TV
ఆయన చిత్రాన్ని వదులు కుంటానా?
దర్శకుడు మణిరత్నం తాజా చిత్రం గురించి ఇంతకు ముందెప్పుడూ జరగనంతగా రకరకాల ప్రచారం జరుగుతుండడం గమనార్హం. ఓకే కాదల్ కణ్మణి వంటి విజయవంతమైన చిత్రం తరువాత దాదాపు ఆరు నెలలు దాటినా మణిరత్నం తదుపరి చిత్రం షూటింగ్ పట్టాలెక్కక పోవడం, దానికి ప్రధాన పాత్రదారులు పలువురు మారుతుండడంతో అసలు ఏమి జరుగుతోందన్న ఆసక్తిగా చిత్ర పరిశ్రమలో నెలకొంది. మాలీవుడ్ నటులు మమ్ముట్టి, దుల్కర్‌సల్మాన్‌ల నుంచి టాలీవుడ్ స్టార్ నటులు నాగార్జున, మహేశ్‌బాబు, బాలీవుడ్ బ్యూటీ ఐశ్వర్యారాయ్‌ల వరకూ పలు మార్పుల అనంతం తాజాగా వర్ధమాన తార సాయిపల్లవి కూడా వైదొలగ డం మణిరత్నం చిత్రం విషయంలో ఇదే తొలిసారి అయ్యి ఉంటుంది.
కార్తీ హీరోగా నటించనున్న ఈ చిత్రంలో ఆయనతో సాయిపల్లవికి ఒక సన్నిహిత సన్నివేశం ఉంటుందని, అందులో నటించడానికి ఇష్టపడని ఈ మలయాళీ కుట్టి చిత్రం నుంచి వైదొలిగినట్లు వదంతులు హల్‌చల్ చేస్తున్నాయి. అయితే ఈ విషయంలో నిజానిజాలేమిటన్నది నటి సాయిపల్లవి చెబుతూ మణిరత్నం లాంటి దర్శకుడి చిత్రంలో నటించే అవకాశాన్ని ఎవరైనా వదులు కుంటారా? తాను మాత్రం అలాంటి పిచ్చి పని ఎలా చేస్తాను అని చెప్పింది. మణిరత్నం గొప్ప దర్శకుడు.
ఏ పాత్ర ఎవరు చేస్తే బాగుంటుందన్నది ఆయనకు బాగా తెలుసునని, తనకు ఎలాంటి పాత్ర నప్పుతుందన్నది మణిరత్నంకు తెలుసని అంది. తాజా చిత్ర కథలో చేసిన మార్పుల గురించి తనకు ఆయన చెప్పారని తెలిపింది. అయినా అలాంటి అవసరం లేదని అంది. ఆ చిత్రం చూడాలనే ఆసక్తి తనుకు కలుగుతోందని సాయిపల్లవి పేర్కొంది. ఇప్పుడా పాత్రలో బాలీవుడ్ బ్యూటీ అతిథిరావు చేయనుంది. ఈ అమ్మడు 2003 లోనే తమిళంలో మూడు జాతీయ అవార్డులను గెలుచుకున్న సింగారం అనే చిత్రంలో నటించిందన్నది గమనార్హం. మణిరత్నం చిత్రం మేలో పట్టాలెక్కనున్నట్లు తెలిసింది.
