బాలీవుడ్‌ కండలవీరుడు సల్మాన్‌ ఖాన్‌ హీరోగా తెరకెక్కిన తాజా చిత్రం రేస్‌ 3. ఘనవిజయం సాధించిన రేస్‌ సిరీస్‌లో మూడో భాగంగా తెరకెక్కుతున్న ఈ చిత్రానికి రెమో డిసౌజా దర్శకుడు. హాలీవుడ్‌ స్థాయి యాక్షన్‌ ఎపిసోడ్స్‌ తెరకెక్కిన ఈ సినిమాపై భారీ అంచనాలు ఉన్నాయి. అందుకు తగ్గట్టుగా ప్రీ రిలీజ్‌ బిజినెస్‌లో రేస్‌ 3 సరికొత్త రికార్డులు సృష్టిస్తోంది. ఇప్పటికే దంగల్‌ పేరిట ఉన్న శాటిలైట్‌ రైట్స్ రికార్డ్‌ను రేస్‌ 3 బద్ధలు కొట్టింది. దీంతో రిలీజ్‌ కు ముందే సల్మాన్ రికార్డ్ ల వేట మొదలైందంటున్నారు ఫ్యాన్స్‌.

ఆమిర్‌ ఖాన్‌ హీరోగా తెరకెక్కిన దంగల్‌ చిత్ర శాటిలైట్‌ రైట్స్‌ 120 కోట్లకు అమ్ముడయ్యాయి. ఇప్పుడు సల్మాన్ హీరోగా నటించిన రేస్‌ 3 శాటిలైట్‌ రైట్స్‌ ఏకంగా 130 కోట్లు పలికినట్టుగా ప్రచారం జరుగుతోంది. అయితే ఈ విషయాన్ని చిత్రయూనిట్‌ అధికారికంగా ప్రకటించలేదు. అదే సమయంలో మీడియాలో వస్తున్న వార్తలను ఖండించలేదు. దీంతో ఆమిర్‌ రికార్డ్‌ను సల్మాన్‌ బద్ధలు కొట్టాడంటూ ఫ్యాన్స్‌ పండగ చేసుకుంటున్నారు.

సల్మాన్‌ కు ఈద్‌ బరిలో సూపర్‌ హిట్ రికార్డ్‌ ఉంది. అందుకే రేస్‌ 3 చిత్రాన్ని కూడా రంజాన్‌ కానుకగా జూన్‌ 15న రిలీజ్ చేస్తున్నారు. జాక్వలిన్‌ ఫెర్నాండెజ్‌, అనిల్‌ కపూర్‌, బాబీడియోల్‌, సాకిబ్‌ సలీమ్‌, డైసీషా ఇతర ప్రధాన పాత్రల్లో నటించిన ఈ సినిమాను సల్మాన్‌ ఖాన్‌, రమేష్‌ తౌరాని సంయుక్తంగా నిర్మిస్తున్నారు.