ఏసీబీ సోదాలు

ఏలూరు అర్బన్‌ : ఏలూరు సబ్‌రిజిస్ట్రార్‌ కార్యాలయంపై ఏసీబీ అధికారులు గురువారం ఆకస్మికంగా దాడి చేశారు. కార్యాలయంలో సోదాలు నిర్వహించారు. గత కొంతకాలంగా ఈ కార్యాలయంలో అవినీతి జరుగుతోందనే సమాచారంతో వలపన్నిన అవినీతి నిరోధక శాఖ అధికారులు గురువారం ఉదయం ఒక్కసారిగా కార్యాలయంలోకి ప్రవేశించారు. రికార్డులు పరిశీలించారు. సబ్‌రిజిస్ట్రార్‌ టేబుల్‌పైనా, కొందరు దస్తావేజు లేఖరులు, ఇతరుల వద్ద అనధికారికంగా ఉన్న 3,55,915 రూపాయలను, సెల్‌ఫోన్లను స్వాధీనం చేసుకున్నారు.  ఏసీబీ సోదాలు చేస్తుండగా.. అప్పటివరకూ అక్కడే విధుల్లో ఉన్న సబ్‌రిజిస్ట్రార్‌ కె.విజయమణి ఉడాయించారు. ఆస్తుల రిజిస్ట్రేషన్ల కోసం వచ్చిన దళారులు, కొందరు లేఖరులు కూడా చల్లగా జారుకున్నారు.