TV
పిచ్చ హ్యాపీ!
‘‘నేను నటించబోయే సినిమాల గురించి ఇప్పుడేం చెప్పలేను. కానీ, అవేంటో తెలిస్తే నా అభిమానులతో సహా ప్రతి ఒక్కరూ ఆశ్చర్యపోతారు. ఆ సినిమాల్లో నేనూ ఓ భాగం అవుతున్నానని తెలియగానే చాలా సంతోషపడ్డా’’ అన్నారు తమన్నా. ఎవరెవరికి జోడీగా.. ఏయే సినిమాల్లో నటించనున్నారో మరి! పూర్తి వివరాలు చెప్పకుండా పిచ్చ హ్యాపీగా ఉన్నానంటూ అందర్నీ ఆలోచనలో పడేశారు తమన్నా. అసలు విషయం ఏంటని ఆరా తీస్తే... నాగార్జునతో ఈ మిల్క్ బ్యూటీ జోడీ కడుతున్నారట! వీళ్లిద్దరూ ‘ఊపిరి’లో నటించారు. కానీ, అది రెగ్యులర్ హీరో, హీరోయిన్ సినిమా కాదు.
త్వరలోనే ఇద్దరూ జంటగా నటిస్తారట! నాగార్జున హీరోగా ఓంకార్ దర్శకత్వంలో తెరకెక్కనున్న ‘రాజుగారి గది-2’లో తమన్నాను ఓ హీరోయిన్‌గా ఎంపిక చేశారట. సినిమాలో మరో హీరోయిన్‌కీ చోటుంది. ఆ పాత్రకు ‘రన్ రాజా రన్’ ఫేమ్ సీరత్ కపూర్ పేరు వినిపిస్తోంది. తమన్నా మాట్లాతున్నది ‘రాజుగారి గది-2’ గురించేనా? కాదా? అనేది రెండు వారాల్లో స్పష్టత వస్తుంది. ఎందుకంటే.. డిసెంబర్ తొలివారంలో ఈ సినిమా చిత్రీకరణ మొదలు కానుంది. ఇది కాకుండా మరికొన్ని క్రేజీ ప్రాజెక్టులు తమన్నా ఖాతాలో ఉన్నాయట. వాటి గురించి ఇప్పుడే చెప్పనని ఊరిస్తున్న తమన్నా ఎప్పుడు చెబుతారో?
