బొమ్మ తుపాకీ అనుకుని..అమ్మను కాల్చింది!

కోల్‌కతా: పశ్చిమ బెంగాల్‌లో ఓ బాలిక నిజమైన తుపాకీని బొమ్మగా పొరబడి, దాంతో తన తల్లిని కాల్చింది. హుగ్లీ జిల్లాలో ఆదివారం జరిగిన ఈ ఘటనలో బాలిక తల్లి తీవ్రంగా గాయపడగా వైద్యశాలకు తరలించి చికిత్స అందిస్తున్నారు. ప్రస్తుతం ఆమె ఆరోగ్య పరిస్థితి ఆందోళనకరంగా ఉంది. ఆదివారం ఉదయం కకోలీ జన అనే మహిళకు తమ ఇంటి పెరట్లో ఈ తుపాకీ దొరికింది. దానిని బొమ్మగా భావించిన ఆమె తన కూతురికి ఆడుకోడానికి ఇచ్చింది. బాలిక ఆడుకుంటూ ఉండగా అకస్మాత్తుగా తుపాకీ నుంచి ఓ బుల్లెట్‌ మహిళ వీపు భాగంలోకి దూసుకుపోయింది. పోలీసులు బాలికను అదుపులోకి తీసుకుని ప్రశ్నిస్తున్నారు. చిన్నారి షాక్‌లో ఉందని పోలీసులు తెలిపారు.