TV
వాషింగ్టన్‌: హెచ్‌–1బీ వీసా నిబంధనల్ని కఠినతరం చేస్తూ రూపొందించిన బిల్లుకు అమెరికన్‌ కాంగ్రెస్‌ కమిటీ ఆమోదం తెలిపింది. హెచ్‌ 1–బీ వీసాదారుల కనీస వార్షిక వేతనాన్ని 60 వేల డాలర్ల నుంచి 90 వేల డాలర్లకు పెంచడంతో పాటు అనేక నిబంధనల్ని ఈ బిల్లులో చేర్చారు. ‘ద ప్రొటెక్ట్‌ అండ్‌ గ్రో అమెరికన్‌ జాబ్స్‌ యాక్ట్‌(హెచ్‌ఆర్‌ 170)’గా పేర్కొనే ఈ బిల్లును బుధవారం ప్రతినిధుల సభకు చెందిన జ్యుడీషి యరీ కమిటీ ఆమోదించింది. దీనిని ఆమోదం కోసం కాంగ్రెస్‌లోని ప్రతినిధుల సభలో ప్రవేశపెట్టనున్నారు.. ఈ బిల్లును సెనెట్‌ కూడా ఆమోదించాల్సి ఉంటుంది. ఉభయ సభలు ఆమోదించాక అధ్యక్షుడు ట్రంప్‌ సంతకంతో ఇది చట్టంగా అమల్లోకి వస్తుంది. హెచ్‌ఆర్‌ 170 చట్టంగా మారితే అమెరికా వ్యాపారాలకు నష్టం తప్పదని, వేలాది ఉద్యోగులకు ముప్పని నాస్కాం అధ్యక్షుడు చంద్రశేఖర్‌ హెచ్చరించారు.
