TV
'రంగ్ రసియా' సినిమా విడుదలపై కోర్టు స్టే
బాలీవుడ్ చిత్రం 'రంగ్ రసియా' విడుదలను కేరళలోని ఓ కోర్టు నిలుపుదల చేసింది. 19వ శతాబ్దికి చెందిన ప్రముఖ చిత్రకారుడు రాజా రవివర్మ జీవితం ఆధారంగా తీసిన ఈ చిత్రాన్ని శుక్రవారం నాడు కేరళలో విడుదల చేయొద్దని ఉత్తర్వులిచ్చింది. అళప్పుజ జిల్లాలోని మావెలిక్కర మున్సిఫ్ మేజిస్ట్రేట్ ఈ ఉత్తర్వులు జారీ చేశారు. రవివర్మ మనవరాలు ఇంద్రాదేవి కుంజమ్మ ఫిర్యాదు చేయడంతో ఆయన స్టే ఇచ్చారు.
రాజా రవివర్మ జీవితగాధకు, ఈ సినిమాకు ఎలాంటి సంబంధం లేదన్న ప్రకటన లేకుండా సినిమాను ప్రదర్శించడానికి వీల్లేదని జడ్జి ప్రసున్ మోహన్ స్పష్టం చేశారు. రంజిత్ దేశాయ్ రాసిన 'రాజా రవివర్మ' అనే పుస్తకం ఆధారంగా కేతన్ మెహతా ఈ సినిమా తీశారు. ఈ సినిమాను నిషేధించాలంటూ కేరళ హైకోర్టులో కూడా ఓ పిటిషన్ దాఖలైంది.
