'సై రా' నుంచి తప్పుకున్న ఆస్కార్ విన్నర్

ఖైదీ నంబర్ 150తో గ్రాండ్ గా రీ ఎంట్రీ ఇచ్చిన మెగాస్టార్ చిరంజీవి తన తదుపరి చిత్రం మరింత భారీగా ఉండేలా జాగ్రత్తలు తీసుకుంటున్నాడు. భారీ బడ్జెట్ తో చారిత్రక చిత్రంగా తెరకెక్కుతున్న సైరా నరసింహారెడ్డి సినిమాలో నటించనున్నాడు చిరు. ఇప్పటికే ఈ సినిమా పూజా కార్యక్రమాలు జరిగి చాలా కాలం అవుతున్నా.. ఇంత వరకు సెట్స్ మీదకు వెళ్లలేదు. అంతేకాదు సినిమా అధికారిక ప్రకటన వచ్చిన దగ్గర నుంచి సాంకేతిక నిపుణులు ఒక్కరొక్కరుగా తప్పుకుంటున్నారంటూ వార్తలు వినిపిస్తున్నాయి.

ఇప్పటికే సినిమాటోగ్రాఫర్ గా రవివర్మన్ ఈ ప్రాజెక్ట్ నుంచి తప్పుకోగా ఆయన స్థానంలో రత్నవేలును తీసుకున్నారు. తాజాగా సంగీత దర్శకుడు ఏఆర్ రెహమాన్ కూడా ఈ సినిమా నుంచి తప్పుకున్నట్టుగా అధికారికంగా ప్రకటించారు. హైదరాబాద్ లో నిర్వహిస్తున్న లైవ్ షో సందర్భంగా మీడియాతో మాట్లాడిన రెహమాన్, ఈ విషయాన్ని ప్రకటించారు. తనకు చిరు అంటే చాలా ఇష్టమన్న రెహమాన్ కేవలం బిజీ షెడ్యూల్ కారణంగా ఈ ప్రాజెక్ట్ నుంచి తప్పుకుంటున్నట్టుగా తెలిపారు. మరి రెహమాన్ స్థానం ఏ సంగీత దర్శకుడిని తీసుకుంటారో చూడాలి.