18 పరీక్ష కేంద్రాల మార్పు

గుంటూరు ఎడ్యుకేషన్, న్యూస్‌లైన్ :అనుమతి లేకుండా కళాశాలలను తరలించిన కార్పొరేట్ విద్యాసంస్థల యాజమాన్యాలపై ఇంటర్మీడియెట్ బోర్డు ఎట్టకేలకు కొరడా ఝుళిపించింది. నిబంధనలను తుంగలో తొక్కి సంవత్సరాల తరబడి ఇష్టారాజ్యంగా వ్యవహరించిన ఫలితంగా జిల్లాలోని 18 ప్రైవేటు, కార్పొరేట్ జూనియర్ కళాశాలల పరిధిలో పరీక్ష కేంద్రాలను శాశ్వతంగా రద్దు చేస్తూ బోర్డు ఉన్నతాధికారులు సంచలనాత్మక నిర్ణయం తీసుకున్నారు.  బోర్డు తీసుకున్న నిర్ణయంతో కార్పొరేట్ విద్యాసంస్థల యాజమాన్యాల గొంతులో పచ్చి వెలక్కాయ పడినట్లయింది. దశాబ్దాల తరబడి ఏక చత్రాధిపత్యం సాగిస్తున్న కళాశాలలను పక్కన పెట్టి నూతనంగా స్థాపించిన జూనియర్ కళాశాలల్లో పరీక్ష కేంద్రాలను ఏర్పాటు చేయడం తీవ్ర చర్చనీయాంశంగా మారింది. ఈ నెల 12వ తేదీ నుంచి ప్రారంభం కానున్న ఇంటర్మీడియెట్ పబ్లిక్ పరీక్షలకు జిల్లా వ్యాప్తంగా లక్ష మంది వి ద్యార్థులు హాజరుకానుండగా ఇంటర్‌బోర్డు అధికారులు 130 పరీక్షా కేంద్రాలను ఏర్పాటు చేశారు.