ట్రామ్‌లో ప్రేమ

ప్రభాస్‌ ట్రామ్‌ ఎక్కబోతున్నారు. పడవలాంటి కార్లు బోలెడన్ని ఉండగా పాత కాలం ట్రామ్‌ ఎక్కాల్సిన అవసరం ఏంటి? అయినా ఇప్పుడు హైదరాబాద్‌లో ట్రామ్‌లు ఎక్కడ దొరుకుతాయి అనుకుంటున్నారా? ప్రభాస్‌ కోసం ప్రత్యేకంగా ట్రామ్‌ రెడీ చేశారు. ఈ వాహనాన్ని తన తాజా చిత్రం ‘జాన్‌’లో ఉపయోగించనున్నారు ప్రభాస్‌. రాధాకృష్ణ దర్శకత్వంలో ఈ చిత్రం తెరకెక్కుతోన్న సంగతి తెలిసిందే. ఇందులో ప్రభాస్‌ సరసన పూజా హెగ్డే కథానాయికగా నటిస్తున్నారు.

1970 నేపథ్యంలో సాగే ఈ పీరియాడికల్‌ లవ్‌స్టోరీ నెక్ట్స్‌ షెడ్యూల్‌ చిత్రీకరణ మరో వారం రోజుల్లో ప్రారంభం కానుందని తెలిసింది. ఇందుకోసం హైదరాబాద్‌లోని ఓ ప్రముఖ స్టూడియోలో సెట్‌ వర్క్‌ చేస్తున్నారు కళా దర్శకుడు రవీందర్‌. ఈ సెట్‌లో భాగంగా ట్రామ్‌ని తయారు చేశారు. ఈ వాహనానికి సుమారు 50 లక్షల ఖర్చయిందని సమాచారం. ఇందులో ప్రేమ సన్నివేశాలు చిత్రీకరిస్తారట. 1970లో ఇటలీ నుంచి బయలుదేరిన ఓ ట్రైన్‌లో ‘జాన్‌’ ప్రేమకథ సాగుతుందని తెలిసింది.