కాబూల్ పేలుళ్లలో 35మంది దుర్మరణం

కాబూల్ : ఆఫ్ఘనిస్తాన్ మరోసారి రక్తమోడింది. వరుస పేలుళ్లతో రాజధాని కాబూల్‌ దద్దరిల్లిపోయింది. ఈ పేలుళ్లలో 35 మందికి పైగా ప్రాణాలు కోల్పోయారు. వంద మందికి పైగా గాయపడ్డారు. మొదటి పేలుడు సిటీ పోలీసు అకాడమీ సమీపంలో సంభవించగా రెండో పేలుడు ఎయిర్‌పోర్టుకు సమీపంలో సంభవించింది. షా షాహిద్ ఏరియాలో ఆత్మాహుతి దాడి జరిగింది.

పేలుడు పదార్థాలతో నిండిన ట్రక్కును తీసుకొచ్చిన ఓ సూసైడ్ బాంబర్ శుక్రవారం సాయంత్రం తనను తాను పేల్చుకున్నాడు. ఈ ఘటనలో 20 మందికి పైగా చనిపోయారు. పదులమంది గాయ పడ్డారు. ఆ తర్వాత కాసేపటికే ఎయిర్‌పోర్ట్ సమీపంలో పెద్ద పేలుడు సంభవించింది. ఈ ఘటనలో 15 మందికి పైగా చనిపోగా పదుల మంది గాయపడ్డారు.