పవర్‌ఫుల్‌ రీ–ఎంట్రీ!

పవర్‌ఫుల్‌ రీ–ఎంట్రీ!

అన్నయ్య మెగాస్టార్‌ చిరంజీవి ‘స్టాలిన్‌’ చిత్రంలో చిరూకి అక్కగా నటించారు ఖుష్బూ. ఆ చిత్రం విడుదలై పదేళ్లవుతోంది. ఇప్పుడు తమ్ముడు పవన్‌ కల్యాణ్‌ సినిమాతో ఆమె తెలుగు చిత్ర పరిశ్రమలోకి రీ–ఎంట్రీ ఇస్తున్నారు. ‘స్టాలిన్‌’ తర్వాత ‘యమదొంగ’లో అతిథి పాత్రలో కనిపించిన ఖుష్బూ తొమ్మిదేళ్ల తర్వాత నటించనున్న తెలుగు చిత్రం ఇది. పవన్‌ హీరోగా త్రివిక్రమ్‌ దర్శకత్వంలో హారికా అండ్‌ హాసిని క్రియేషన్స్‌ పతాకంపై ఎస్‌.రాధాకృష్ణ (చినబాబు) ఓ చిత్రం నిర్మించనున్న విషయం తెలిసిందే. ఇందులో కీలక పాత్రకి ఖుష్బూని తీసుకున్నారు.

ఈ సందర్భంగా ఆమె మాట్లాడుతూ– ‘‘అభిమానులకు శుభవార్త. తొమ్మిదేళ్ల గ్యాప్‌ తర్వాత తెలుగు సినిమా చేయబోతున్నా. పవన్‌– త్రివిక్రమ్‌ కాంబినేషన్లో తెరకెక్కనున్న ప్రతిష్టాత్మక చిత్రంలో నేనూ భాగం అయినందుకు సంతోషిస్తున్నా. త్రివిక్రమ్‌ అద్భుతమైన కథ సిద్ధం చేశారు. ఇందులో నా పాత్ర పవర్‌ఫుల్‌గా ఉంటుంది. తెలుగులో నా చివరి సినిమా చిరంజీవితో చేశా. ఇప్పుడు ఆయన తమ్ముడితో చేస్తుండటం సంతోషంగా ఉంది. ‘స్టాలిన్‌’ తర్వాత ‘యమదొంగ’లో నటించినా అతిథి పాత్ర కావడం.. మూడు రోజులు మాత్రమే  షూటింగ్‌లో పాల్గొనడంతో పూర్తి స్థాయి చిత్రంగా లెక్కలోకి తీసుకోను. ఇప్పుడు అంగీకరించిన ఈ సినిమాలో నాది పెద్ద పాత్ర’’ అని చెప్పారు.