TV
వంద అబద్ధాలు కాదు... నూటొక్క కారణాలు!
వంద అబద్ధాలాడైనా ఓ పెళ్లి చేయమని పెద్దలు చెబుతుంటారు. కొంతమంది పెళ్లి చేసుకోకుండా ఒంటరిగా మిగిలిపోవడానికి వంద కారణాలు చెబుతారు. అయితే హీరోయన్‌ త్రిష మాత్రం తాను పెళ్లి చేసుకోకపోవడానికి 101 రీజన్స్‌ ఉన్నాయని చెబుతున్నారు. మూడు పదుల వయసు దాటినా ఈ చెన్నై సుందరి ఇప్పటికీ టాప్‌ హీరోయిన్‌లలో ఒకరిగా ఉంటున్నారు. పెళ్లి కబురు మాత్రం చెప్పడం లేదు.
అయితే ఆదివారం ట్విట్టర్‌లో అభిమానులతో ముచ్చటించిన సందర్భంలో త్రిష తన పెళ్లి గురించి స్పందించారు. ఓ అభిమాని ‘మీరంటే నాకు చాలా ఇష్టం. కనీసం నేను పెళ్లి చేసుకునేవరకైనా మీరు చేసుకోకండి’ అని రిక్వెస్ట్‌ చేశాడు. దీనికి త్రిష బదులిస్తూ ‘నేను పెళ్లి చేసుకోకపోవడానికి వంద కారణాలు ఉన్నాయి. నీ రిక్వెస్ట్‌తో ఆ లిస్ట్‌ 101కి చేరింది’ అని బదులిచ్చారు. సో.. త్రిష పెళ్లి చేసుకోకపోవడానికి నూటొక్క కారణాలు ఉన్నాయన్నమాట. మరి.. కారణాల చిట్టా పెరుగుతుందో, ఇంతటితో ఆగుతుందో కాలమే చెప్పాలి.
