోర్డులు పూర్తి స్తాయిలో లేక పోవడాన్ని పరిగణించారు. దీంతో మే 15లోపు అన్ని చోట్ల తమిళ బోర్డులు తప్పనిసరి అని, లేని పక్షంలో చర్యలు తప్పదన్న హెచ్చరికలు జారీ చేశారు. ఇక చైన్నె విషయానికి వస్తే 70 వేల దుకాణాలు లైసెన్స్‌ పొంది నిర్వహిస్తున్నాయి.ుు వీటిలో ప్యారిస్‌, సౌకార్‌పేట వంటి ప్రాంతాలలో ఉన్న దుకాణాలలో తమిళ నేమ్‌ బోర్డులు లేనట్టు సమాచారం. తమిళంలో నేమ్‌ బోర్డులు పెట్టని దుకాణాలకు వివరణ కోరుతూ నోటీసులు పంపించాలని చైన్నె కార్పొరేషన్‌ఇప్పటికే నిర్ణయించింది. ఏతు బోర్డులను సరి చేయకుంటే లైసెన్స్‌ను రద్దు చేసే విధంగా హెచ్చరికలు జారీ చేయడం గమనార్హం. అదే సమయంలో చైన్నె నగరంలోని రోడ్లు, వీధులలో బోర్డులన్నీ తమిళం, ఆంగ్లంలో ఉండే విధంగా ఇప్పటికే పనుల వేగాన్ని పెంచిన విషయం తెలిసిందే. అలాగే కొన్ని తెలుగుపేర్ల వెనుక తమిళ అక్షరాన్ని కలిపి తమిళ పేర్లుగానే వాటిని మార్చేస్తుండడం గమనార్హం.