పారా అథ్లెట్ దీప్తికి సీఎం రేవంత్‌ భారీ నజరానా

సాక్షి, హైదరాబాద్: తెలంగాణలోని వరంగల్‌కు చెందిన పారా అథ్లెట్ దీప్తి జీవన్‌ జీ.. పారిస్‌లో జరుగుతున్న పారా ఒలంపిక్స్‌లో సత్తా చాటారు. మహిళల 400 మీటర్ల టీ20 క్లాస్‌లో దీప్తి కాంస్య పతకం గెలుచుకున్నారు. ఈ నేపథ్యంలో అథ్లెట్ దీప్తికి సీఎం రేవంత్ రెడ్డి భారీ నజరానా ప్రకటించారు.

ఒలంపిక్స్‌లో సత్తా చాటినందుకు గాను దీప్తికి రూ. కోటి నగదుతో పాటు గ్రూప్-2 ఉద్యోగం, వరంగల్‌లో 500 గజాల స్థలం ఇవ్వనున్నట్లు సీఎం రేవంత్‌ తెలిపారు. అలాగే, దీప్తి కోచ్‌కు రూ. 10 లక్షల నజరానా ఇవ్వాలని అధికారులను ఆదేశించారు. ఇదే సమయంలో రాష్ట్రంలోని పారా గేమ్స్ క్రీడాకారులకు శిక్షణ, ప్రోత్సాహకాలు ఇవ్వాలని అధికారులకు సూచించారు.