హ్యాండిచ్చిన రష్మిక!

ప్రతిభ కంటే ముఖ్యంగా సినీరంగంలో హీరోయిన్లకు లక్‌ ఉండాలి. ఇంకా చెప్పాలంటే ప్రతిభ ఉండీ పైకి రానివారెందరో ఉన్నారు. అయితే ఇక్కడ విజయాలే కొలమానం. వాటిని అందుకోవాలంటే అదృష్టం ఉండాలి. ఆ తరువాతనే పని, ప్రతిభ. అందుకే ఏ హీరో, హీరోయిన్‌ అయినా, దర్శకుడైనా మొదట్లో ఒక్క అవకాశం అంటూ ఎక్కే మెట్లు, దిగే మెట్లు అంటూ చెప్పులరిగేలా  నిర్మాణ సంస్థల కార్యాలయాలకు తిరుగుతుంటారు. ఇదంతా ఎందుకు చెప్పాల్సి వచ్చిందంటే నటి రష్మిక మందన్న కోలీవుడ్‌లో ఒక చిత్రంలో నటించడానికి సమ్మతించి తరువాత సారీ అనేశారట.

ఇదే ఇప్పుడు సామాజిక మాద్యమాల్లో వైరల్‌ అవుతున్న న్యూస్‌. రష్మిక శాండిల్‌వుడ్‌కు చెందిన నటి. మాతృభాషలో కథానాయకిగా కొన్ని చిత్రాల్లో నటించినా పెద్దగా పేరు రాలేదు. అయితే ప్రేమ, బ్రేక్‌ అప్‌ లాంటి అంశాలతో బాగానే వార్తల్లో నానింది. అలాంటిది టాలీవుడ్‌లో ఎంట్రీ ఇచ్చిన తొలి చిత్రం గీతాగోవిందం ఈ అమ్మడి తలరాతను ఒక్కసారిగా మార్చేసింది. ప్రస్తుతం అక్కడ క్రేజీ హీరోయిన్‌. ఏకంగా విజయ్‌తో నటిస్తుందనే పుకార్లు షికార్లు చేశాయి.

అయితే అలాంటివి వదంతులకే పరిమితం అయినా, తాజాగా కార్తీతో రొమాన్స్‌ చేయడానికి రెడీ అవుతున్నారు. ఇలాంటి పరిస్థితుల్లో మరో స్టార్‌ హీరో శివకార్తికేయన్‌తో నటించడానికి అంగీకరించారని సమాచారం.  దర్శకుడు విఘ్నేశ్‌ శివన్, నటుడు శివకార్తికేయన్‌ల కాంబినేషన్‌లో ఒక భారీ చిత్రం తెరకెక్కనుంది.

ఈ మూవీలో హీరోయిన్‌గా బాలీవుడ్‌ బ్యూటీస్‌ కియారా, శ్రద్ధాకపూర్‌లలో ఒకరిని ఎంపిక చేయాలని భావించినట్లు ప్రచారం జరిగింది. అయితే ఫైనల్‌గా రష్మికను ఎంపిక చేశారట. శివకార్తికేయన్‌తో నటించడానికి అంగీకరించిన రష్మిక ఆ తరువాత సారీ చెప్పి వైదొలగినట్లు టాక్‌ వైరల్‌ అవుతోందిప్పుడు.

తాజాగా తెలుగులో సూపర్‌స్టార్‌ మహేశ్‌ బాబుతో నటించే అవకాశం రావడంతో, శివకార్తికేయన్‌ చిత్రానికి కాల్‌షీట్స్‌ సమస్య తలెత్తడంతో టాటా చె ప్పేసినట్లు సమాచారం. సరే తెలుగులో పెద్ద అవకాశం రావడంతో కోలీవుడ్‌లో శివకార్తికేయన్‌తో నటించే అవకాశాన్ని వదులుకోవడానికి సిద్ధం అయ్యిందనుకుందాం. అయితే ఈ అమ్మడు చెప్పే కారణం ఏమిటో తెలుసా? శివకార్తికేయన్‌ చిత్రంలో తన పాత్రకు ఎక్కువ స్కోప్‌ లేకపోవడంతోనే ఆ చిత్రాన్ని వదులుకోవాలని నిర్ణయించుకున్నట్లు వెల్లడించారట.