తహశీల్దార్‌కు రూ.10 వేల జరిమానా

బేతంచర్ల (కర్నూలు) : బాధ్యతారాహిత్యంగా వ్యవహరించిన ఓ తహశీల్దార్‌కు రూ.10 వేల జరిమానా విధిస్తూ రాష్ట్ర హైకోర్టు మంగళవారం ఆదేశాలు జారీ చేసింది. దీనికి సంబంధించిన వివరాల్లోకి వెళ్తే... కర్నూలు జిల్లా బేతంచర్ల మండలం ముద్దనూరు గ్రామానికి చెందిన ఎన్.రాధమ్మ అనే మహిళ... తహశీల్దార్ రామకృష్ణుడు వేధింపులపై హైకోర్టును ఆశ్రయించగా ఈ ఆదేశాలు వెలువడ్డాయి.

ముద్దనూరు గ్రామానికి చెందిన సర్వే నెంబర్లు 688, 528బి లలో 4.2 ఎకరాల భూమికి రాధమ్మ యజమానురాలు. అయితే ఈ భూమితో ఆమెకు ఎలాంటి సంబంధం లేదని, అక్రమంగా సాగు చేస్తోందంటూ తహశీల్దార్ వేధింపులకు దిగడంతోపాటు కేసు పెట్టించారు. దీంతో బాధితురాలు హైకోర్టును ఆశ్రయించారు. ఈ కేసును విచారించిన హైకోర్టు.. తహశీల్దార్ రామకృష్ణుడు బాధ్యతారాహిత్యంగా వ్యవహరించారని పేర్కొంటూ రూ.10 వేలు జరిమానా విధిస్తూ తీర్పునిచ్చింది.