స్టైలీష్‌ స్టార్‌ అల్లు అర్జున్‌ ‘నా పేరు సూర్య’తో పరాజయాన్ని చూశాడు. సినిమా విడుదలై రెండు నెలలు దాటినా మరో మూవీని కన్‌ఫర్మ్‌ చేయలేదు. విక్రమ్‌ కే కుమార్‌తో సినిమా అని పుకార్లు షికార్లు చేస్తున్నాయి. అయితే ఈ కాంబినేషన్‌పై అధికారిక ప్రకటన వస్తేగానీ లెక్కలోకి రాదు. 

అల్లు అర్జున్‌ పేరు సోషల్‌ మీడియాలో నిన్నంతా మార్మోగింది. సరైనోడు హిందీ డబ్బింగ్‌ వర్షన్‌ యూట్యూబ్‌లో అరుదైన రికార్డును సొంతం చేసుకుంది. ఈ సినిమాను 2కోట్లకు పైగా వీక్షించారు. ఇది ఇండియన్‌ సినిమాలో ఓ రికార్డ్‌. బాలీవుడ్‌లో బన్నీ డబ్బింగ్‌ సినిమాలకు ఉండే క్రేజే వేరు. బన్నీ ఈ ఫాలోయింగ్‌ను క్యాష్‌ చేసుకుందామని ట్రై చేస్తున్నట్లు సమాచారం. బాలీవుడ్‌లోని ఓ ప్రముఖ దర్శకుడితో సంప్రదింపులు జరుపుతున్నట్లు తెలుస్తోంది. నిన్నటి వరకు విక్రమ్‌ కే కుమార్‌, త్రివిక్రమ్‌లతో సినిమాలు ఉండొచ్చని రూమర్స్‌ వస్తే.. ప్రస్తుతం బన్నీ బాలీవుడ్‌ ఎంట్రీ వార్త బయటకు వినిపిస్తోంది. వీటన్నంటిలో ఏది నిజమో తెలియాలంటే బన్నీయే సమాధానం చెప్పాలి.